IP: 117.*.*.* India

அஸ்ஸலாமு அலைக்கும் (வரஹ்).

நகர்மன்றத் தலைவர் மற்றும் உறுப்பினர்கள் பதவியேற்பு விழா! சிறப்பாக நடைபெற்ற செய்தியறிந்து மகிழ்ச்சி அல்ஹம்துலில்லாஹ்!.

பதவிப்பிரமானத்தின்போது, “கடவுள் அறிய” என்றும் “அல்லாஹ் அறிய” என்றும், “எல்லாம்வல்ல அல்லாஹ் அறிய” என்றும், “இறைவன் அறிய” என்றும் இப்படியாக ஒரே பொருளைத் தரக்கூடிய பல வார்த்தைகளில் ஏக இறைவனாகிய அல்லாஹ்வை முன்னிறுத்தி சத்திய பிரமாணம் செய்து தங்களது பொறுப்புகளை ஒப்புக்கொண்டிருக்கும் அனைவருக்கும் வாழ்த்துக்கள்.

தாங்கள் அனைவரும் சத்தியம் செய்து ஒப்புக்கொண்ட இந்த பொதுச்சேவையை எந்த ஒரு பாகுபாடுமின்றி , மிகத்திறமையாக , சிறப்பாக செய்து நமது நகர்மன்றம் சிறந்த மன்றமாக இயங்கிட சேவையாற்றும்படி உங்கள் அனைவரையும் வேண்டுகிறேன்.
----------------------------------------------------
பொதுவான கண்ணோட்டம் :

இந்த தேர்தலிலே நாம் அரசியல் சாயம் பூசாது போட்டியிட்டு வெற்றி பெற்றிருந்தாலும் நம் உறுப்பினர்களில் பலரும் பல அரசியல் கட்சிகளை சார்ந்தவர்களாகவும் , அரசியல் கட்சி அபிமானிகளாகவும் இருப்பார்கள் என்பதே உண்மை.

என்னதான் கட்சி விசுவாசங்கள் இருந்தாலும் அவைகளை எல்லாம் நமது நகர் மன்றத்திற்கு வெளியே வைத்துவிட்டு - நகர் மன்றத்திற்கு உள்ளே அதுவும் நகர் மன்ற செயல்பாடுகளிலே கட்சி பாகுபாடுகளை களைந்து, கொள்கை வேறுபாடுகளை மறந்து எந்த ஒரு முடிவையும் பொதுவான கண்ணோட்டத்தில் சிந்தித்து செயலாற்றிட வேண்டுகிறேன்.

எந்த ஒரு செயலையும் பொதுவான கண்ணோட்டத்தில் பார்க்கும்போது நல்ல முடிவுகளே வரும்! அது நன்மையையேத் தரும்!! இறைவனின் அருளும் பெருகும்!!!.
--------------------------------------------------
சரித்திர மாற்றங்கள் :

நமது நகர்மன்றம் பல மாற்றங்களை கண்டிருக்கிறது - நகர்மன்ற தலைவர் ஆண் என்றிருந்தது பெண்ணாக மாறியதிலிருந்து தேர்தல் நடந்து முடிந்தவரை பல வகையிலும் நாம் விரும்பியோ , விரும்பாமலோ பல சரித்திர மாற்றங்கள் நிகழ்ந்தது - அது இறைவனின் நாட்டமே!.

தேர்தல் முடியும் வரை ஏற்பட்ட மாற்றங்கள் எல்லா செயல்களிலும் தொடர்ந்து மாற்றங்களை ஏற்படுத்தி ஊழலில்லாத மன்றமாக - சில, பல புதுமையான திட்டங்களுடன் செயல்பட வேண்டும்.

தலைவர் / மற்றும் உறுப்பினர்கள் எதையும் அவசரக் கோணத்தில் பார்க்காமல் சிந்தித்து செயலாற்ற வேண்டுகிறோம் - அவசரமாக செய்ய வேண்டியதை தவிர்த்து மற்றவைகளுக்கு - எக்காரணம் கொண்டும் அவசரம் தேவை இல்லை என்பதை நினைவில் நிறுத்தவும்.
---------------------------------------------------
உங்களை எவரும் அசைக்க முடியாது:

உங்கள் அனைவருக்கும் தேர்தல் காலங்களிலே உங்கள் நண்பர்கள் பலரும் பல விதத்திலே நீங்கள் வெற்றி பெறுவதற்காக பல உதவிகளை செய்திருக்கக் கூடும் அதுவெல்லாம் தேர்தல் காலத்தோடு முடிந்துவிட்டது.

அவர்கள் உங்களுக்கு எப்போதும் நல்ல நண்பர்களாகவே இருக்கட்டும் - உங்கள் நிர்வாகத்திலே தலையிட அனுமதிக்க வேண்டாம்.

ஊருக்கு மிக முக்கியமான திட்டம் , ஊரின் கலாச்சாரத்திற்கு மாற்றமான திட்டம், அல்லது காலாகாலமாக இருந்துவந்த சில விசயங்களில் மாற்றம் என்று எதுவும் வருமானால் அந்த மாதிரி விசயங்களில் நம் ஊர் பெரியவர்களை அணுகி அவர்களின் அணுகுமுறையை, அனுபவத்தை தெரிந்து அவர்கள் தரும் அறிவுரையை பின்பற்றி செயல்பட வேண்டியது - இது எல்லா உள்ளாட்சி நிர்வாகங்களிலும் வழமையானது தான்.

இப்பொழுது நமது நகர்மன்ற நிர்வாகம் உங்கள் பொறுப்புக்கு வந்துவிட்டதால் தலைவர் மற்றும் 18 உறுப்பினர்களாகிய நீங்கள் 19 பேர்கள் மட்டும்தான் அதனுடைய நன்மை , தீமைகளுக்கு பதில் சொல்ல கடமை பட்டிருக்கிறீர்கள் எனவே நீங்கள் 19 பேர்களும் நேர்மையான வழியில் ஒற்றுமையாக செயல்படும் காலம்வரை உங்களை எவரும் அசைக்க முடியாது.

ஆகையால் நீங்கள் இறைவனுக்கு பயந்தவர்களாக மக்கள் மகிழ்ந்தவர்களாக பணியாற்றுங்கள் இறைவனின் அருள் என்றும் உங்கள் மீது உண்டாகும்.
-----------------------------------------------------
வேண்டுகோள் :

ஐந்து விரல்களும் ஒன்றுபோல் இல்லை! எல்லா நேரமும் , காலமும் ஒன்றுபோல் இருக்காது.

இன்று நீங்கள் எல்லாம் நல்லவர்களாக இருக்கலாம் ஒருகால் கால சூழ்நிலை உங்களை தவறான பாதைக்கு இழுத்து சென்றுவிடலாம் (இறைவன் காப்பாற்றட்டும்).

ஒரு வேளை அப்படி தவறான பாதைக்கு உங்களில் எவரும் போய் அதற்கான தண்டனையை நீங்கள் அனுபவிக்கக் கூடாது என்ற நல்ல எண்ணத்தில் தலைவர் முதல் அத்தனை உறுப்பினர்களுக்கும் என்னுடைய தனிப்பட்ட ஒரு வேண்டுகோள்.

முதலாவதாக நீங்கள் ஒவ்வொருவரும் மருத்துவமனை சென்று உங்கள் உடல் நிலைகளை முழுப்பரிசோதனை செய்து உங்கள் ஆரோக்கியத்தைப் பற்றி தெரிந்து அதை நீங்களே இரகசியமாக வைத்துக்கொள்ளுங்கள். உங்கள் ஆதரவில் உள்ள உங்கள் குடும்பத்தவர்களின் ஆரோக்கியத்தையும் தெரிந்து வைத்துக்கொள்வது நல்லது.

இரண்டாவதாக உங்களின் மன அமைதி - உங்கள் குடும்ப வாழ்க்கை - நண்பர்கள் வட்டாரம் இன்றைய தினம் எப்படி உள்ளது என்பதை எழுதி வைத்துக்கொள்ளுங்கள்.

மூன்றாவதாக இன்றைய தினம் - உங்களுடைய அசையா சொத்து, அசையும் சொத்து எவ்வளவு ? வரவு, செலவு மற்றும் கடன் எவ்வளவு என்பதையெல்லாம் கணக்கு எழுதி வையுங்கள்.

இவைகள் எல்லாம் உங்களுக்கும் இறைவனுக்கும் தெரிந்தவையாகவே இருக்கட்டும் வேறு யாருக்கும் தெரிய வேண்டிய அவசியமில்லை.

இந்த மூன்று வேண்டுகோளையும் ஒவ்வொரு ஆறு மாதமும் செய்து உங்கள் நேர்மையை நீங்களே பரிசோதனை செய்துக்கொள்ளுங்கள்.

தவறுகள் ஏதும் நடந்திருப்பின் நீங்களாகவே திருத்தி, திருந்திக்கொள்வீர்கள் இறைவன் அருள் கிட்டும் - திருந்தாதிருப்பின் இறைவனின் தண்டனையை அனுபவிப்பீர்.

" அரசன் அன்றே கொல்வான் - இறைவன் நின்று (தாமதித்து) கொல்வான் " என்பது அன்றைய பழமொழி.

ஆனால் இன்று மாறி வருகிறது அரசன் நின்று (அரசாங்கம் இலஞ்சம் வாங்கி, அல்லது வேண்டிய ஆள் என்று தாமதப்படுத்தி ) கொல்கிறான் - இறைவன் அன்றே (உலகத்திலேயே படிப்பினைக்காக நோய், கோர்ட், கேஸ், கைது என்று கேவலப்படுத்தி ) கொல்கிறான் "

உலகம் முழுவதும் ஊழல் செய்த எவரும் தப்பியது இல்லை இதை நாம் தினமும் கண்டும், கேட்டும் வருகிறோம் - இந்த நிலை நம் நகர்மன்ற அங்கத்தினர்களுக்கு வரக்கூடாது என்பதே எனது ஆசை.

எனவே நமது நகர்மன்ற அங்கத்தினர்களே! எனது வேண்டுகோளை உதாசீனப்படுத்தாதீர்!! இரகசியமாக செய்து பயனடைவீர்!!!.
--------------------------------------------------
மக்களே!

நேற்றையதினம் அல்லாஹ்! அருளால் நமது நகர்மன்றம் புதிய தலைவர்களையும், உறுப்பினர்களையும் கொண்டு செயல்பட துவங்கி இருக்கிறது.

முதலில் பொது மக்களாகிய நாம்தான் அவர்களுக்கு உறுதுணையாக இருக்க வேண்டும், எந்த ஒரு விசயத்திற்கும் இலஞ்சம் கொடுக்கக் கூடாது, யாரும் இலஞ்சம் கேட்டால் அதை தலைவரிடமோ , உருப்பினரிடமோ போய் சொல்ல வேண்டும்.

எந்த ஒரு தவறுக்கும் பொது மக்களாகிய நாம் காரணமாக இருக்கக்கூடாது - இந்த மன்றம் நமக்காக சேவை செய்கிற மன்றம் நாமே தவறு செய்தால் தட்டிக் கேட்பது யார் ?

நேற்றுதான் புதிய மன்றம் தொடங்கி இருப்பதால் இன்ஷா அல்லாஹ்! விரைவில் பல மாற்றங்கள் உருவாகி நல்ல சேவைகள் தொடர்ந்து நடைபெறும்.

எல்லாம் வல்ல அல்லாஹ்! நம் நகர்மன்றத்தை நல்ல சேவை நிறைந்த மன்றமாக செயல்பட செய்திடுவானாக ஆமீன். வஸ்ஸலாம்.