IP: 117.*.*.* India

நேற்றிரவே நானும், எனது நண்பர் எழுத்தாளர் சாளை பஷீரும், மெகா நூஹு காக்காவும் ALS மாமா (காயல் இப்னு அப்பாஸ் எனும் லெப்பை சாஹிப்) அவர்களின் வீட்டிற்கு போவது என முடிவு செய்து கொண்டோம். சொன்ன நேரத்திற்கு செல்ல இயலவில்லை எனினும் மாமா தெருவில் எங்கள் வருகைக்காக காத்திருந்தார். முகமன் கூறி வீட்டிற்குள் சென்றோம். பழைய வீடு சுவரெங்கும் சித்திரங்கள், சொல் வாக்கியங்கள், அறிவுரைகள் இப்படி ஒரு அருங்காட்சியகத்திற்குள் நுழைந்த உணர்வு.

ALS மாமா அவர்களின் நீண்டகால சேமிப்புக்களான அரிய வகை நூல்கள், புத்தகங்கள், உருவமற்ற ஓவியங்கள், புகைப்படத் தொகுப்புக்கள் இப்படி காணக்கிடைத்த நாங்கள் கடந்தகாலத்திற்கே சஞ்சரித்து விட்டோம். அந்தகாலத்திலேயே அருமையான ஒரு புகைப்படக் கலைஞனான ALS மாமாவை பார்த்து பிரம்மித்துப் போனோம்.

இந்த முதிர்வயதிலும் தளராமல் இன்றைய இணையதளங்களில் தொடர்ந்து எழுதிவரும் அவர்களது எழுத்தாற்றல் போற்றுதலுக்குரியதே!

பல வருடங்களுக்கு முன் அவர் வெளியிட்டு வந்த பாலம் எனும் கையெழுத்துப் பத்திரிக்கை பல்வேறு செய்திகளையும் சமுதாய சிந்தனைக்குரிய கார்ட்டூன்களையும் உள்ளடக்கியதாதவே இருந்தது. தனக்கென ஒரு தனித்தன்மையை வகுத்துக்கொண்டு அதை இம்மியளவும் பிசகாமல் வாழும் இது போன்ற பெரியவர்கள் சிலர் மட்டுமே!

அனைத்து துறைகளிலும் அத்துப்பிடியான ALS மாமா அவர்கள் ஒரு பல்கலைக்கழகமாக நம்மோடு வாழ்ந்து வரும் சிறந்த மனிதர். அந்த மகா புருஷன் வாழும் காலத்தில் நாமும் வாழ்வதை எண்ணி பெருமைப்படுகின்றேன்.

எல்லாம் வல்ல இறைவன் அவரது ஆயுளை நீடித்து வைத்து சரீர சுகத்தையும் வழங்கியருவானாக...ஆமீன்.

-ராபியா மணாளன்.