IP: 117.*.*.* India

பொதுவாக மேடையில் பேசுவோர் உரத்த குரலில் பேசுவது வழக்கம். ஒலி வாங்கி இல்லாத காலத்திற்கு அது சரி. தற்காலத்தில் - அருகிலிருப்போர் மட்டுமே கேட்குமளவுக்கு பேசப்படும் பேச்சையும் ஒலி வாங்கிகள் தெள்ளத் தெளிவாக ஒலியைப் பெருக்கி அளிக்கிறது.

இந்த உண்மையைத் தெரியாமல் இன்றும் பல பேச்சாளர்கள் (அனைவருக்கும் விளங்க வேண்டும் என்பதற்காக) உரத்த குரலில் பேசுவர். இதனால் அவர்களின் சக்தி விரயமாக்கப்பட்டு, சொல்ல வந்த தகவலை - அது முழுமை பெறாத நிலையில் சொல்லி முடித்துவிடுகின்றனர்.

இப்பேர்பட்ட பேச்சாளர்களுக்கிடையில், நமதூரில் ஒரு சில மார்க்க அறிஞர்கள், அழகு தமிழில் - அச்சர சுத்தமாக - மெல்லிய குரலில் - தேவையான ஏற்ற இறக்கங்களுடன் பேசுவதைப் பார்க்கும்போது யாருக்குத்தான் அதைக் கேட்க ஆர்வம் வராது?

அப்படி இன்று பேசும் ஆலிம்கள் அனைவருக்கும் இந்த விஷயத்தில் குருவாகத் திகழ்ந்தவர்கள்தான் கண்ணியத்திற்குரிய உஸ்தாத் கலந்தர் மஸ்தான் ரஹ்மானீ ஹஸ்ரத் அவர்கள்.

அமைதியான குரலில், எந்த ஆர்ப்பாட்டமுமின்றி - தெள்ளத் தெளிவாக உரையாற்றும் அவர்களின் பாங்கு, முஸ்லிமல்லாத மக்களையும் கவரச் செய்ததை கண்ணாரக் கண்டுள்ளேன்...

ஹஸ்ரத் அவர்கள் மஜ்லிஸுல் புகாரிஷ் ஷரீஃபில் உரையாற்றவுள்ள செய்தி கிடைத்துவிட்டால் போதும்! அனைத்து வேலைகளையும் ஒதுக்கி வைத்துவிட்டு சென்றுவிடுவேன்...

கொள்கை ரீதியாக மாறுபட்ட கருத்துக்கள் இரு புறங்களிலும் நிலவி வரும் இக்காலையில், ஒருவரையொருவர் குற்றங்கண்டு - குறை சொல்லி - “நீயா, நானா?” போட்டி போடும் மார்க்க அறிஞர்கள் - பேச்சாளர்களுக்கிடையில், மாற்றுக் கருத்துடையோரும் செவிதாழ்த்திக் கேட்கும் வண்ணம் தன் கருத்தை அவர்கள் சொல்லும் விதம் - மேடைப் பேச்சாளர்கள் அனைவருக்கும் ஒரு சிறந்த பாடப்புத்தகம்.

இன்று அவர்கள் நம்முடன் இல்லை. ஆனால் அவர்களால் உருவாக்கப்பட்ட நூற்றுக்கணக்கான ஆலிம்கள் உள்ளனர். சமுதாய நலன் நாடி, கொள்கை கோட்பாடுகளை விளக்க வேண்டிய இடங்களில் - யாருக்காகவும், எதற்காகவும் விட்டுக்கொடுக்காமலும், பொதுவான நகர்நல - சமுதாய நல - சமூக நல காரியங்களில் குறைந்தபட்ச செயல்திட்டத்தின் அடிப்படையில் இணக்கத்துடனும், பெருந்தன்மையுடனும் செயல்பட்டு, மறைந்த ஹஸ்ரத் அவர்களுக்கும் அதன் நற்கூலிகளில் பங்கு கிடைக்க காரணமாக இருப்பது அவசியம்.

இதை என்னை விட வயதில் பெரியோருக்கு பணிவான வேண்டுகோளாகவும், என் வயதையொத்தோருக்கும், எனக்கு இளையோருக்கும் அன்பான ஆலோசனையாகவும் முன்வைக்கிறேன்.

பரிசுத்த அல்லாஹ், மர்ஹூம் அவர்களின் மண்ணறையை சுவனப் பூஞ்சோலையாக்கி வைத்து, அவர்களின் மறுமை வாழ்வை ஒளிமயமாக்கி, அவர்களையும், நம்மையும் ஜன்னத்துல் ஃபிர்தவ்ஸ் எனும் உயர் சுவனத்தில் இறைத்தூதர்கள், உண்மையாளர்கள், உயிர்த்தியாகிகள், நல்லோர் அனைவரோடும் சேர்த்தருள்வானாக...

ஹஸ்ரத் அவர்களின் பிரிவால் துயருற்றிருக்கும் அனைவருக்கும் அல்லாஹ் அழகிய பொறுமையைத் தந்தருள்வானாக - அஸ்ஸலாமு அலைக்கும் வரஹ்மத்துல்லாஹி வபரக்காதுஹ்.