IP: 117.*.*.* India

அஸ்ஸலாமு அலைக்கும் (வரஹ்).

குடியரசு தினமான ஜனவரி 26 அன்றும், சுதந்திர தினமான ஆகஸ்ட் 15 அன்றும் அரசு அலுவலகங்களிலே கொடியேற்றுவதற்கு இன்னார்தான் என்று சட்டம் இல்லை, என்றாலும் மரபு என்று ஓன்று உண்டு அதை பின்பற்றுவது நன்று.

மரபுகள் மதிக்கப்பட வேண்டும் மறுக்கப்படக்கூடாது - மக்களால் உருவாக்கப்பட்ட மன்றம் மாசுப்படக்கூடாது.

மரபுப்படி நகராட்சி தலைவரே கொடிஏற்றவேண்டும் - அவரில்லாமலிருந்தால் துணைத் தலைவரோ அல்லது மூத்த உறுப்பினரோ கொடியேற்றலாம் அதுதான் மரபு.

---------------------------------------------------------
அவர் எப்படி மறக்க முடியும் :

இது அரசு விழா என்றும், இதில் ஆணையர் தான் கொடியேற்றவேண்டும் என்றும் துணைத் தலைவர் தெரிவித்ததால்தான், தான் கொடியேற்றியதாக கமிஷனர் கூறியிருப்பதும் ...

சென்னையில் நடக்கும் அரசு குடியரசு விழாவில் ஆளுநர் கொடியேற்றுவதால், நகர்மன்றங்களிலும் ஆணையர் தான் கொடியேற்றுவார் என, தான் நினைத்ததாக துணைத் தலைவர் கூறியிருப்பதும் நகைப்புக்குரியது.

துணைத் தலைவர் புதிதாக நகர் மன்றத்திற்கு வந்திருப்பவரா? கடந்த ஐந்து ஆண்டு காலமாக யார் , யார் கொடி ஏற்றினார்கள் என்பதைத் தெரியாதவரா ?

அது மட்டுமல்ல சென்ற வருடம் முன்னாள் நகர்மன்றத் தலைவர் வாவு S. செய்யது அப்துர்ரஹ்மான் ஹாஜி அவர்கள் கொடியேற்றியபோது இந்த துணைத்தலைவர் அருகில்தானே நின்றுக்கொண்டு இருக்கிறார் - இதை அவர் எப்படி மறக்க முடியும் அல்லது மறைக்க முடியும் ?.

------------------------------------------------

கண்ணியப்படுத்துங்கள் :

கொடி ஏற்றும்போது அந்த ஒருமணி நேர விழாவுக்கு அனைத்து உறுப்பினர்களும் மற்றும் அனைத்து ஊழியர்களும் வந்து கலந்து கொள்ள முடியாதா? நகர் மன்றத்திலே நடத்தக்கூடிய விழாவுக்குகூட மாணவர்களின் கூட்டம் தான் வரவேண்டுமா?

நகர்மன்ற அங்கத்தினர்களே! , நகராட்சி ஊழியர்களே!! இனிமேலாவது சுதந்திர தினம், குடியரசு தினம் போன்ற விழாக்களை கண்ணியப்படுத்துங்கள்.

நகர்மன்ற செயல்பாடுகள் நன்றாக இருந்தால் இந்த மாதிரியான அரசு விழாக்களுக்கு மக்கள் கூட்டம் சாரை, சாரையாக வரும் அவர்களை நீங்கள் அழைக்க வேண்டிய அவசியமில்லை - உங்கள் செயல்பாடுகளே மக்களை தானாக வரவழைக்கும்.

-------------------------------------------------

கசப்பான உண்மை :

கொடியேற்றிய இந்த விசயம் சாதாரணமானதுதானே இதை ஏன் பெரிதுப் படுத்தனும் என்று பலர் எண்ணலாம் - இருந்தாலும் சில நேரம் அப்படி இலகுவாக எடுத்துக்கொள்ள முடியவில்லை - காரணம் அது சம்பந்தப்பட்டவர்களுக்கு நன்கு தெரியும்.

பொதுவாக நகராட்சி விதிகளை நகர்மன்ற அங்கத்தினர்களும் , அதிகாரிகளும் , ஊழியர்களும் நன்கு தெரிந்து வைத்துக்கொள்வது நல்லது.

விதிகளை தெரியாமல் இருப்பதினால்தான் பல குளறுபடிகள் நிர்வாகத்திலே ஏற்படுகிறது - மேலும் இது போன்ற சாதாரண விசயங்களும் வீதிக்கு வருகிறது.

இன்றளவிலும் நம் நகராட்சி ஊழியர்களுக்கும் , அங்கத்தினர்களுக்கும் நகர் மன்றத்தின் விதி முறைகள் , அதன் ஒழுக்கங்கள் சரியாக தெரியவில்லை என்பதே கசப்பான உண்மை.

எனவே இனிமேலாவது நகராட்சி அங்கத்தினர்களும் , ஊழியர்களும் புரிந்து நடந்து கொண்டால் அது அவர்களுக்கும் நல்லது இந்த ஊர் மக்களுக்கும் நன்மையாக அமையும்.

வஸ்ஸலாம்.