IP: 117.*.*.* India

பள்ளியில் பயிற்றுவிக்கப்படும் வரலாறு பாடங்களில் - குறிப்பாக இளநிலை மாணவர்களுக்கான வரலாற்றுப் பாடங்களில், பல திரிபுகள் தயக்கமின்றி வெளியிடப்பட்டிருக்கும்.

எடுத்துக்காட்டாக, மொகலாய அரசு குறித்து சொல்லப்படும் பாடத்தில், அக்பர் மகாசக்கரவர்த்தி என்றும், அவர் மத நல்லிணக்கத்தைப் பேணியவர் என்றும், தீனே இலாஹி என்ற புதிய சமயத்தைத் தோற்றுவித்தவர் என்றும் இருக்கும்.

அது உண்மை! இருந்துவிட்டுப் போகட்டும்!!

அதே பாடத்தில், அவுரங்கசீப் மன்னர் குறித்து குறிப்பிடப்படும்போது, அவர் தொப்பி விற்றும், கையால் திருக்குர்ஆனை எழுதி பிரதிகளை விற்றும் வாழ்ந்தார் என்பது போன்ற ஒரு சில உண்மைகளைத் தெரிவித்துவிட்டு, அவர் இந்துக்களின் கோயில்களை இடித்தார்... இந்துக்களிடம் ஜிஸ்யா வரியை கட்டாயமாக வசூலித்தார்... என்பன போன்ற பல பொய்கள் சொல்லப்பட்டிருக்கும்.

இப்பாடங்களை அனைத்து முஸ்லிம் மாணவர்கள் உட்பட அனைத்து மாணவர்களும் அப்படியே நம்பிப் படித்து வந்த நிலையில், எங்களது - குறிப்பாக எனது இளம்பருவத்திலேயே இதுகுறித்து அலசி ஆராய்ந்து சிந்திக்க வைத்த காரணிகள் மூன்றே மூன்று!

(1) எனது தந்தை மர்ஹூம் எம்.எல்.ஷாஹுல் ஹமீத் (எஸ்.கே.) அவர்கள்... (2) நான் மார்க்கக் கல்வி கற்ற என் மத்ரஸா ஹாமிதிய்யா...

(3) எனக்கு பள்ளியில் வரலாறு பாடம் நடத்திய மதிப்பிற்குரிய செய்துல்லாஹ் சார் அவர்கள்...

என் அன்பு ஆசான் அவர்கள் அந்தப் பாடங்களை நடத்தும்போதே அதன் உண்மை நிலையையும் விளக்கி, இதுபோன்ற வரலாற்றுத் திரிபுகள் செய்யப்படுவதற்கான காரணம் - அவற்றைச் செய்வது யார் என்பன போன்றவற்றையும் தெளிவாக விளக்கிப் பாடம் நடத்துவார்.

இவர்களது இந்தப் பாடம் நடத்தலின் மூலமாக, என்னைப் போல மார்க்கக் கல்வி நிறுவனங்களுக்குச் செல்லாத மாணவர்கள் கூட உண்மையை உணர்ந்துகொள்வார்கள்.

இன்று அந்த நல்லுள்ளம் நம்மோடு இல்லை. ஆனால் அவர் தந்த கல்வி ஆயிரக்கணக்கான மாணவர்களின் நெஞ்சங்களில் ஆழப்பதிந்துள்ளது. அதன் மூலம் அவர் நம்மோடு வாழ்ந்துகொண்டுதான் இருக்கிறார் என ஆறுதல் கொள்வோம்.

கருணையுள்ள அல்லாஹ் மர்ஹூம் அவர்களின் பாவப்பிழைகளைப் பொருத்தருளி, அவர்களின் நற்கருமங்களை கபூல் செய்து, மறுமையில் ஜன்னத்துல் ஃபிர்தவ்ஸ் எனும் உயர் சுவனத்தை நற்கூலியாக நல்கியருள்வானாக, ஆமீன்.

அன்னாரின் பிரிவால் துயருற்றிருக்கும் அவர்களின் குடும்பத்தார், உற்றார் - உறவினர், எல்.கே.மேனிலைப்பள்ளி நிர்வாகிகள் மற்றும் ஆசிரியர்கள், அல்அமீன் துவக்கப்பள்ளி நிர்வாகிகள் - ஆசிரியர்கள் - மாணவ-மாணவியர் என அனைவருக்கும் எங்கள் ஆழ்ந்த இரங்கலைத் தெரிவித்துக்கொள்கிறோம். அல்லாஹ் உங்கள் யாவருக்கும் அழகிய பொறுமையைத் தந்தருள்வானாக, ஆமீன்.

அன்புடன்,
ஆசிரியரது அன்பு மாணவன்
எஸ்.கே.ஸாலிஹ்.