IP: 157.*.*.* Indonesia

என் தந்தையின் சிறிய தாயார் என்றாலும், அவர்களை வளர்த்த தாயார்.

என் தந்தையார் தனது வாழ்நாளில் ஊரிலிருந்த நாட்களில் - நானறிய ஒரு நாள் கூட அங்கு சென்று தன்னை வளர்த்த இரு தாய்களையும் சந்திக்காமல் இருந்ததேயில்லை. அவ்வளவு பாசம்!

அதேயளவு பாசத்தை என்னிடமும், என் உடன்பிறப்புக்களிடமும் தொடர்ந்து காண்பித்து வந்தவர்கள்தான் இந்தச் சீமாட்டி அவர்கள்.

மிகுந்த நகைச்சுவை உணர்வுகொண்டவர்கள். சில காலம் படுக்கையில் அவதியுற்றபோதும் கூட, தன்னைப் பார்க்க வருவோரிடமெல்லாம் - தன் கவலையை மறந்து, தனது வழமையான நகைச்சுவை உரையாடலை நடத்துவார்கள்.

தன் மரணத்தை எதிர்பார்த்து இரண்டு செட் கஃபன் துணியும் வாங்கி வைத்திருக்கிறார்கள் என்ற செய்தி, அவர்களைக் குளிப்பாட்டி கஃபன் துணியெல்லாம் அணிவித்த பிறகு கிடைத்து - மிகவும் கைசேதமுற்றோம். என்றாலும், அவர்கள் ஆசைப்படி நடக்க வேண்டும் என்பதற்காக, அவர்கள் வைத்திருந்த துணியில் ஒரு பகுதியையும் - அணிவித்த கஃபனுடன் சேர்த்துக்கொண்டோம்.

அதுபோல, தன் மறுமை நலனுக்காக 100 முறை திருமறை குர்ஆனை ஓதி முடித்து கத்ம் செய்திருப்பதாகக் கூறியிருக்கிறார்கள்.

தன் கடைசித் தருணங்கள் முழுக்க இறை தியானத்திலேயே கழித்து - நம்மிடமிருந்து விடைபெற்றுள்ளார்கள்.

இதுபோன்ற சீமாட்டிகள் இன்னும் ஓரிருவர்தான் கண்களில் தென்படுகின்றனர். கால மாற்றத்தால் காணாமல் போகும் நல்முத்துக்கள், நமதூரில் மீண்டும் வளர்ந்தோங்க அல்லாஹ் அருள்வானாக!

வல்ல அல்லாஹ்வின் கட்டளைக்கிணங்க மர்ஹூமா (வாப்பிச்சா) அவர்கள் தமது இவ்வுலக வாழ்வை முடித்துக்கொண்டார்கள்.

அவர்களும், நாமும் நம் வாழ்நாளில் அறிந்தோ, அறியாமலோ செய்த பாவப்பிழைகள் அனைத்தையும் கருணையுள்ள அல்லாஹ் தன் அளப்பெரும் கிருபை கொண்டு பொறுத்தருளி, ஜன்னத்துல் ஃபிர்தவ்ஸ் எனும் உயர்சுவனத்தில், நபிமார் - ஸித்தீக்கீன் - ஷுஹதா - ஸாலிஹீனுடன் இணைந்திருக்கும் பாக்கியத்தை அவர்களுக்கும், நமக்கும் நற்கூலியாக வழங்கியருள்வானாக...

மர்ஹூமா அவர்களது பிரிவால் துயரிலிருக்கும் எனதன்பு குடும்பத்தார் யாவருக்கும் அல்லாஹ் ‘ஸப்ரன் ஜமீலா’ எனும் அழகிய பொறுமையை வழங்கியருள்வானாக... ஆமீன்.

அனைவருக்கும் அஸ்ஸலாமு அலைக்கும் வரஹ்மத்துல்லாஹி வபரக்காதுஹ்.

துஆக்களுடன்,
எஸ்.கே.ஸாலிஹ்
மற்றும்
மர்ஹூம் எஸ்.கே.ஷாஹுல் ஹமீத் குடும்பத்தார்
கொச்சியார் தெரு, காயல்பட்டினம்.