IP: 117.*.*.* India

ஜனநாயகத்தில் வெற்றி தோல்வி என்பது ஒரு நாணயத்தின் இரு பக்கங்கள் போன்றது.பூவா தலையா போட்டால் தெரியும் நீயா நானா பார்த்து விடு, பூ விழுந்தால் நீ நெனைச்சபடி, தலை விழுந்தால் நான் ஜெயிச்சபடி...என்று வாழ்க்கையை விளையாட்டாக எடுத்துக் கொள்பவர்கள் நம்மில் எத்தனை பேர் இருக்கிறோம்.

தோல்வியை கண்டு துவண்டு விடுவதும் வெற்றியை கண்டு வெறி கொள்வதும் வாடிக்கை ஆகிவிட்டது. அந்த வகையில் காங்கிரஸ் தோல்வியை பற்றி சோனியா காந்தி, ஞானதேசிகன் ஆகியோர் கொடுத்துள்ள பேட்டி ஒரு சிறந்த ஜனநாயகவாதி பேசும் பேச்சு, தோல்விகளுக்கான காரணங்களை ஆராய்ந்து அதை சரி செய்வோம் என்று கூறியிருக்கிறார்கள்.

ஆனால் ஏற்காடு தொகுதியில் முதல்வர் பெற்றுள்ள இமாலய வெற்றியை, ஒரு தொண்ணூறு வயது நிரம்பிய முது பெரும் தலைவர் - வெற்றியின் உச்சிக்கு சென்றவர் - தோல்வியின் அதல பாதாளத்தில் வீழ்ந்தவர் - மீண்டும் பீனிக்ஸ் பறவை போல் உயிர்தெழுந்து இமயத்தை அடைந்தவர் -இப்படி மாறி வெற்றி தோல்விகளை பந்தாடியவர் -ஏற்க மறுக்கிறார்.

பணம் கொடுத்து வாங்கிய வெற்றி என்கிறார்.வாதத்துக்காக அதை ஏற்றுக் கொண்டாலும், அந்த சூட்சுமத்தை கற்றுக் கொடுத்த குருநாதர் - திருமங்கல திருமந்திரத்தை ஜபிக்க கற்றுக் கொடுத்த பிதாமகன் நீங்கள்தானே, கலைஞரே, தமிழின தலைவரே என்று மக்கள் உங்களை திருப்பி கேட்கிறார்களே, நீங்கள் என்ன சொல்ல போகிறீர்கள்.

உங்களுக்கும் காலம் வரும்...

இந்த நிலையும் மாறும்.......பொறுத்திருங்கள். உங்கள் ஓட்டு வங்கி நோட்டு வங்கியாக மாறினால் பரவா இல்லை, நோட்டா வங்கியாக மாறி விடாமல் பார்த்துக் கொள்ளுங்கள்.

"நீங்கள் கூடா நட்பு கேடாய் முடிந்தது" என்று சொன்னீர்களே, காங்கிரசயா,பாரதிய ஜனதாவையா அல்லது இதர உதிரி கட்சிகளையா? அப்படி சொல்லிவிட்டு அவர்கள் எல்லோரிடமும் கேவலம் இந்த இடை தேர்தலில் எனக்கு ஆதரவு தாருங்கள் என்று மடி பிச்சை கேட்டீர்களே, கடமை கண்ணியம் கட்டுப்பாடு காற்றில் பறந்ததா இல்லை மறப்போம் மன்னிப்போம் என்ற எண்ணம் விசுவரூபம் எடுத்ததா...ஒரு ஜனநாயகவாதியாக உங்களைப் பார்க்கும் எங்கள் சிந்தனைகளை சிதறடித்து விடாதீர்கள். மீண்டும் நீங்கள் சிறகடித்து பறக்கும் காலத்தை பார்க்க விரும்புகிறோம்.

உங்கள் உயிரினும் இனிய மேலான உடன்பிறப்பின் அன்பான வேண்டுகோளும் அபிலாஷையும். அண்ணா நாமம் வாழ்க.