IP: 117.*.*.* India

அஸ்ஸலாமு அலைக்கும் (வரஹ்).

நகர்மன்றத் துணைத் தலைவராக தேர்ந்தெடுக்கப்பட்ட சகோதரருக்கு வாழ்த்துக்கள்.

நமது நகராட்சி அரசியல் கட்சி சார்பில்லாத தேர்தலை சந்தித்து அதன்படியே செயல்பட்டு வருகிறது - நமது மக்களின் விருப்பமும் அதுவே.

இந்த நிலை எல்லா நாளும், அனைத்து விசயங்களிலும் நீடித்தால் நகர்மன்ற நிகழ்வுகள் சுமுகமாக இருக்கும்.
-----------------------------------------------
எதன் அடிப்படையில்?

இந்த துணைத்தலைவர் தேர்ந்தெடுப்பு எதன் அடிப்படையில் எடுக்கப்பட்டது என்று தெரியவில்லை? கட்சியா? படிப்பா? அனுபவமா? இல்லை வேறு எதுவுமா? எந்த அடிப்படை என்பது புரிந்துக்கொள்ள முடியவில்லை.

எது எப்படியானாலும் நகர்மன்ற உறுப்பினர்கள் மற்றும் தலைவர்தான் தேர்ந்தெடுத்திருக்கிறார்கள் அதனால் அந்த துணைத் தலைவர் பதவி என்பது அவர்களுக்குள் உள்ள ஒற்றுமையை பின்னணியாக கொண்டது.

அவர்களுக்குள்ளே அபிப்பிராய பேதம் ஏற்படின் , நம்பிக்கையில்லா தீர்மானம் மூலமோ அல்லது வேறு காரணத்தாலோ துணைத் தலைவர் மாற்றப்பட வாய்ப்பு உண்டு அதிலே மக்கள் நேரிடையாக எதுவும் செய்ய இயலாது.

ஆனால் ஓன்று மட்டும் நிச்சயம், முறையான, உண்மையான ஆதரவில் தேர்ந்தெடுக்கபட்டிருந்தால் அது துணைத் தலைவருக்கும் நல்லது - நமது நகர்மன்றத்திற்கும் நல்லது - நேர்மையான, நீதமான அலுவல்கள் நடைபெற்று மக்கள் பயனடைவார்கள் - நல்ல பெயர் வாங்கவும் முடியும்.

அச்சுறுத்தல், வற்புறுத்தலின் பேரிலோ அல்லது வேறு எந்த நேர்மையற்ற முறையிலோ இந்த தேர்ந்தெடுப்பு நடைபெற்றிருந்தால் நிச்சயமாக ஊழலில்லாத, சுமுகமான அலுவல்கள் நடைபெறாது - இறைவனின் சோதனைகள் நிறைந்ததாக இருக்கும்.
---------------------------------------------------
அல்லாஹ்வின் சாபம் உண்டாகும்!

அரசியல் கட்சிகள், இயக்கங்கள் என்று ஏதாவது ஒன்றை அடிப்படையாக கொண்டு போட்டியின் அடிப்படையிலே தேர்தல்கள் வைத்து அதிலே ஊழல்கள் ஏற்படுவது என்பது வேறு - அதற்கும் அல்லாஹ்வின் தண்டனை உண்டு அதில் மாற்றுக் கருத்து இல்லை.

ஆனால் ஊரின் ஒற்றுமையை முன்னிறுத்தி அதை எல்லா மக்களும் ஏற்று, அரசியல் - இயக்கம் என்ற வேற்றுமைகள் இல்லாமல் நகர்மன்றத்தை நிர்வகிக்க வேண்டும் என்று தேர்தல் நடத்தும்போது அதிலே யாராவது தலையிட்டு அநீதி செய்தார்களானால் நிச்சயமாக அல்லாஹ்வின் தண்டனைக்கு ஆளாகுவார்கள்.

அநீதி செய்ய தூண்டியவர்களுக்கும் அதற்கு எல்லா வகையிலும் மறைமுகமாகவும், நேரிடையாகவும் - உதவி, ஒத்தாசையாக இருந்தவர்களுக்கும் அல்லாஹ்வின் சாபம் உண்டாகும்.

ஊரின் ஒற்றுமையை குலைத்து அதில் குளிர் காய நினைப்பவர்களும், வயிற்றை வளர்ப்பவர்களும் விரைவில் திருந்தாவிடில் இன்ஷா அல்லாஹ்! இன்ஷா அல்லாஹ்!! நிச்சயமாக இறைவனின் தண்டனையை வெகு விரைவில் அடைந்தே தீர்வார்கள்.
----------------------------------------------
மக்கள் உள்ளம் கொதிக்கிறார்கள் :

என்னுடைய வேண்டுகோள் எல்லாம் தலைவரும், துணைத்தலைவரும் மற்றும் உறுப்பினர்களும் ஒற்றுமையாக இருந்து நம் நகருக்கு செய்ய வேண்டிய நல்லவைகளை , நம் மக்களுக்கு செய்ய வேண்டிய சேவைகளை எந்த பாகுபாடுமின்றி செய்யுங்கள் என்பதுதான்.

நீங்கள் ஒவ்வொருவரும் தனி ஓர் ஆளாக நின்று வெற்றிபெற்று வரவில்லை - உங்களுக்காக தேர்தல் காலங்களிலே நண்பர்களும், சுற்றத்தாரும் , இயக்கங்களும் ஏன் நீங்கள் சார்ந்த கட்சிகளும் உதவி செய்திருக்கிறார்கள் அதை இல்லை என்று சொல்லவில்லை - ஆனால் இப்பொழுது நீங்கள் ஒட்டுமொத்த ஊரின் பிரதிநிதியாகி இருக்கிறீர்கள் தனிப்பட்ட எவருக்குமோ , கட்சிக்கோ சொந்தமல்ல என்பதை மறந்து விடாதீர்கள்.

நீங்கள் 19 பேர்களும் எந்த விதத்திலும் பாகுபாடில்லாமல் - இலஞ்சம் வாங்காமல் செயல்பட்டால்தான் நமது நகர்மன்றம் சிறப்பாக நடைபெற்று மக்கள் பயனடைவார்கள்.

நீங்கள் எல்லோரும் இறைவன் மீது சத்தியம் செய்து பதவி பிரமாணம் எடுத்திருக்கிறீர்கள் - அந்த சத்தியத்தை மீறி யாரும் இலஞ்சம் வாங்காதீர்கள் அப்படி மீறி இலஞ்சம் வாங்கினால் - நிச்சயமாக மக்கள் எல்லோரும் சத்தியம் மீறியவர்களை தண்டிக்கும்படி இறைவனிடம் பிரார்த்தனை செய்வார்கள் என்பதை மறந்து விடாதீர்கள்.

அன்றைய மக்கள் இலஞ்சம் வாங்குபவர்களை வெறும் வாயால் வசைபாடியதோடு விட்டார்கள் - அதனால் அதிக தண்டனையை அடையவில்லை ஆனால் இன்று, மக்கள் உள்ளம் கொதிக்கிறார்கள் எனவே சாபமிடுவார்கள் என்பதால் நிச்சயமாக தண்டனை கிடைக்கும் என்பதை நினைவுக் கூற விரும்புகிறேன்.

நீங்கள் தேர்ந்தெடுக்கப்பட்ட நாள் முதலே இறைவனின் சோதனை தொடங்கிவிட்டது - சிலர் தண்டனையிலிருந்து தப்பி இருக்கிறார்கள் என்பதை நினைவுப் படுத்த விரும்புகிறேன் - சம்பந்தப்பட்டவர்கள் உணர்வார்கள் என்று நம்புகிறேன் - மற்றவர்களும் சோதனைக்கு ஆளாகாமலும் , தண்டனையை அடையாமலும் இருக்க வேண்டுகிறேன்.
--------------------------------------------------
மக்களே!

நமது நகராட்சி முன்புபோல் இல்லாமல் இந்த முறை எல்லா வகையிலும் வேறுபட்டதாகவே அமைந்திருக்கிறது - எந்த தேர்தலும் எதிர்பார்த்தது போல் அல்லாமல் மாற்றமான முடிவுகளையே தந்தது என்பதை நாம் அறிந்தோம் - இது அல்லாஹ்வின் நாட்டமே அன்றி வேறில்லை.

இதன் மூலம் அல்லாஹ்! நமதூருக்கு நன்மையை நாடி இருக்கிறான் என்று நினைத்து நாமும் நகர்மன்ற அங்கத்தினர்களுக்கு இலஞ்சம் கொடுக்காது, அவர்கள் செயல்பாட்டுக்கு ஒத்துழைப்பு கொடுத்து செயல்பட்டால் நமது நகர்மன்றம் சிறப்பாக நடைபெறும்.

அதல்லாது நாமே இலஞ்சத்தை கொடுத்து காரியங்களை சாதிக்க நினைத்தும், குப்பைக் கூளங்களை அதற்குரிய இடங்களில் போடாமலும், சுகாதார கேட்டை உண்டுபண்ணியும் மேலும் அவர்களுடன் ஒத்துழைக்காமலும் இருந்தால் நமது நகர்மன்றம் முன்பைவிட மோசமாக அமையும் - கடைசியில் தலைவி மட்டும்தான் நல்லவர் என்ற பாட்டுதான் இசைக்கப்படும்.

எனவே மக்களே! பொறுப்போடு நாம் செயல்பட்டால் நாம் சுத்தமாகவும், சுகாதாரமாகவும் நமது நகரை வைக்கலாம். எல்லாம் வல்ல அல்லாஹ்! நம் அனைவருக்கும் ஒற்றுமையை தந்து நமது நகர்மன்றம் சிறந்த மன்றமாக செயல்பட கிருபை செய்வானாக ஆமீன்.

வஸ்ஸலாம்.