IP: 59.*.*.* India

இந்திய யூனியன் முஸ்லிம் லீக் தமிழ்நாடு மாநில பொதுச் செயலாளராக தேர்ந்தெடுக்கப்பட்ட எனக்கு வாழ்த்து தெரிவித்து, துஆச் செய்த நல் உள்ளங்களுக்கு மிக்க நன்றி. பல லட்சம் உறுப்பினர்களை கொண்ட வரலாற்றுப் பேரியக்கத்தில் ஆயிரத்திற்கு ஒரு மாநில பொதுக்குழு உறுப்பினர்கள் என்ற வகையில் அங்கம் பெற்றிருந்த 41 மாவட்டங்களிலிருந்தும் வந்தவர்கள் 41 வயதே உடைய இந்த எளியேனை மாநில பொதுச் செயலாளராக ஏகமனதாக தேர்வு செய்தனர். இது வரலாற்று பெருநகர் காயல்பட்டினத்திற்கு நம் சமுதாயம் அளித்த பெருமையாக கருதுகிறேன். அப்பொறுப்பிற்குரியவனாக பணியாற்ற துஆச் செய்யுங்கள். நமது ஊரின் ஒற்றுமை, முன்னேற்றம், தனி மனித ஒழுக்கம், தொலைநோக்கு பார்வை என நாம் ஆற்ற வேண்டிய பணிகள் ஏராளம் இருக்கின்றது.

ஒரு விளக்கத்தை நான் இங்கே குறிப்பிட்டே ஆக வேண்டும். இந்திய சுதந்திரத்திற்கு முன் சர் ஆகாகான், மெளலானா முஹம்மது அலி, சவுக்கத் அலி, ஜின்னா சாகிப், சுதந்திரத்திற்கு பின் காயிதெ மில்லத், சிராஜுல் மில்லத் அப்துஸ் ஸமத் சாகிப் மறுமலர்ச்சி பத்திரிக்கை ஆசிரியர் நாவலர் திருச்சி ஏ.எம். யூசுப் சாகிப், ஷரீஅத் சட்டத்தை பாராளுமன்றத்தில் நிலை நிறுத்திய குலாம் மஹ்முது பனாத்வாலா சாகிப், அரபி மொழியை அரசு பாடத்தில் சேர்த்த கேரள முன்னாள் முதல்வர் முஹம்மது கோயா, பாங்கு ஒலிக்க தடை செய்த போது எதிர்த்து வீர முழுக்கமிட்டு தடுத்த ரவண சமுத்திரம் பீர் முஹம்மது, உள்ளிட்ட தியாக தலைவர்கள் கட்டிக் காத்த வரலாற்று பேரியக்கம் இந்திய யூனியன் முஸ்லிம் லீக். இந்திய முஸ்லிம்களுக்கு எண்ணற்ற வாழ்வியல் நன்மைகளை பெற்றுத் தந்த இந்த பேரியக்கம் தவறான கட்சி என்பது முற்றிலும் தவறான வாதம்.

கட்சி மாநாடுகளில் அரசியல் தலைவர்களை அழைத்தது தவறு என்று சொல்ல முடியாது. அவர்கள் வருகையால் பல கோரிக்கைகள் ஏற்றுக் கொள்ளப்பட்டு சமுதாயம் நன்மை அடைந்ததை யாரும் மறுக்க முடியாது. மாநாட்டு மேடையில் அந்த தலைவர்களை அதிகம் புகழ்ந்தது எங்களுக்கும் உடன்பாடான ஒன்றல்ல. அந்த ஒன்றுக்காக மட்டும் ஒட்டு மொத்த இயக்கத்தை எப்படி குறை கூற முடியும். பி.ஜே.பி யில் இருக்கும் வாஜ்பாயை குறிப்பிடுவது போல் முஸ்லிம் லீகில் இருக்கும் எங்களை RIGHT MAN IN WRONG PARTY என்ற குறிப்பிடுவதை சமுதாய உணர்வு உள்ள யாராலும் ஏற்றுக் கொள்ள முடியாது. வரலாற்று பேரியக்கம் இந்திய யூனியன் முஸ்லிம் லீக் செயல்பாடுகளில் சில குற்றம் குறைகள் இருக்கலாம், அவைகளை காலத்தால் எங்களை போன்றவர்கள் அவ்வப்போது சுட்டிக்காட்டி திருத்தி வருகின்றோம். தினமும் போராட்டம் நடத்தியவர்கள் ஆளும் கட்சி சட்டமன்ற உறுப்பினர்களாக ஆன பின் சமுதாயத்திற்கு சில காரியங்களை செய்ய வேண்டுமானால் முதல்வரை ’சமுக நீதி காத்த மாபெரும் வீராங்கனை’ என இன்று புகழ்ந்து கொண்டு இருப்பதையும் நீங்கள் பார்க்கிறீர்கள். தனி மனித புகழ் கூடாது என சொன்னவர்களின் நிலையும் இப்படி தான். மொத்தத்தில் நான் எந்த இயக்கத்தையும் புன்படுத்த விரும்பவில்லை.

இறைவன் நம் எண்ணங்களையே பார்க்கின்றான்.

ஒன்றுபடுவோம் வெற்றி பெறுவோம்

அனைத்து நல்லுள்ளங்களுக்கும் மீண்டும் என் நன்றி.

அன்புள்ள,
கே.ஏ.எம். முஹம்மது அபூபக்கர்
மாநில பொதுச் செயலாளர், இ.யூ. முஸ்லிம் லீக்
நிர்வாக இயக்குனர் – வெளியீட்டாளர், ’மணிச்சுடர்’ நாளிதழ்