IP: 92.*.*.* United Arab Emirates

திலகர் நினைவு சுயராஜ்ய நிதிக்காக ஒரு கோடி ரூபாய்க்கான காசோலையை காந்திஜியிடம் வழங்கிய பம்பாயின் மிகப் பெரிய பஞ்சாலையின் அதிபரான உமர் சுப்ஹானியை நினைவுகூர்வோம்.

1905ல் சுதேசிக் கப்பல் கம்பெனிக்காக பங்குதாரர்களைச் சேர்க்க வந்த வ.உ.சி., சுப்பிரமண்ய சிவா, சர்க்கரை செட்டியா ஆகியோரைத் தனது இல்லத்தில் பல நாட்கள் தங்க வைத்து உபசரித்த, சுதேசிக் கப்பல் கம்பெனி பங்குகளைத் தான் வாங்கியதோடு உத்தமபாளையம், கம்பம், சுற்றுவட்டாரங்களில் வாழ்ந்த தனவந்தர்கள் பலரையும் பங்குதாரர்களாக்கிய, 1907ல் சூரத்தில் நடைபெற்ற காங்கிரஸ் மாநாட்டிற்கு வ.உ.சி., சுப்பிரமண்ய சிவா, சர்க்கரைச் செட்டியார் ஆகியோரைத் தன் சொந்ச் செலவில் அழைத்துச் சென்ற உ.ம.சே முஹைதீன் பிள்ளை சாஹிபை நினைவு கூர்வோம்.

1908ல் வ.உ.சி. கைது செய்யப்பட்டதைத் தொடர்ந்து நெல்லையில் மிகப் பெரிய எழுச்சிப் போராட்டம் நடைபெற்றபொழுது, அந்த மறியல் போராட்டத்தில் பங்கேற்று ஏகாதிபத்தியத்தின் துப்பாக்கித் தோட்டாக்களுக்கு பலியான முதல் நபர் முஹம்மது யாஸீன் என்ற இளைஞரை நினைவுகூர்வோம்.

இந்திய சுதேசி வர்க்ககத்தின் இலட்சியக் கனவான 'சுதேசி ஸ்டீம் நேவிகேஷன்' என்ற சுதேசிக் கப்பல் கம்பெனியை வ.உ.சிதம்பரம் பிள்ளை 16.10.1906ல் நிறுவி, அதற்கு பங்குதாரர்களைச் சேர்க்கும் முயற்சியில் அவர் இறங்கியபோது அவருக்கு நம்பிக்கைக் கரம் நீட்டி, ரூ. இரண்டு லட்சம் மதிப்புள்ள 8000 பங்குகளை தனது கம்பெனி சார்பாக வாங்கிய ஹாஜி ஏ.ஆர். பக்கீர் முகம்மது ராவுத்தர் சேட்டை நினைவு கூர்வோம்.

“காந்திஜிக்குள் இந்த தேசம் இருக்கிறது. ஆனால் அந்த காந்தியோ மௌலானா முஹம்மது அலீயின் சட்டைப் பைக்குள் இருக்கிறார்!” என்று ஈ.வெ.ரா. பெரியார் குறிப்பிட்ட, அந்த அளவிற்கு தனது தேசிய நடவடிக்கைகளால் மிகப் பெரும் தாக்கத்தை இந்த மண்ணில் ஏற்படுத்திய மௌலானா முஹம்மது அலீயை நினைவுகூர்வோம்.

காந்தியை தேசப்பிதாவாக உருவாக்க விதை விதைத்த, குஜராத்தில் போர்பந்தரில் பிறந்து பல நாடுகளுக்கும் சென்று பெயர் சொல்லும் அளவுக்கு கடல் வாணிபத்தில் சிறந்து விளங்கிய, 1865ம் ஆண்டு 'தாதா அப்துல்லாஹ் கம்பெனி' என்ற பெயரில் 50 சரக்குக் கப்பல்களையும், 4 பயணிகள் கப்பல்களையும் கொண்ட மிகப் பெரிய நிறுவனத்தை நிறுவிய அப்துல்லாஹ் ஆதம் ஜவேரி, அப்துல் கரீம் ஆதம் ஜவேரி ஆகிய இரு ஐவேரி சகோதரர்களை நினைவுகூர்வோம்.

இன்னும் யாராலும் பேசப்படாமலும், எழுதப்படாமலும் மறைக்கப்பட்டு, மறக்கப்பட்டு கிடக்கின்ற எண்ணிலடங்கா சுதந்திரப் போராளிகளை இந்நாளில் நினைவுகூர்வோம்.