IP: 117.*.*.* India

அன்புள்ள மகனுக்குத் தாயார் எழுதிக் கொள்வது, நலம், நலமறிய ஆவல்,இக் கடிதம் ஆள் மூலம் கொடுத்து அனுப்புகின்றேன்.

ஆள் புறப்பட்டு போவதாக உன் மனைவிகூட சொல்ல வில்லை! பக்கத்து வீட்டு சாச்சப்பா சொல்லி தான் தெரியும். உடனேயே வாப்பாவை முத்து ஸ்வீட்டுக்கு அனுப்பி உனக்குப் பிடித்த மைசூர் பாக்கும், காரச்சேவும் இக் கடிதம் கொண்டு வரும் நபர் வசம் கொடுத்து விடுகின்றேன்.பெற்றுக்கொண்டு முடிந்தால் ஃபோன் போடவும்.

வாப்பா என் அருமை கண்மணி நீ அங்கு எப்படியெல்லாம் கஷ்டப்பட்டு சம்பாதிக்கின்றாய் என்பது எனக்குத் தெரியாமல் இல்லை. விலைவாசி உயர்ந்தாலும்,கரண்ட் பில்,ஃபோன் பில், தண்ணீர் பில்,பால்,பள்ளிக்குட செலவுகள் பன்மடங்கு உயர்ந்தாலும், நீ உன் மனைவிக்கு கொடுக்கும் மாத வரி என்னமோ குறைவானதாக இல்லை! இரண்டு பிள்ளைகளுக்கும் அவளுக்கும் அது போதுமானதே!

தேவையில்லாத வீண் செலவுகளைக் கட்டுப்படுத்தி கணவனின் வருமானத்திற்கு ஏற்றபடி குடும்பத்தை நடத்திச் செல்பவள் தான் நல்ல மனைவி. உன் மகள் ஓதி முடித்து விட்டாள் சரி ஹைர். அதற்காக ஊர் முழுக்க பாச்சோறு பகிர வேண்டும் எனும் அவசியம் என்ன? நீ படும் பாடு உன்னைப் பெற்ற தாய் நான் அறிவேன். தாரம் அறிவாளா? என்பது தெரியவில்லை.

கொடுக்கிறதெல்லாம் காணாது,காணாது என்று பணத்தாசை பிடித்தலையும் உன் மனைவியின் சொல்லுக்கு நீ ஆடிக்கொண்டிருந்தால் நாளை உன் மளுக்கு நீ எதை சேமித்து வைக்க முடியும்?

வரும் ஞாயிற்றுக் கிழமை உன் மனைவி வீட்டில் எல்லோரும் தோப்புக்குப் போகின்றார்களாம். களறி சோறு,கத்திரிக்காய் மாங்காய், கோழி பொறித்து சாப்பிட சமையல் கூலி உட்பட ஒரு ஆளுக்கு ஐந்நூறு ரூபாயாம்,பிள்ளைகளுக்கு இரு நூற்றைம்பது. உன் கணக்கிற்கு, மனைவி,மக்கள்,மாமா, மாமி,கொளுந்தியாள்,மச்சினன் இப்படி இரண்டாயிரத்தி ஐந்நூறு ரூபாய் வரும்,அடுத்த மாதம் ஸ்கூல் திறப்பதால்,புத்தகங்கள்,யூனிஃபார்ம்,ஃபீஸ் என பல செலவுகலும் உள்ளது.நீ புத்தியோடு நடந்து கொள்.

உன் தங்கையைப் பார்! மச்சான் அனுப்பிக் கொடுக்கும் சொற்ப தொகையில் தான் உண்டு, தன் பிள்ளைகள் உண்டு என வாயை வயிற்றைக் கட்டி சிக்கனமாக சிறுகச் சிறுக சேமித்து வீட்டுக்குத் தேவையான வாஷிங் மெஷின்,ஃபிரிட்ஜ் எடுத்துப் போட்டுள்ளாள். அடுத்த மாசம் மச்சான் ஊர் வர இருப்பதால் வீட்டுக்கு பெயிண்ட் அடிக்க ஏற்பாடுகள் செய்து வருகின்றாள்.அறியவும்.

நம் வீட்டு நிலமைகள் இப்படி இருக்க உன் மனைவி வீட்டு நிலமைகளைக் கொஞ்சம் நீ நிதானத்தோடு எண்ணிப்பார்! உனக்கும் வயது போய்க்கொண்டிருக்கின்றது. மனைவி மக்களுக்கு கொடுப்பதை இந்த தாய் ஒரு போதும் தடுக்க மாட்டேன்.ஆற்றில் போட்டாலும் அளந்து போடு என்பதைத் தான் திரும்பத் திரும்ப சொல்லி வருகின்றேன்.

உம்மாவுக்கும் காடு வா,வா என்கிறது வீடு போ,போ என்கிறது. நீ எதற்கும் கவலைப் படாதே! உடம்பை நன்றாகப் பார்த்துக்கொள். யாராவது ஊர் வந்தால் அவர்களிடம் முடிந்தால் மீசைக்காரத் தைலம் ஒரு பாட்டில் கொடுத்தனுப்பு. முட்டு உளைச்சல் தான் கொஞ்சம் வேதனையாக உள்ளது.

மருமக்கள் எல்லோரும் உன்னைத் தேடுகின்றனர். வாப்பா உனக்கு ஸலாம் சொல்லச் சொன்னார்கள். மற்றவை உன் மேலன பதில் கண்டு, வஸ்ஸலாம்.

இப்படிக்கு,
உன் அன்புத் தாயார்.

குறிப்பு:
மேற்கூறிய கடிதம் ஒரு தாயாருக்காக எழுத்துதவி புரிந்தது,
-ராபியா மணாளன்.