IP: 2.*.*.* Saudi Arabia

சில நாட்களுக்கு முன்பு சுடலை அண்ணன் அவர்களின் மறைவு மனதில் இருந்த பல நினைவுகளை வெளியில் கொண்டு வந்ததது.

இப்பொழுது முருகன் அண்ணன் அவர்களின் மறைவு, மீதம் இருக்கும் நினைவுகளை அசை போட வைத்து விட்டது.

முருகன் அண்ணனின் குடும்பத்தார் மற்றும் பள்ளி நிர்வாகிகளுக்கும் என்னுடைய அனுதாபத்தை தெரிவிக்கின்றேன்.

* இன்றைய காலத்தில், பள்ளிகூட நிகழ்வுகள் என்பது படிப்பு, டியூஷன் என்று சிறு வட்டத்தில் முடிந்து விடுகிறது. ஆனால், எல். கே அப்பா காலத்தில் நடந்த நிகழ்வுகள் எல்லாம் ஆச்சரியத்தில் ஆழ்த்தி விடுகின்றன.

* மாணவர்களின் ஒழுக்கம், தூய்மை, படிப்பு, கண்டிப்பு என்று பல பரிணாமங்களை அன்று எல்.கே. அப்பாவிடம் கண்டோம்.

* பள்ளிக்கூடத்தில் அனைத்து மாணவர்களின் கை நகங்களையும், பல்லையும், உடைகளையும் பார்த்து.. பார்த்து ரேங்க் கார்டு கொடுத்து கண்டித்து, பாராட்டி, அரவணைத்து, லரபு கொடுத்து பக்குவப்படுத்திய ஒரு நல்ல மாமனிதர் LK அப்பா அவர்கள்.

* ஆசிரியர்கள் மற்றும் பள்ளி ஊழியர்களுக்கு சினிமா அரங்கில் மாணவர்களை கண்காணிக்கும் பணி, ரமலான் காலங்களில் தராவிஹ் தொழாத, சேட்டைகள் செய்யும் மாணவர்களை கண்டு பிடிக்கும் பணி... என்று அவர்களின் சமூக தொடர்புகள் இறக்கை விரிக்கும்.

## எங்கள் பகுதிக்கு மறைந்த செய்துல்லாஹ் சார் அவர்களும், முருகன் அண்ணன் அவர்களும் தான் இன்டெர்போல் அதிகாரிகள்.

ஒரு சமயம் எங்கள் குருப், பெண்கள் தைக்காவில் தராவிஹ் தொழவைக்கும் லெப்பைக்கு வைத்து இருந்த பண்டங்களையும், ஹல்வா பாலையும் ஆட்டையை போட்டு வரவும், லெப்பை சலாம் கொடுக்கவும், அவர் சப்தம் போடவும், பெண்கள் அலறவும், நாங்கள் பண்டங்களோடு ஓடவும், இன்டர்போல் அதிகாரிகளின் டார்ச் லைட் சரியாக எங்களின் முகங்களில் அடிக்கவும்.. அப்ப்பாப்ப அனைத்தும் ஒன்றாகவா நடக்கனும்.

அப்புறம் என்ன.. LK அப்பாவிற்கு புகார் சென்று விட்டது. தராவிஹ் தொழாமல் இருந்ததாலே லரபு செமத்தியாக கிடைக்கும்.. எங்கள் செயலோ.. பாக்தாத் திருட்டு செயல் அல்லவோ. அப்பா செம டென்ஷன்.

அடுத்த நாள்.. பள்ளிக்கூடத்தில் ஒவ்வொரு கிளாசுக்கும் முருகன் அண்ணன் வந்து, எலே.. நீ வா..லே.. , எலே.. நீ வா..லே.. என்று சரியாக அனைவர்களையும் அள்ளிக்கொண்டு LK அப்பாவிடம் கொண்டு சென்று விட்டார்.

ஒவ்வொருவர்களுக்காக வளைகாப்பு நடந்துதே பாருங்க.. உன் உம்மாவை தெரியும், வாப்பாவை தெரியும் என்று அடி பின்னி எடுத்து விட்டார்கள்.(இந்த காலத்தில் பசங்களை தொட முடியுமா..!)

அடுத்து நான் உள்ளே போகணும்..அடி வாங்க. அந்த சமயம் முருகன் அண்ணா. சொன்னார்..

" இந்தா பாரு.. LK அப்பா.. ஒரு அடி அடித்தவுடன் கத்தி கதறி வலி தாங்க முடியாமல் சுருண்டு விழுந்து விடு.. அப்பதான் அடுத்த அடி விழாது.. இல்லை..அம்புட்டு தான்.. பார்த்துக்கோ..!!"

சென்றேன், பிளாஸ்டில் பைப்பால் ஒரு அடி வாங்கினேன், கதறி சுருண்டு விழுந்து விட்டேன்,

முருகா.. முருகா இவனை பாரு என்று அப்பாவும் அலற,

முருகன் அண்ணன் வந்து என்னை வெளியில் கொண்டு வந்து விட்டார்.

## முருகன் அண்ணன் எனக்கு செய்த உதவிக்கு சூட்சுமம், என்றுமே ஸ்டார்ட் ஆகாத LK அப்பாவின் காரை தினமும் தள்ளிவிட்டு ஸ்டார்ட் பண்ண உதவுவது நாங்க தானே.##

எல்லாம் சுகமான நினைவுகள். அந்த அடிகளிலும் சுகங்கள் இருந்தன.

இன்னும் பல சம்பவங்கள் உள்ளன.. கருத்து பகுதி.. கட்டுரை பகுதியாக மாறி விடக்கூடாது.

சாளை S.I.ஜியாவுத்தீன், அல்கோபார்