IP: 116.*.*.* China

பதிவு செய்த நாள் : அக்டோபர் 18,2011,02:20 IST

காயல்பட்டணம் : தமிழகத்தில் முதல்கட்ட உள்ளாட்சி தேர்தலுக்கான வாக்குப்பதிவு நேற்று நடந்தது. இதன்படி தூத்துக்குடி மாவட்டத்தின் பல்வேறு பகுதிகளிலும் முதல்கட்ட தேர்தலுக்கான வாக்குப்பதிவு நேற்று காலை துவங்கி விறுவிறுப்பாக நடந்தது. காயல்பட்டணம் 2ம் நிலை நகராட்சி தலைவர் பதவிக்கு அரசியல் கட்சியினர் சார்பில் வேட்பாளர்கள் யாரும் போட்டியிடவில்லை. இதனால் சுயேட்சை வேட்பாளர்களாக 6பேர் களம் இறங்கியுள்ளனர். கவுன்சிலர் பதவிக்கும் பலர் போட்டியிடுகின்றனர். காயல்பட்டணம் 2ம் நிலை நகராட்சிக்கான வாக்குப்பதிவு மையங்கள் அப்பகுதியிலுள்ள பள்ளிகளில் அமைக்கப்பட்டு வாக்குப்பதிவு நடந்தது. இந்நிலையில் சுபேதா மகளிர் மேல்நிலைப்பள்ளி வாக்குச்சாவடிக்கு வாலிபர் ஒருவர் ஓட்டுபோட வந்தார். பூத்தில் இருந்த அதிகாரிகள் அவரது வாக்காளர் எண், பெயர், விலாசம் போன்றவற்றை சரிபார்த்தபோது முரணாக இருந்தது. இதுகுறித்து அதிகாரிகள் அவரிடம் கேட்டபோது அந்த வாலிபர் முன்னக்குபின் முரணாக பதில் அளித்தார். இதனைத் தொடர்ந்து அங்கு வந்த போலீசார் அவரிடம் விசாரித்தனர். விசாரணையில் அந்த வாலிபர் தனது சகோதரர் வெளியூரில் இருப்பதால் அவருடைய ஓட்டை தான் போடுவதற்கு வந்ததாக கூறினார். இனிமேல் இதுபோன்ற தவறை செய்யமாட்டேன் என்னை மன்னித்துவிட்டு விடுங்கள் என்று தேர்தல் அதிகாரிகள் மற்றும் போலீசாரிடம் கண்ணீர்மல்க கூறியதால் அவரை போலீசார் எச்சரித்து அனுப்பினர். இதே போன்று சென்ட்ரல் மேல்நிலைப்பள்ளி வாக்குச்சாவடியிலும் கள்ளஓட்டு போட வந்த ஒருவர் சிக்கினார். ஓட்டு போடுவதற்கு முன்பு சிக்கிக்கொண்ட அவரையும் போலீசார் எச்சரித்து அனுப்பினர். தங்களது ஆதரவுக்குரிய வேட்பாளர்களுக்காக கள்ளஓட்டு போட வந்தவர்களால் அப்பகுதிகளில் திடீர் பரபரப்பு ஏற்பட்டது