IP: 117.*.*.* India

என் பாசத்திற்குரிய சுல்தான் மாமா அவர்கள், என் தந்தையிடம் கூட, தன் மகனைப் பார்த்துப் பேசுவது போல் பேசுவார்கள். எங்கள் தந்தையிடம் - ஒரு மனைவியாக எங்கள் தாயாரோ, மக்களாக நாங்களோ ஏதேனும் சொல்ல வேண்டியிருந்து, அதில் தயக்கமிருந்தால், நாங்கள் நாடும் முக்கியமான பெரியவர் இவர்கள்தான். உடனடியாக எங்கள் தந்தையைக் கண்டு, உரிமையுடன் பேசி குறையைக் களைவார்கள். இவர்களது பேச்சுக்கு என் தந்தையும் பெட்டிப் பாம்பாய் இருப்பார்கள். தங்கள் வயதைக் கருத்திற்கொள்ளாத அவர்களின் இந்த நடவடிக்கை எங்களுக்கு வியப்பைத் தரும்.

நுஸ்கீ காக்கா சொன்னது போல, மஜ்லிஸுல் புகாரி ஷரீஃப் ஆகட்டும், குருவித்துறைப் பள்ளியாகட்டும்! எந்த நிகழ்வானாலும், குறித்த நேரத்தில் அவர்கள் முதலாமவராக வந்திருப்பார்கள். யாருக்காகவும் பொது நிகழ்ச்சிகள் காலம் தவறக்கூடாது என்று கண்டிப்புடன் இருந்தவர்கள்.

சிறுபிள்ளைகளுக்கு திருமறை குர்ஆனையும், இஸ்லாமிய சட்ட விளக்கங்களையும் அவர்கள் கற்றுத் தந்துகொண்டேயிருப்பார்கள். சாதாரண மாணவர்களை திருக்குர்ஆனை மனனம் செய்ய வைப்பதே பெரிய விஷயம். ஆனால் இவர்கள், கண் பார்வையற்ற சில மாணவர்களை ஹாஃபிழாக்கியவர்கள்.

அறிமுகமானவர்களை அழைத்து அழைத்து குசலம் விசாரிப்பதிலும், அறிமுகமற்றவர்களை அழைத்து குடும்ப விபரங்களைக் கேட்டறிவதிலும், அவர்களுக்கு ஏதேனும் சொல்லவியலா தங்கடங்கள் இருந்தால், தன்னாலான அனைத்து முயற்சிகளையும் செய்து, காதும் காதும் வைத்தாற்போல் கச்சிதமாக காரியத்தை முடிப்பார்கள்.

பழைய கால சரித்திரங்களை, அந்தந்த கதாபாத்திரங்களாகவே மாறி அவர்கள் உடல் பாவனைகளுடன் சொல்வதைக் கேட்டுக்கொண்டேயிரலாம்.

இத்தனைக்கும் சொந்தக்காரர் இன்று நம்மோடு இல்லை. அல்லாஹ் அதில் அவர்களுக்கு ஒரு பெரும் நன்மையை வைத்திருக்கக் கூடும். மனம் அமைதி பெற மறுக்கிறது. என்ன செய்ய? இறைவிதியைப் பொருந்தித்தான் ஆக வேண்டும்.

கருணையுள்ள அல்லாஹ், மர்ஹூம் மாமா அவர்களின் பாவப் பிழைகளைப் பொருத்தருளி, அவர்களது நற்கிரியைகள் அனைத்தையும் தனதருளால் ஏற்று, மண்ணறை - மறுமை வாழ்வுதனை ஒளிமயமாக்கி வைத்து, உயர்வான ஜன்னத்துல் ஃபிர்தவ்ஸ் சுவனத்தில், நபிமார் - ஸித்தீக்கீன் - ஷுஹதா - ஸாலிஹீன்களுடன் அவர்களையும், நம்மையும் ஒன்றாய் அமர்த்தியருள்வானாக...

மர்ஹூம் அவர்களின் பிரிவால் துயருற்றிருக்கும் என் பாசத்திற்குரிய யஹ்யா காக்கா, என் இணைபிரியா நண்பன் மவ்லவீ ஹாஃபிழ் செய்யித் அபூதாஹிர் மஹ்ழரீ உள்ளிட்ட குடும்பத்தார் அனைவருக்கும் வல்ல அல்லாஹ் ‘ஸப்ரன் ஜமீலா’ எனும் அழகிய பொறுமையைத் தந்தருள்வானாக...

அனைவருக்கும் அஸ்ஸலாமு அலைக்கும் வரஹ்மத்துல்லாஹி வபரக்காதுஹ்...

உளமார்ந்த பிரார்த்தனைகளுடன்,
எஸ்.கே.ஸாலிஹ்
மற்றும்
எஸ்.கே. குடும்பத்தார்,
கொச்சியார் தெரு, காயல்பட்டினம்.