IP: 117.*.*.* India

கிழக்கில் அலையாடும் வங்கக்கடல் மேற்கில் இடம் பெயர்ந்ததோ? இல்லை! அக்கடல் நாணும் அளவிற்கு மக்கள் வெள்ளம் காயலில் கரைபுரண்டோடியதோ? எனும் விதத்தில் இஜ்திமா எனும் ஓர் மௌனப்புரட்சி ஓசையின்றி காயல்பட்டினத்தில் இரு தினங்கள் அரங்கேறி முடிந்தது ஆச்சரியத்திற்குரியதே!

வீதியெங்கும் மக்கள் கூட்டம். அவர்தம் காலடி சப்தம் தவிர வேறேதும் கேட்டறியேன். எங்கிருந்து? எப்படி? எவர் அழைப்பின் பெயரில்? இப்படி ஒரு மகா சங்கமம் பொங்கி வழிந்தோடியது? தீன் எனும் பெயரில் வேடிக்கை வினோதங்கள், வீதியெங்கும் தோரணம், கண்ணொளி காட்சி, கரக்கோஷம், வானவேடிக்கை, யானைகள் அணிவகுப்பு என மக்களை கவர மாரடிக்கும் இவ்வுலகில் மௌனமாக மார்க்கப்பணிகளுக்கு மார்க்கம் செய்து தந்த பெருமை அந்த அமைப்பினருக்கே சாரும்!

என் வாழ்நாளில் நமதூரில் இப்படி ஒரு மக்கள் கூட்டம் திரண்டதாக நினைவில்லை! காவல்துறை, உளவுத்துறை, மற்றும் ஊடத்துறையினர் மூக்கில் விரல் வைத்து வியக்கும் அளவிற்கு கட்டுக்கோப்புடன் கன்னியமாக இப்படியொரு நிகழ்ச்சியை செம்மையாக நடத்திக் காட்டி இஸ்லாமியர்கள் மீது தினிக்கப்பட்ட அல்லது தெளிக்கப்பட்ட தீவிரவாத சாயத்தை வெளுத்து சமாதானத்தின் வெள்ளை வெளேரெனும் தூய்மை நிறத்தைக் காட்டியுள்ளனர்.

கடைகள் மற்றும் வியாபாரிகளுக்கும் கனிசமான வியாபாரம். காலை ஆறு மணிக்கெல்லாம் வீதிகள் முழுவதும் மக்கள் வெள்ளம். அவர்கள் தம் காலைக்கடனை கழிக்க சில பள்ளி நிவாகத்தினர் தாம் சார்ந்த கொள்கையைக்கூட சற்றே தளர்த்தி சன்மார்க்க நெறிகளை ஏற்றுக்கொண்ட ஒரேக் கூட்டம் எனும் கண்ணோட்டத்தில் தமது மஹல்லாவின் பள்ளி வாயில்களை மனமுவந்து திறந்து வைத்திருந்தது ஆச்சரியமே!

செய்தியில் குறிப்பிட்டுள்ளதைப் போன்று சுவரொட்டி, துண்டு பிரசுரம், வானளாவிய கட் அவுட்டுக்கள், வசூல் வேட்டை மற்றும் உண்டியல் இப்படி எதுவுமின்றி பல்லாயிரக்கணக்கான மக்களை ஒன்று திரட்டி இப்படி ஒரு உருப்படியான கூட்டத்தை தங்களால் நடத்திக்காட்ட இயலும் என்பதை இந்த தப்லீக் ஜமாஅத்தினர் உள்ளங்கை நெல்லிக்கனிபோல் நிரூபித்துக்காட்டியுள்ளனர். அல்ஹம்ந்துலில்லாஹ்! வாழ்த்துக்கள்...! பாராட்டுக்கள்...!

-ஹிஜாஸ் மைந்தன்.