IP: 117.*.*.* India

20 வயதில் 60 வயது விவேகம் 60 வயதில் 20 வயது வேகம் எனபது பொது செயலாளர் சகோதரர் அபூபக்கர் அவர்களுக்கும் பொருந்தும்போல் தெரிகிறது. பேச்சாளரின் பேச்சின் போக்கை பார்த்தே அவருக்கு முத்திரை குத்தும் பேராற்றல் படைத்தவர்கள் நமதூர் மக்கள்.

அபூபக்கர் அவர்கள் எடுத்துக்கொண்ட தலைப்பில் பேசுவதற்கு ஒரு அசாதாரண துணிச்சல் வேண்டும். பச்சிளம் பிறைக்கொடியின் கீழ் நின்று, முனீருல் மில்லத் அவர்களின் தலைமையின் வழி நின்று பிறைமேடை நாயகன் தமிழ் தென்றல் அப்துர் ரஹ்மான் அவர்கள் அருகில் நின்று, கவ்மின் காவலர் காயிதே மில்லத் பாரம்பரியத்தின் கட்டுகோப்புக்குள் தன்னை ஆட்படுத்திக்கொண்டு மக்களின் முன் நின்று இந்த மண்ணின் மைந்தன் பேச ஆரம்பித்த போது கூட்டத்தை கட்டிப்போட்டு தன் உள்ளக் கிடக்கைகளை கொட்டி தீர்த்த போது மக்கள் அவர் பேச்சை உன்னிப்பாக கவனித்தார்கள்.

எல் கே எம் கே டி காலம் அல்ல, அதற்கு முன்னதாகவே ஷியா சன்னி, தரீக்காக்கள் அரசியல் கட்சிகள் என்று ஆரம்பித்து இப்போது அகீதாவரை நாம் பிரிந்தே நின்று பழக்கப்பட்டவர்கள். வேற்றுமைதான் நமது பலமும் பலவீனமும். UNITY IN DIVERSITY அது இந்த நாட்டின் பழக்க தோஷம்.

நமதூரில் இணைய தளங்கள் தங்கள் தலைவாசல்களை திறந்து வெளியே வந்து நகரமன்றத்தின் ஜன்னல்களை திறந்து விட்டபோது அங்கிருந்து வெளியே வீசிய துர்நாற்றம் நம்மை திகைக்க வைத்தது. சட்டமன்றமும் பாராளுமன்றமும் சாக்கடைகளாக மீன் சந்தைகளாக மாறி விட்டதை ரசித்தவர்கள் நமது நகர் மன்றமும் அந்த நிலைக்கு தரம் தாழ்ந்து விட்டதை அவர்கள் வெளிச்சம்போட்டு காட்டியபோது நடு நிலையாளர்கள் அரண்டு விட்டார்கள்.

தேர்தல் தோல்வியால் துவண்டு விட்ட ஐக்கிய பேரவை தன் பொது நல சேவைக்கு சலாம் கூறி விடைபெற்று விட்டதா வெற்றி பெற்றவர்கள் வெறி கொண்டு தங்களை கேள்வி கேட்க ஆள் இல்லை என்று ஆட்டம்போடுகிரார்களா அல்லது ஆபிதா அணி அக்பர்ஷா அணி என்று தங்களை வேறுபடுத்திக் கொண்டு இந்த ஊரின் பெயருக்கு ஊறு விளைவிக்கிறார்களா என்ற கேள்வி எல்லோர் மனதிலும் எழ ஆரம்பித்தது.

" பெரியாரை விழித்தலும் இலமே சிறியோரை இகழ்தல் அதனினும் இலமே" என்று சங்க தமிழ் கூறுகிறது. ஆஹா என்று பெரியவர்களை புகழ்வதும் ஓஹோ இவன்தானா என்று சிறியவர்களை இளைஞர்களை இகழ்வதும் இந்த இழி நிலைக்கு ஒரு காரணம் என்ற உண்மை உறைத்தபோது அவற்றை சமன் செய்து, சீர் செய்ய யாராவது முயற்சி எடுக்க மாட்டார்களா என்று ஏங்கி கொண்டிருந்த நல்ல உள்ளங்களுக்கு அபூபக்கர் ஒரு அருமருந்தாக களம் இறங்கி இருக்கிறார். அல்ஹம்து லில்லாஹ். காய்தல் உவத்தல் இன்றி நீங்கள் எடுத்து வைத்த கருத்துக்கள் எல்லோரையும் சிந்திக்க வைத்துள்ளது. மாற்றங்கள் ஒன்றுதான் மாறாதது உங்கள் முயற்சிகளுக்கு அல்லாஹ் துணை நிற்பான்.

நான் முஸ்லிம் லீக் என்ற கட்சிக்கு அப்பால்பட்டு முஸ்லிம் என்ற உணர்வில் இதை பதிவு செய்கிறேன். ஐந்து விரல்களும் ஒரே அளவாக இருப்பதில்லை. அப்படி இருக்க வேண்டும் என்ற ஒரு நியதியும் இல்லை. அடிக்கும்போதும் அணைக்கும்போதும் அவை ஒன்று பட்டே செயல்படுகின்றன உணவருந்தும்போதும் அவை தங்களை அறியாமலே இணைந்து கொள்கின்றன.

எனவே இங்கு கட்சி மாச்சரியங்கள் பெரியவர் சிறியவர் என்ற பாகுபாடுகள் இல்லாமல் எல்லா தரப்பினரையும் அழைத்து பேசுங்கள். ஒவ்வொருவருக்கும் ஒரு மனக்குறை. அதில் நியாயங்கள் அத்து மீறல்கள் அதீத எதிர்பார்ப்புக்கள் எண்ணில்லா ஏமாற்றங்கள் எல்லாம் வெளியாகும். விட்டுக் கொடுக்கும் மனப்பாங்கு, தட்டிக்கொடுக்கும் பெருந்தன்மை ஜீரணிக்கும் உளப்பாங்கு எல்லாம் இருந்தால் ஒற்றுமையின் தூரம் வெற்றியின் வெளிச்சம் தொட்டு விடும் தூரம்தான்.

அல்லாஹ் உங்களுக்கு நீடித்த ஆயுளையும் குறைவற்ற செல்வத்தையும் செல்வாக்கையும் ஊருக்காக உழைக்கும் நல்ல எண்ணங்களையும் நிறைவாக தந்தருள்வானாக. பிறைக் கொடியின் கீழ் ஒன்று படுங்கள் என்று நீங்கள் சொல்லும் வேளை அதை விட ஒற்றுமையின் கொடியின் கீழ் ஒன்றுபட எல்லோரையும் அழையுங்கள். ஊர் வாழ்ந்தால் நாம் வாழ்வோம் நாம் வாழ்ந்தால் குடிகள் வாழும் நீங்கள் சார்ந்துள்ள கொடியும் வாழும் ஏற்றம் பெரும். வஸ்ஸலாம்.