IP: 117.*.*.* India

அஸ்ஸலாமு அலைக்கும் (வரஹ்).

அல்லாஹ்வின் இந்த இல்லத்தை புதுப்பித்து கட்ட நிர்வாகத்தினர் பட்ட சிரமங்கள் ஏராளம் , ஏராளம் , அனைத்து சிரமங்களும் நீக்கப்பட்டு கட்டி முடித்து , இன்று புதுப்பொழிவுடனே காட்சியளிப்பதற்கு உதவிய அல்லாஹுவுக்கே எல்லாப் புகழும்.

இன்ஷா அல்லாஹ்! வரும் நவம்பர் மாதம் 11 ஆம் தேதி வெள்ளிக்கிழமை முதல் ஜும்ஆ தொழுகை நமது பள்ளியில் நடத்தப்படவுள்ளதாக பள்ளியின் நிர்வாகத்தின் சார்பில் தெரிவித்திருக்கிறார்கள் - இது ஒரு நல்ல செய்திதான் என்றாலும் நெருடுதலான செய்தி - அல்லாஹ் நன்மையாக்கித் தருவானாக ஆமீன்.

---------------------------------------------

இரண்டாவது ஜும்ஆ பள்ளி :

மார்க்கத்தின் வழிகாட்டுதலிலும் , நான்கு மத்ஹபுகளின் வழிகாட்டுதலிலும் இரண்டுக்கு மேல் ஜும்ஆ பள்ளிகளை அமைக்க தடை இல்லை என்றாலும் கூட இந்த மூன்றாவது ஜும்ஆ பள்ளி அமைவது என்பது ஒரு சிறு நெருடலையே ஏற்படுத்துகிறது.

நமது முன்னோர்கள் சொல்வார்கள் ஒற்றுமையுள்ள ஊருக்கு ஒரு ஜும்ஆ என்று , அப்படி ஒற்றுமையாக இருந்த நமது ஊரில் ஆயிரம் வருடங்களுக்கும் மேலாக ஒரே ஜும்ஆ' வாகத்தான் இருந்தது - எல்லோரும் ஒரே குடையின் கீழ் நின்று - ஒற்றுமை என்னும் கைற்றை பற்றிப் பிடித்தவர்களாகவே ஒற்றுமையுடன்தான் வாழ்ந்து வந்தார்கள்.

கிட்டத்தட்ட ஐம்பது வருடத்திற்கு முன்பு ஒற்றுமைக் குறைவின் காரணமாக இரண்டாவது ஜும்ஆ பள்ளிவாசல் நமது ஊரிலே தொடங்கப்பட்டது - அதனால் ஒற்றுமை என்னும் கைற்றில் சிறு விரிசல் ஏற்பட்டது - அதன் பின் மார்க்க கொள்கைகளில் ஏற்பட்ட கருத்து வேற்றுமையால் விரிசல் சற்று கூடி நிற்கின்றது - இருந்த போதிலும் அல்லாஹ்வின் அருளால் ஏதோ ஒரு விதத்தில் நம் ஊர் மக்கள் அனைவரும் ஒற்றுமை என்னும் கைற்றை பற்றிப் பிடித்துக் கொண்டுதான் இருக்கின்றோம் அல்ஹம்துலில்லாஹ்.

என்னதான் எந்த வகையிலும்தான் நமக்குள்ளே கருத்து வேறுபாடுகள் வந்தாலும் ஒற்றுமை என்னும் கைற்றில் விரிசல் ஏற்படுவதும் - இறுகுவதுமாகத்தான் இருக்கின்றதே தவிர நமது ஒற்றுமை அறுந்துவிடவில்லை - அல்லாஹ் நம்மை காப்பாற்றியே வருகிறான் - அந்த வல்ல ரஹ்மானுக்கே எல்லாப் புகழும் , புகழ்ச்சியும் உண்டாவதாக.

-----------------------------------------------

மனதுக்கு நெருடல் :

ஜும்ஆ பள்ளியாக மாற்றியமைப்பதற்கான அவசியத்தை பற்றிய விளக்கம் எமக்கு தெரியவில்லை என்ற போதிலும் மூன்றாவதாக ஒரு ஜும்ஆ பள்ளி தொடங்க இருப்பது மனதுக்கு ஒரு நெருடலாகவே இருக்கிறது.

சிலர் கூறுவது போல் இடம் நெருக்கடி என்பது பொருந்தாத காரணம் - நெருக்கடி என்றால் ஏற்கனவே இருக்கின்ற ஜும்ஆ பள்ளியை விரிவுப் படுத்தலாமே!.

ஊர் விரிவடைந்து கொண்டிருப்பதால் தேவை என்பதும் சரியல்லவே! பெரிய வித்தியாசமான தூரம் இல்லையே!!. மேலும் "ஜும்ஆ உடைய பலனை" அதிகம் விரும்புகிறவர்கள் இந்த சிறிய வித்தியாசமான தூரத்தை பொருட்படுத்த மாட்டார்கள்.

" எவர் ஜும்ஆவுடைய நாளில் குளித்து , அதிகாலையிலேயே விரைவாக, வாகனத்தில் ஏறாது நடந்து சென்று , இமாமை அண்மித்து உரையை செவிமடுப்பாரானால் அவர் வைக்கும் ஒவ்வொரு எட்டுக்கும் ஒரு வருடம் நோன்பிருந்த , ஒரு வருடம் நின்று வணங்கிய நன்மையை அடைந்துக் கொள்வார் " என நபிகள் நாயகம் ஸல்லல்லாஹு அலைஹி வஸல்லம் அவர்கள் கூறினார்கள். (நூல்கள் : அபூதாவுத் , திர்மிதி ).

ஆகையால் மேற்கூறப்பட்ட ஹதீதின் படி நன்மையை நாடுவோருக்கு இந்த தூரம் ஒரு பொருட்டல்ல.

------------------------------------------------

சுபிட்சமாக வாழ :

இன்று இருக்கும் இரண்டு ஜும்ஆ பள்ளிகளில் நாம் தொழப் போகும்போது மக்களுக்கு ஏற்படுகின்ற ஒரு பரவசம் அதாவது பெருநாள் போன்ற ஒரு தோற்றம், கலிப்பு - மேலும் பயபக்திகள் என்பவைகள் எல்லாம் மூன்று , நான்கு என பல ஜும்ஆ பள்ளிகள் வந்தால் இருக்குமா? என்பதும்.

இப்போது மார்க்க கொள்கைகளிலே பிரிந்திருப்பது போல் வேறு எந்தவிதமான கொள்கை பிரச்சனைகளும் புகுந்து நம் ஒற்றுமை என்னும் கைற்றில் மேலும் விரிசலை ஏற்படுத்திவிடக்கூடாதே என்ற ஆதங்கமும் இருக்கிறது அதன் காரணமே இந்த நெருடல்.

யாராலும் , எந்த சூழ்ச்சியாலும் நமக்குள் பிரிவினைகள் , கொள்கை வேறுபாடுகள் எதுவும் வராமல் எந்நாளும் ஒற்றுமை என்னும் கைற்றைப் பற்றிப் பிடித்து ஒரு குடையின் கீழிருந்து சுபிட்சமாக வாழ எல்லாம் வல்ல அல்லாஹ்! கிருபை செய்வானாக ஆமீன்.

வஸ்ஸலாம்.