IP: 188.*.*.* Saudi Arabia

அப்போது என்னிடம் சைக்கிள்தான் இருந்திச்சு... காலை சுமார் பத்து மணிக்கு உம்மா வீட்டுக்குப் போய் கொண்டிருந்தேன். ஜலாலியா தாண்டி பஞ்சாயத்து உள் ரோட்டில் திரும்பிய போது ஒரு நபர் வேகமாக சைக்கிளில் என்னைத் தாண்டி சென்றார். என்ன அவசரமோ? என நானும் கண்டுகொள்ளவில்லை. அவர் சைக்கிளிலிருந்து ஒரு கேரி பேக் தொப்பென்று விழுந்ததைக் கூட அவர் கண்டு கொள்ளாமல் வேகமாக குத்துக்கல் தெருவிற்குள் வளைந்து விடார். அட! பாவமே என்று நானும் விரைந்து சென்று ரோட்டின் நடுவில் கிடந்த கேரி பேக்கை கையில் எடுத்தேன். துர்வாடையும், ஈரப்பதமும் கையில் தொற்றிக் கொள்ள உள்ளே இருந்தது இறால் கழிவுகள் என்னை முகம் சுழிக்க வைத்தது.

ச்சே! பாவி மனுஷன் இதை அருகிலுள்ள குப்பைத்தொட்டியில் போட்டிருக்கலாமே? இப்படி நடு ரோட்டில் வீசிட்டு போறாரே? விடக்கூடாதுன்னு அந்த நாற்றத்தையும் பொருட்படுத்தாமல் சைக்கிள் ஹேண்டில் பாரில் மாட்டிக்கொண்டு பறந்தேன். அவரோ சூஃபி மன்ஸில் பக்கத்தில் சர்வ சாதாரணமாக சென்று கொண்டிருந்தார். மடக்கி பிடித்து காக்கா உங்க கேரிபேக் கீழே விழுந்திடுச்சு...இத பிடிங்க கவனமா கொண்டு போங்கன்னு அவர் கையில் வலுக்கட்டாயமாக கொடுத்தேன்.

அவர் திரு திருவென முழித்து இது எண்டெ இல்லெ! நீங்க ஆள் தெரியாமெ தந்திருக்கீங்கன்னு மறுக்கவே அவர் சைக்கில் மர்கார்டில் இருந்த ஈரத்தை விரலால் வளித்து மோந்து பாருங்க.. இது உங்களுக்கே நல்லா இருக்கா? அல்லஹ்வுக்கு பயப்பட வேண்டாமா? எத்தனை பேர் பதுவாச் செய்வாங்க? இனி இப்படி செய்யாதீங்க! என நான் கூறிய பின் அவர் குற்ற உணர்வில் என்னிடம் மன்னிப்பு கோரி வாங்கிக் கொண்டார்.

சரி நீங்க போங்க நான் அந்த வழியாத்தான் போறேன் நானே குப்பையில் கொண்டு போட்டு விடுகிறேன் என்றேன். இல்லை தம்பி நான் செஞ்சது தப்புதான். ஏதோ அவசரத்துலெ இப்படி செஞ்சுட்டேன் நீங்க போங்க என்றார்.

பின்னர் நாங்கள் இருவரும் சேர்ந்தே சென்று உரிய இடத்தில் அக் கழிவுகளை போட்டு விட்டு அருகிலிருந்த டீ கடையில் தண்ணீர் வாங்கி கைகளை கழுவி முகமன் கூறி பிரிந்தோம்.

அன்று நான் ஏதோ ஒரு பெரிய நன்மையைச் செய்த திருப்தியில் வீடு திரும்பினேன். இப்பொது அவர் என்னை எங்கு கண்டாலும் தம்பி சுகமாயிருக்கீங்களா? ன்னு விசாரிப்பார்.

குப்பை விஷயத்தில் நம் மக்களுக்கு விப்புணர்வும், இறையச்சமும் வராத வரையில் குப்பைகள் மண்டிக்கிடப்பது வீதியோரங்களில் மட்டுமல்ல அவர்களின் மனதிலும் தான்! தூய்மையான மார்க்கம்! தூய்மையை அலட்சியம் செய்யும் மக்கள்! சொல்லிப் பார்ப்போம் திருந்துவார்கள். இன்ஷா அல்லாஹ்...!

-ராபியா மணாளன்.