IP: 117.*.*.* India

நடந்தாய் வாழி காவேரி. வெற்றி திருமகளின் வீர வரலாற்றில் மற்றுமொரு வைர மகுடம். வெற்றி திருமகள் என்று சொன்னால் சிலருக்கு புரட்சி தலைவி என்ற நினைவு வரலாம் சிலருக்கு நமதூர் தலைவி நினைவு வரலாம். வானத்தில் பறப்பதும் பூமியில் நடப்பதும் அவரவர் எண்ணங்களே. எண்ணம்போல் வாழ்வு. இந்த சிறப்பான விழாவில் நான் பார்வையாளர்களில் ஒருவனாக கலந்து கொள்ளும் வாய்ப்பு கிடைத்தது.

23 கொடை வள்ளல்களின் பெயரை ஞாபகப்படுத்திய வரலாற்று சிறப்பு மிக்க இந்த நிகழ்ச்சி மனதில் நெகிழ்ச்சியை ஏற்படுத்தியது.

"மூன்றடி மண் கேட்டான் வாமனன் உலகிலே,
மூன்றாவது அடியை அவன் வைத்ததோ
அந்த நிலம் கொடுத்து உதவியவனின் தலையிலே"

என்று ஒன்று புராண கதை சொல்வார்கள். கொடை வள்ளல்களின் பட்டியல் நீண்டு கொண்டே செல்கிறது. அவர்களில் எத்தனை பேரை நாம் இன்று நினைவில் வைத்திருக்கிறோம். அவர்களுக்கு நாம் என்ன கைம்மாறு செய்தோம்.

அவர்களின் ஒவ்வொருவரின் பெயரையும் நமதூரின் ஒவ்வொரு தெருவுக்கும் சூட்டி நாம் மகிழ வேண்டும் என்ற பேரவா எனக்குள் எழுந்தது, இந்த நகர்மன்றத்தில் அப்படி ஒரு தீர்மானம் நிறைவேற்றி மறைந்து வாழும் வள்ளல்களுக்கு நாம் நன்றிக் கடன் செலுத்தவேண்டும். அவர்களின் வாரிசுகள் மகிழ்ச்சி அடைவார்கள்.

இந்த காலத்தில் அப்படி ஒரு நில சுவான்தார்கள் இருந்தால் அவற்றை அடுத்தவர்கள் பெயருக்கு பட்டா போட்டு கொடுத்திருப்பார்கள் அல்லது பிளாட் போட்டு விலை நிலங்களாக மாற்றி இருப்பார்கள். இப்போதும் கூட சில விதிவிலக்குகள் உண்டு. ஆனால் விதிவிலக்குகள் வழிகாட்டி ஆக முடியாது.

இன்னும் பதினெட்டு மாதங்களில் நமது வீடெங்கும் தினந்தோறும் குடிநீர் ஒலித்து ஓடவிருக்கிறது என்ற செய்தி காதுகளில் தேனாக பாய்கிறது. அது மதம், ஜாதி, கட்சி, தெரு முஹல்லா என்ற அடையாளங்களை தாண்டி அல்லாஹ்வின் அருட்கொடை எல்லோருக்கும் சொந்தம் என்று வரவிருக்கிறது. வானும் காற்றும் நீரும் நெருப்பும் பொதுவில் இருக்குது, மனிதன் காலில் பட்ட பூமி மட்டும் பிரிந்து கிடக்குது ..பிரித்து வைத்து பார்பதெல்லாம் மனித இதயமே, பிரிவு மாறி உறவு வந்தால் இன்பம் பிறக்குமே.. என்று ஒரு புது கவிதை சொல்கிறது.

மேடையிலே அமர்ந்திருந்த பெரியவர்கள், சுற்றியிருந்த நகரமன்ற உறுப்பினர்கள் ஊரின் பல்வேறு சமூக ஆர்வலர்கள் எல்லோரையும் பார்த்தபோது, எல்லா நாளும் இந்த நாளாக, இனிய நாளாக இருக்காதா, எல்லோரும் ஒன்றுபட்டு வளமுடனும் நலமுடனும் வாழும் நாளாக இருக்காதா வேற்றுமையில் ஒற்றுமை காணும் நாளாக மலராதா என்ற பெரு மூச்சு சுவாசமாக வெளிவந்ததை கூடி இருந்தவர்கள் முகத்தில் பார்க்க முடிந்தது, அகத்தின் அழகு முகத்தில் தெரியும்தானே.

அப்படி ஒரு சூழல் கனிந்து வர, இந்த நிகழ்ச்சி ஒரு முன்னோடியாக அமைய எல்லாம் வல்ல அல்லாஹ் நல்லருள் புரிவானாக.