IP: 117.*.*.* India

இங்கே இச்செய்தியைப் பற்றி கருத்துப்பதிவு செய்யும் ஒருவர் கூட முக்கியமான ஒரு விஷயத்தைப் பற்றி கேள்வி கேட்காதது மிகவும் ஆச்சரியமளிக்கிறது. அக்கேள்விகள் ஏற்கனவே பழைய செய்திகளில் கருத்துப்பகுதியில் கேட்கப்பட்டவைதான்! மனிதன் மறதியுள்ளவன்தானே? அதை அவ்வப்போது நிரூபித்துக்கொண்டேதான் இருப்பான். சரி விஷயத்திற்கு வருகிறென்.

(1) ஐக்கியப் பேரவை நடத்திய நகர்மன்றத் தலைமைக்கான பொது வேட்பாளர் தேர்தல் வெளிப்படையானதா? அங்கே ஜமாஅத், பொதுநல அமைப்புகள் பெயரில் குழுமியிருந்த பிரதிநிதிகள் (???) அந்தந்த ஜமாஅத் அல்லது பொதுநல அமைப்புகளின் பொதுக்குழுவில் கலந்தாலோசித்து அனுப்பப்பட்டவர்களா?

(2) சரி, ஜலாலிய்யா கூட்டத்திற்கு அழைப்பு அனுப்பப்பட்ட கடிதத்தில், ஜமாஅத்துகளும், பொதுநல அமைப்புகளும் தத்தம் உறுப்பினர்களின் கருத்துக்களைக் கேட்டறிந்து வரும் வகையில், விருப்ப மனு அளித்து கையெழுத்திட்ட / கையெழுத்திடாத மக்களின் பெயர் பட்டியலாவது தரப்பட்டதா?

(3) சரி அது போகட்டும்! அழைப்புக் கடிதத்தில்தான் விபரம் இல்லை. குறைந்த பட்சம் கூட்டத்திலாவது கலந்தாலோசனைக்கு நேரம் ஒதுக்கப்பட்டதா? எடுத்த எடுப்பிலேயே வாக்குப் பெட்டியை முன்வைத்ததன் ரகசியமென்ன?

(4) ஆகக் குறைந்தபட்சம், “இப்போது பெயர்களை அறிவிக்கிறோம்... உங்கள் ஜமாஅத் / அமைப்பின் மக்களிடம் கலந்தாய்வு செய்தபின் நாளை உங்கள் முடிவோடு இங்கே வாருங்கள் என்று எந்த வெளிப்படையான அறிவிப்பாவது உண்டா?

அன்பானவர்களே... இந்த ஐக்கியப் பேரவையை அதன் இன்றைய நிர்வாகிகளே இல்லாமலாக்க நினைத்தாலும் நாம் எதிர்த்துப் போராடி, பேரவையைக் காப்பாற்றுவோம். அது வேறு விஷயம்.

ஆனால், இந்தப் பேரவையை இயக்குவது யார்? அவ்வப்போது விரோதியாகும் செல்வந்தர் எப்படி இதுபோன்ற முக்கியமான கலந்தாலோசனைகளின்போது மட்டும் வழிகாட்டியாகி விடுகிறார்?

அழகாகவும், அமைதியாகவும், அடுத்தவர்களுக்கு முன்னுதாரணமாகவும், எம்.கே.டி.அப்பா, எல்.கே.அப்பா, பாவலர் அப்பா, விளக்கு அப்பா காலங்களில் எல்லாம் நடைபெற்று வந்த நம் ஊர் தேர்தலில் பணத்தைக் கொடுத்து, மக்களைக் கெடுத்து, குட்டிச் சுவராக்கி, பணத்திற்காகவே வேட்பு மனு செய்யும் கேடுகெட்ட - நரவலைத் தின்பதற்கு ஒப்பான கலாச்சாரத்தை இந்த ஊரில் அறிமுகப்படுத்திய சீதேவி யார்?

அவர்களின் ஒட்டுமொத்த குழுக்கழும் இணைந்துதானே இன்று இந்த ஐக்கியப் பேரவையை நடத்திக்கொண்டிருக்கிறது? காயல் அமானுல்லா காக்காவின் கருத்துப்படி அனைத்து ஜமாஅத் பிரதிநிதிகளால் முறையாகத் தேர்ந்தெடுக்கப்பட்ட நிர்வாகம்தான் இன்றைய ஐக்கியப் பேரவை நிர்வாகம் என்றால், அவர்களல்லவா வழிகாட்ட வேண்டும்?

ஒருபுறம் இந்த கருத்துப்பகுதியில் உண்மையான விமர்சனங்கள் வந்தால் கூட தாங்கிக்கொள்ள முடியவில்லையே? இங்கே நமதூரில் இந்தப் பெரியவர்கள் அடங்கிய பேரவையின் பெயரில் எத்தனை எத்தனை விமர்சனங்கள், வதந்திகள் நாக்கூசாமல் சொல்லப்பட்டு வருகிறது என்பதை ஊரிலிருப்பவர்கள்தான் அறிவார்கள்.

சரி, இக்கூட்டத்தில் பேசிய காங்கிரஸ் ஷாஜகான் காக்கா, “மத்திய காயல் மக்கள் பத்து நிமிடத்தில் பெட்டியை நிறைத்து விடுவார்கள்” என்று பட்டவர்த்தனமாக கூட்டத்தில் திருவாய் மலர்ந்தருளியிருக்கிறார். அதைக் கேட்ட பின்பும், கொஞ்சம் கூட சூடு சொரணையின்றி இருக்கும் “ஊர் ஒற்றுமை”வாதிகளைப் பார்த்தால் ஆச்சரியமாக இல்லையா?

அரசியல் கட்சிகள் போட்டியிடக்கூடாது என்பது ஐக்கியப் பேரவையின் கொள்கையாம். அதற்காக அனைத்து அரசியல் கட்சிகளிடமும் கையெழுத்தெல்லாம் வாங்கினாங்களாம். ஆனால், பொது வேட்பாளர் வென்றால்தான் அம்மாவை சந்திக்க முடியும் என்று அதே பேரவையின் இந்த மேடையில், காயல் மவ்லானா கூறுகிறார்! துணைத்தலைவர் பதவியையாவது அதிமுகவுக்கு தாருங்கள் என்று மற்றொரு ஆளுங்கட்சிக்காரர் கேட்கிறார். கொள்கையில் தெளிவாக இருந்தால், ஏன் நிகழ்ச்சி தொகுப்பாளர் “அது பரிசீலிக்கப்பட வேண்டிய நேரத்தில் பரிசீலிக்கப்படும்” என்று சொல்ல வேண்டும்? எடுத்த எடுப்பிலேயே, “இது பேரவையின் கொள்கைக்கு நேர் எதிரானது. எனவே இதுபற்றி பேசவே பேசாதீங்க” என்று அல்லவா சொல்லியிருக்கனும்?

அப்படியி்ல்லைன்னா, “தலைவர் மட்டும்தான் அரசியல் கட்சி சார்பில் போட்டியிடக்கூடாது! துணைத்தலைவர், உறுப்பினர் எல்லாம் பிரச்சினையில்லை” என்றாவது அந்த மேடையில் தெளிவுபடுத்தியிருக்கலாமே?

அன்பானவர்களே! அல்லாவைப் பயந்துகொள்ளுவொம். எடுப்பார் கைப்பிள்ளையாக நம் பேரவை செயல்பட்டு வருவதையும், நீதியின் குரல்கள் நசுக்கப்படுவதையும் எல்லோரும் எல்லா நேரத்திலும் பார்த்துக்கொண்டிருந்தாலும், பார்க்க வேண்டியவன், பார்க்க வேண்டிய நேரத்தில் பார்த்துக்கொள்வான்!!!