IP: 117.*.*.* India

ஒரு மனோரஞ்சிதமான காட்சி. நேற்று தஞ்சை மக்கள் வெள்ளத்தில் நீந்தி வந்த புரட்சி தலைவியின் மணி மகுடத்தில் இன்னொரு வைரம்.

வரவேற்புரை ஆற்றிய நகரமன்ற தலைவி அவர்கள் வேர்களை நினைக்கும் விழுதுகளாக இருந்து.... நமதூருக்கு நிலங்களையும் நலன்களையும் கைம்மாறு எதிர்பாராமல் அள்ளிக் கொடுத்த வள்ளல்களின் பெயரை பட்டியலிட்டபோது நான் கொஞ்சம் அசந்து தான் போனேன். நகரமன்ற தலைவி மிக நேர்த்தியாக இந்த ஊருக்கு சேவை செய்த முன்னவர்களையும் இப்போது வாழும் வள்ளல்களையும் நினைவு கூர்ந்து நன்றி தெரிவித்த பாங்கு, அவர்களின் வரவேற்புரைக்கு மகுடம் வைத்தது.

மேடையில் வீற்றிருந்தவர்களையும் சுற்றி இருந்தவர்களையும் பார்த்தபோது கண்கள் பனித்தன. இவர்களா ஒருவரை ஒருவர் சாடிக் கொண்டும் கருத்துக்களால் மோதிக் கொண்டும் இருக்கிறார்கள். நினைத்து பார்த்த போது, "ஒவ்வொரு நாளும் புதிதாய் பிறப்போம்" என்று சொல்வார்களே அந்த வசனம் நினைவுக்கு வந்தது. நாம் இரவு தூங்கபோகும்போது நபிகள் நாயகம் நமக்கு கற்று தந்த து ஆ எனது நினைவுக்கு வந்தது.

"அல்லாஹும்ம பிஸ்மிக்க அமூத்து வ அஹ்யா" அல்லாஹ்வின் பெயரால் நேற்றிரவு நான் இறந்தேன். இன்று மீண்டும் அவன் அருளால் உயிர்பெற்று எழுந்தேன். எவ்வளவு யதார்த்தமானது. எங்கள் பகைவர் எங்கோ மறைந்தார் இங்குள்ள காயலர்கள் ஒன்றாதல் கண்டே....

இந்த ஒற்றுமை கீதம் தொடராதா, நம் கனவுகள் நனவுகள் ஆகாதா என்ற பெருமூச்சு எல்லோர் உள்ளத்திலிருந்தும் சுவாசமாக வெளி வந்திருக்க வேண்டும்...இன்னும் பதினெட்டே மாதங்களில் ஒரு நீண்ட நாள் ஆசை நம்மிடம் நம் முன்னோர்கள் விட்டு சென்ற பொறுப்பு நிறைவேறும் என்று வாக்களித்திருக்கிறார்கள் ஆட்சி தலைவர் ஆஷிஷ் குமார் அவர்களும் அமைச்சர் செல்லப்பாண்டியன் அவர்களும்.

தமிழகத்தை முதன்மை மாநிலமாக மாற்றிக் காட்ட சபதம் எடுத்துள்ள தமிழக முதல்வர் அவர்களையும் நகர்மன்றங்களில் முதன்மை நகர்மன்றமாக நமதூரை மாற்றிக் காட்ட சபதம் எடுத்துள்ள நமதூர் முதல்வர் அவர்களையும் வாழ்த்துகிறேன்.

நீங்கள் எடுக்கும் நல்ல முயற்சிகளுக்கு இந்த ஊர் மக்கள் உங்களுக்கு தோள் கொடுப்பார்கள். நீங்கள் எடுத்து வைக்கும் எட்டுக்கள் ஒவ்வொன்றும் எல்லா உறுப்பினர்களின் ஏகோபித்த அங்கீகாரத்துடன் அரவணைப்புடன் இணையுமானால், உங்கள் நினைவு வீண் போகாது.

உங்கள் ஆட்சி காலம் ஒரு வேதனை காலம் என்றில்லாமல் சோதனைகளை தாண்டிய சாதனை காலமாக காயல்பட்டினம் சரித்திரத்தில் ஒரு பொற்காலமாக மிளிரும் என்பதில் சந்தேகமில்லை

பல சிக்கல்களின் தீர்வு ஒரு சிறிய விட்டுக் கொடுத்தலில் இருக்கிறது, நெருங்கி வருவதில் இருக்கிறது, ஒரு சிறிய மன்னிப்பில் இருக்கிறது. இதை நினைத்து வாழ்ந்தால் ஊரும் வீடும் அழகாகிறது. வாழ்த்துக்கள்..