IP: 117.*.*.* India

அஸ்ஸலாமு அலைக்கும் (வரஹ்).

புதிய நகர்மன்றத்தின் முதல் கூட்டம் தொடங்கியதற்கு வாழ்த்துக்கள் - கூட்டங்கள் கூடி கலைந்திடுவதில் பயனில்லை.

கூட்டப்படக்கூடியக் கூட்டங்கள் பயனுள்ளதாக - பண்பாடுள்ளதாக இருக்க வேண்டும்.

கருத்துக்கள் நிறைவாக கலந்துரையாடப்பட்டு - காரியங்கள் நிறைவேறவேண்டும்.
---------------------------------------------------
தீர்மானம் எண் : 2 சாதக பாதகங்கள் :

2ஆவது பைப்லைன் திட்டம் நமது நகருக்கு அவசியம் வேண்டும் என்பது எல்லோராலும் ஏற்றுக்கொள்ளப்பட்டதுதான் அதிலே கருத்து வேறுபாடு இல்லை.

ஆனால் அதை நடைமுறைக்கு கொண்டு வரக்கூடிய வழிமுறைகள் / விதிமுறைகள் சரியான கோணத்தில் செயல்பட வேண்டும்.

இதிலே வெளியே இருக்கக் கூடிய பொது மக்களைவிட நகர் மன்றத்திலே இருந்து செயல்படக்கூடிய மக்களின் பிரதிநிதியாகிய மன்ற அங்கத்தினர்கள்தான் கண்ணும் கருத்துமாக இருந்து செயலாற்ற வேண்டும்.

தலைவர் மற்றும் பெரும்பாலான உறுப்பினர்கள் மன்றத்திற்கு புதியவர்களாக இருப்பதாலும் - மேலும் இந்த திட்டம் மிகப்பெரும் தொகையாக ( கிட்டத்தட்ட 30 கோடியாக ) இருப்பதாலும் - அதை நடைமுறைக்கு மாற்றமாக அதாவது குடிநீர் வடிகால் வாரியம் மூலம் இல்லாமல் நமது நகராட்சி மூலமே செயல்படுத்த இருப்பதாலும் எதிலும் அவசரம் இல்லாமல் தீர விவாதித்து தேவையான ஆலோசனைகளைப் பெற்று முடிவு செய்யுங்கள்.

நமது நகராட்சியே இந்த திட்டத்தை எடுத்து செயல்படுத்தினால் நமக்கு நிறைய வசதிகள் ஏற்படும் என்பது உண்மைதான் என்றாலும் நகராட்சியே முன்னின்று செய்வதில் ஏற்படக்கூடிய சாதக பாதகங்களை நன்றாய் ஆய்ந்துணர்ந்து செயல்படுங்கள்.

காரணம் இந்த திட்டத்திற்கான முழுப்பணமும் நகராட்சியின் பணமல்ல - 80 % மத்திய அரசு நிதியும், 10 % மாநில அரசு நிதியும் போக மீதி 10 % தான் நம் நகராட்சி பொது நிதியில் இருந்து செலவு செய்ய உள்ளது.

ஆகையால் மத்திய அரசும், மாநில அரசும் குறித்த நேரத்தில் நிதியை தாமதமின்றி தருவதற்கு சாத்தியக் கூறுகளை ஏற்படுத்திக்கொள்ளுங்கள் - உங்களுக்குள் ஒற்றுமையும் - நேர்மையான எண்ணமும் இருந்தால் இன்ஷா அல்லாஹ்! இந்த திட்டம் நம் நகராட்சியாலேயே செயல்படுத்தப்படும்.
----------------------------------------------
மன்றத்தின் கண்ணியம் காக்கப்பட வேண்டும் :

இந்த செய்திக்கு பதிந்திருக்கும் கருத்துக்களையும் - வெளியில் கேள்விப்பட்டதையும் வைத்துப் பார்க்கும்போது நகர்மன்ற கூட்டத்தில் சில வேண்டப்படாத நிகழ்வுகள் ஏற்பட்டிருப்பதை உணர முடிகிறது.

ஒரு வேளை அப்படி எதுவும் வேண்டப்படாத நிகழ்வுகள் ஏற்பட்டிருக்குமானால் தயவு செய்து நகர் மன்ற அங்கத்தினர்களாகிய நீங்கள் அவைகளை இத்தோடு மறந்து ஒற்றுமையாக இருந்து செயல்பட வேண்டியது.

நீங்கள் அனைவரும் மக்களின் ஒட்டுமொத்த பிரதிநிதிகள் என்பதை நினைவில் கொண்டு செயலாற்றுங்கள் - மறந்துவிடாதீர்கள்.

நகர்மன்ற மரபுகள் மாறக்கூடாது - மாற்றப்படக்கூடாது - மன்றத்தின் கண்ணியம் காக்கப்பட வேண்டும்.
-------------------------------------------------
அங்கத்தினர்களே!

நீங்கள் எல்லோரும் நகராட்சியின் சட்டத்திட்டங்களை (திருத்தப்பட்ட பதிப்பு ) வாங்கி படித்து அதன்படி உங்கள் அணுகுமுறைகளை வைத்துக்கொள்வது நல்லது.

மக்களுக்கு சேவை செய்வதாக வாக்கு கொடுத்து இருக்கிறீர்கள் - அந்த வாக்கை காப்பாற்றிக்கொள்ளுங்கள் இறைவனின் அருள் உங்கள் அனைவருக்கும் கிடைக்கும்.

வஸ்ஸலாம்.