IP: 117.*.*.* India

அஸ்ஸலாமு அலைக்கும் (வரஹ்).

நகர் மன்ற தலைவர் குடிநீர் திட்டம் குறித்து ஆய்வு செய்யும் முகமாக பொன்னன்குறிச்சி, மங்கலக்குறிச்சி, ஸ்ரீவைகுண்டம் மற்றும் ஆத்தூர் ஆகிய இடங்களுக்கு சென்று விவரங்களை சேகரித்து வந்திருக்கிறார் பாராட்டப்பட வேண்டிய விசயம்.

------------------------------------------------

நல்லவர்களின் பண்பாடு :

இன்றைய தலைவர் முன்பிருந்தவர்கள் அனைவரையும் விட வயதிலே குறைந்தவர் - நகர் மன்ற அனுபவமில்லாதவர் - அதுவும் ஒரு பெண் மணி - பதவியேற்றதுமே சுறுசுறுப்பாக செயல்பட்டு ஊருக்கு நல்லது செய்ய ஆயத்தமாகும்போது அவருக்கு நாம் உறுதுணையாக இருந்து உற்சாகப்படுத்த வேண்டுமே தவிர குறை காணக் கூடாது.

அவரின் செயல்களில் குறையைக் காண நேர்ந்தால் - அவர் புதியவர் , இப்போதுதானே பொறுப்புக்கு வந்து இருக்கிறார் என்பதை கவனத்தில் கொண்டு - அதை பொருட்படுத்தக்கூடாது - அல்லது அவருக்கு செய்தி எட்டுகின்ற மாதிரி நளினமாக எடுத்துரைக்க வேண்டும் - இதுதான் நல்லவர்களின் பண்பாடு.

---------------------------------------------------

மக்களின் மனோபாவங்கள் :

இந்த செய்திக்கு கொடுக்கப்பட்டிருக்கும் படங்கள் மொத்தம் 23 ஒவ்வொரு படமும் தனித் தனி செய்தியை தாங்கி நிற்கின்றது என்பது உண்மை என்றாலும் - இந்த செய்திக்கு வெறும் 8 அல்லது 9 படங்களை மட்டும் காட்டிவிட்டு மற்றதுகளை பாதுகாத்து வைத்திருந்திருக்கலாம்.

மக்கள் புரிந்துக்கொள்ள / அறிந்துக்கொள்ள வேண்டும் என்பதற்காக இவ்வளவு படங்களை செய்தியுடன் காட்டிய போதிலும் மக்களின் மனமோ வேறுதிசையை நோக்கி செல்கிறது.

எனவே எந்த ஒரு செய்தியையும் வெளியிடும்போது செய்தியாளர்கள் மக்களின் மனோபாவத்திற்கு தகுந்தபடி செய்திகளை அமைக்க வேண்டும் - மக்களின் மனோபாவங்கள் நேரத்திற்கு நேரம் மாறுபடும் என்பதையும் உணர வேண்டும்.

---------------------------------------------------

தலைவர் செய்வார் என்பதற்காக :

தலைவர் அவருடைய சகாக்களுடன் குடிநீர் திட்டம் குறித்து ஆய்வு செய்ய சென்ற இந்த செய்தியை இந்த இணையத்தளம் வெளியிட்டிருப்பதின் நோக்கம் இரண்டு.

முதலாவது நமது புதிய தலைவர் அவருடைய தேர்தல் வாக்குறுதியில் சொல்லியபடி குடிநீர் திட்டத்தில் கவனம் செலுத்த தொடங்கிவிட்டார் என்பதை மக்களுக்கு தெரியப்படுத்துவது.

இரண்டாவது நாம் குடிநீர் திட்டம் குறித்து ஆய்வு செய்யும் செய்தி மக்களுக்கு எட்டிவிட்டது அதனால் இதை எப்படியும் நிறைவேற்றியே ஆக வேண்டும் என்று உணர்ந்து உற்சாகத்தோடு தலைவர் செய்வார் என்பதற்காக.

மேலும் இந்த செய்திகள் வெளியாவது - அதனுடைய படங்கள் வெளியாவது எல்லாம் செய்தியாளர்களுக்கு கிடைக்கும் செய்தியின் தன்மையை பொறுத்தே தவிர மக்கள் நினைப்பது போல் தலைவரை பொறுத்தல்ல - தலைவரும் அப்படிப்பட்டவரல்ல.

----------------------------------------------------

முன்னாள் இருந்த அத்தனை தலைவரும் :

கருத்து தெரிவிப்பவர்கள் ஏதோ இந்த தலைவர் மட்டும்தான் குடிநீர் விசயமாக அக்கறை எடுத்திருப்பது போலவும் - முன்னாள் தலைவர்கள் எல்லாம் அக்கறை இல்லாதவர்கள் போலவும் ஒரு மாயையை உருவாக்குகிறார்கள் - அதற்கு பதில் அளிப்பவர்களோ எதிர்மறையாக கருத்துக்களை பதிகிறார்கள் இது ஆரோக்கியமானது அல்ல.

இதற்கு முன்னாள் இருந்த அத்தனை தலைவரும் குடிநீர் விசயமாக அக்கறை எடுத்து செயல்பட்டிருக்கிறார்கள் என்பதே உண்மை. என்னுடைய அறிவுக்கு எட்டியவரை நமது பாவலர் அப்பா அவர்கள் , விளக்கு மாமா அவர்கள் , சகோதரி நாச்சி தம்பி அவர்கள் மற்றும் சகோதரி வஹிதா அவர்கள் - இவர்கள் எல்லாம் ஆத்தூர் சென்று குடிநீர் விநியோகத்தை சீர் செய்ய முயற்சி மேற்கொண்டவர்களே.

அது மட்டுமா 1977 லில் உள்ளாட்சி தேர்தல் நடை பெறாமல் அதிகாரிகளின் கையில் நமது ஊராட்சி மன்றம் இருந்தபோது திருச்செந்தூர் ஒன்றிய மக்கள் ஆலோசனை குழு உறுப்பினராக இருந்த ஹாஜி . N.M.E.M.மானாத்தம்பி காக்கா அவர்கள் அன்றைய மந்திரி G.R. எட்மன்ட் அவர்களுடன் ஒரு குழுவாக ஆத்தூர் சென்று நமக்கு கிடைக்க வேண்டிய குடிநீருக்கு நடவடிக்கை எடுக்கத்தான் செய்தார்கள்.

ஆக நமது மன்றத்திற்கு தலைவர் இருந்தாலும் சரி தலைவரல்லாத ஒன்றிய மக்கள் ஆலோசனை குழு உறுப்பினராக இருந்தாலும் சரி நம் ஊருக்கு தேவையான குடிநீருக்கு முயற்சிகளை எடுத்துதானிருக்கிறார்கள் அதில் எவரும் குறை வைக்க வில்லை என்பதை கவனத்தில் கொள்ள வேண்டுகிறேன்.

-----------------------------------------------------

தியாகங்கள் மிக சிறப்பானவைகளே! :

இன்று யார் எதை செய்தாலும் அது செய்தியாக ஊடகங்கள் மூலமாக அதுவும் வலைத் தளங்கள் மூலம் உடனே வெளியாகிவிடுகிறது - இதை யாரும் விரும்பினாலும் , விரும்பாவிட்டாலும் எப்படியோ வெளியாகிவிடும்.

அன்று இந்த அளவு ஊடகங்களின் பணி இல்லை - ஏதாவது திறப்பு விழா அல்லது மோசமான நிகழ்வுகளைத்தான் பத்திரிக்கைகள் படம் பிடித்து போடும்.

அதனால் நமது பெரியோர்கள் செய்த தியாகங்கள் , தொண்டுகள் வெளிவருவதில்லை - அப்படி வருவதை அவர்களில் பெரும்பாலோர் விரும்புவதுமில்லை.

ஆகையால் அன்று நமது தலைவர்கள் - பெரியவர்கள் செய்த பொது தொண்டுகள், தியாகங்கள் மிக சிறப்பானவைகளே!. அதுபோல் இன்று செய்பவர்களையும் குறைத்து மதிப்பிட முடியாது.

-----------------------------------------------

மக்களே!

எதையும் உதாசீனப்படுத்தாமல் , சீர்தூக்கிப் பார்த்து நல்லக் கருத்துக்களை பகிர்ந்து - ஒற்றுமையாக வாழ வழி வகுப்போமாக ஆமீன்.

வஸ்ஸலாம்.