{ முகநூல் கருத்துக்கள்}{ட்விட்டர் கருத்துக்கள்}

அர்ஷின் ஒளியே!
அல்லாஹ்வின் அருளே! அன்பின் அடையாளமே - அண்ணலே!

சாட்சியாய் வந்தவரே!
சாத்தானை வென்றவரே!

தூது சுமந்து வந்த தூதரே!

வான் தனை தாளெனக் கொண்டாளும்
கடல் நீர் தனை மைஎனக் கொண்டாளும்
நின் புகழ் பாடத் தொடங்குமே அன்றி
முற்றிட யாரும் முனைந்தாரில்லை...

இச்சிறியோனின் பேராசை
உங்கள் போர்வை இல்லை
மஹ்ஷர் மைதானத்தில்
உங்கள் பார்வை மட்டுமே

"முஹம்மத்" "முஹம்மத்" "முஹம்மத்"
காதில் ஊதப்பட்ட கணம்
கனிய தொடங்குகிறது - உங்கள் மீதான
எங்களின் காதல்

பின்
உங்கள் பெயரை உச்சரித்து உச்சரித்து
நகருமெங்கள் நாட்கள் உன்னதப் படுகிறது.

உங்கள் மீது சலவாத்து சொல்லி சொல்லி
கழுவப்படும் எங்களின் இதயக் கரைகள்

உங்களோடு நாங்கள் இருந்ததில்லை - எனினும்
உங்கள் நினைவின்றி நாங்கள் இருந்ததில்லை

உங்கள் பெயரை பின் மொழியாமல் - எங்கள்
ஈமான் முழுமை அடைவதில்லை
உங்கள் வார்த்தையை பின் பற்றாமல் -எங்கள்
வாழ்க்கை முழுமை அடைவதில்லை.

சொர்க்கத்தின் எல்லா பாதைகளும்
உங்களிடம் இருந்தே ஆரம்பிக்கிறது
உங்களிடம் வந்தே முடிகிறது

வேதங்கள் போற்றும் வித்தகரே!
உண்மையில் யஹூதிக்கு கூட -
உங்கள் மீது கோபம் இல்லை ...
அவர்கள் இனத்தில் அவதரிக்கா ஆதங்கமே

நிலவை நிறுத்திய நிலவு
அற்புதங்கள் நிகழ்த்திய அற்புதம்...
அல்லாஹ் விரும்பிய அழகிய முன் மாதிரி

கழுத்தில் எப்போதும் கட்டப்பட்டிருக்கும்
தேதி அறிவிக்கப்படாத மரண அட்டை

உயிரணு சுமந்த தந்தை
உயிரை சுமந்த தாய்
உயிராய் ஒட்டிய உறவு
இரண்டாம் உயிரான மனைவி
இரண்டாம் உலகான நண்பன்

தன் நிலை அறியா - வெந்த்தனலில்
பரிதவித்துபதறிக் கிடக்கும் - உங்கள்
பரிந்துரைக்காய் பதறித் தெறிக்கும் ...

வணக்கம் அத்தனை வலுவில்லை
சொல்லிக் கொள்ளும் வகையில் சுவனத்திற்கான
சேமிப்பும் இல்லை.

ஆயினும் -
உங்களை நேசித்தோம் - என்ற
ஒற்றை உரிமைக் கொண்டு
சுவனத்துப் பறவையாய் சுற்றித் திரிவோம்

யா உம்மத்தி! யா உம்மத்தி! - என்ற
உங்கள் அணைப்புக்குள் அமைதி பெறுவோம்

அருளே - இது நீங்கள்
கொடுத்த அருள் வாக்கு ...

எங்கள் காதலை தவமாக்கி
இரண்டு வரங்கள் இறைவனிடம் கேட்போம்
இவ்வுலகில் ஒருமுறையேனும் - கனவில்
அவ்வுலகில் எப்போதும் உங்கள் - நிழலில்

அல்லாஹ் விரும்பியவரே -
நீங்கள் ஆமீன் சொல்லுங்கள்
அல்லாஹ் ஆமோதிப்பான்