IP: 117.*.*.* India

இப்போதாவது தமிழக அரசுக்கும், மின்வாரிய அதிகாரிகளுக்கும் தமிழக மக்கள் (சென்னையை தவிர) மீது கொஞ்சம் கரிசனம் வந்ததே என்று வேண்டுமானால் ஆறுதல்படலாம். ஆதம் சுல்தான் காக்கா அவர்கள் பதிந்தது போல், மத்திய அரசு, எதிர்கட்சிகள் ஆளும் மாநிலங்களை மட்டுமே காழ்புணர்சியுடன் பார்க்கவில்லை. இந்தியாவில் எல்லா மாநிலங்களிலும்(ஓரிரு மாநிலங்கள் தவிர) மின்பற்றாக்குறை மாநிலங்கள்தான். காங்கிரஸ் ஆளும், தலைநகர் தில்லி கூட இதற்கு விதிவிலக்கு இல்லை.

சென்னை, தமிழகத்தின் தலைநகராக இருக்கலாம். அதற்காக தமிழக மக்கள், நொந்து நூடுல்ஸ் ஆகி இருக்கும்போது, சென்னைவாசிகள் மட்டும், ஏசி அறையில் சந்தோசமாக இருக்கின்றனர். தற்போதுதான் சென்னையில் 2 மணிநேர மின்வெட்டு, அதுவும் காலை 8 மணி முதல், மாலை 6 மணி வரை என்று அறிவித்துள்ளனர். ஆனால் பாவப்பட்ட நமக்கு, அதிகாலை 6 மணி முதல் இரவு 11 மணி வரை, 8-10 மணி நேர மின்வெட்டு. தமிழகத்துக்கும், சென்னையை போல், பகல் நேரங்களில், மின்வெட்டை வைத்துக் கொள்ளலாமே.

நம் திராவிட கட்சிகள், முன்பு ஒரு கோஷம் போடுவார்கள். "வடக்கு வாழ்கிறது. தெற்கு தேய்கிறது" என்று. இப்போ நாம்(சென்னையை தவிர) போடவேண்டிய கோஷம், "சென்னை வாழ்கிறது. தமிழகம் இருளில் மூழ்கி கிடக்கிறது"

அ.தி.மு.க. அனுதாபிகள் வேண்டுமானால், தங்களின் புரட்சித்தலைவி அம்மா அவர்கள் சொல்வதை அப்படியே கிளிப்பிள்ளை சொல்வது போல், அந்த காரணம், இந்த காரணம் என்று சொல்லலாம். நம் முதல்வர் அவர்கள், இனிமேலாவது மத்திய அரசை குறை சொல்லாமல், மின்உற்பத்தியை அதிகரிக்க நடவடிக்கை எடுக்க வேண்டும்.

- சாளை அப்துல் ரஸ்ஸாக்