IP: 219.*.*.* Hong Kong

விட்டுக்கொடுத்தோர் கெட்டுப்போனதில்லை...! இந்திய யூனியன் முஸ்லிம் லீக் கட்சிக்கு ஒதுக்கப்பட்ட மூன்று சீட்டில் ஒன்றை கூட்டணியில் பிணக்கு வந்து விடாமல்,இணக்கமான சூழ்நிலை உருவாக ஒரு சீட்டை விட்டுக்கொடுத்து கூட்டணி நிலை தொடர வழி வகுத்தது.

முஸ்லிம் லீக் ஒரு சீட் விட்டுக் கொடுத்ததற்கு, ஒரு துளி அளவு கூட திமுக காரணமில்லை என்பது வெளிச்சத்திற்கு வரும் முன்னே அக்கட்சியின் தொண்டர்கள் வெகுண்டெழுந்தார்கள். தலைமையின் அறிவிப்பு அதிர்ச்சிக்குள்ளாக்கியதை அதே வேகத்தில் இதற்கு முடிவு காண பல மாவட்டங்களிலிருந்தும் விடிய விடிய தலைமையகத்தை தொலைபேசியின் வாயிலாகவும், இ-மெயில்களின் வாயிலாகவும், திக்குமுக்காட வைத்தது ஒரு புறமிருந்தாலும், பலர் தலைமையகத்தை நோக்கி படையெடுக்க துவங்கினர்.

நிலமை விபரீதம் அடைவதை உணர்ந்து கொண்ட தலைமையும், தொண்டர்களின் நியாயமான உணர்வுகளுக்கு மதிப்பளிக்கும் வகையில் மாற்று வழிக்கான ஏற்பாட்டினை யோசிக்கத் துவங்கியது.

இதனை உளவுத்துறை மூலமாக எப்படியோ மோப்பம் பிடித்து திமுக தலைமை சுதாரிக்க, முஸ்லிம் லீக் தலைவர்களை அறிவாலயத்திற்கு வரும்படி அவசர அழைப்பு விடுத்து இன்ப அதிர்ச்சி கொடுத்துள்ளனர். தமிழகம் முழுவதும் முஸ்லிம்களுக்கு மத்தியில் இருக்கும் கொந்தளிப்பான சூழ்நிலையையும் உளவுத்துறை முதல்வரின் கவனத்திற்கு கொண்டு சென்றது.

இதை கவனமுடன் கையாள துணை முதல்வரும் களத்தில் இறங்கினார். திமுகவின் நம்பிக்கைக்குரிய தோழமை கட்சியாக இருக்கும் இந்திய யூனியன் முஸ்லிம் லீக் பிரச்சினையில் சிக்கி தவிப்பதை தவிர்க்க, திமுக தன் தரப்பிலிருந்து ஒரு சீட்டை விட்டுத் தருவதென்று முடிவு செய்துள்ளதாக தகவல்கள் தெரிவிக்கின்றன.

முஸ்லிம் லீக் இழந்த ஒரு தொகுதி மீண்டும் கிடைக்கப் போகும் செய்தியறிந்து அக்கட்சியினரும், முஸ்லிம் சமுதாயத்தினரும் அமைதி அடைய துவங்கியுள்ளனர். எல்லாவற்றையும் உறுதி படுத்தும் விதமாக நேற்று சென்னையில் நடைபெற்ற முஸ்லிம் லீக் கட்சியின் 64வது ஆண்டு நிறுவன தின பொதுக்கூட்டத்தில் பங்கேற்று பேசிய தலைவர்கள் தொல்.திருமா, ஜி.கே.மணி, அமைச்சர் துரைமுருகன் ஆகியோர் பேராசிரியர் காதர்மொய்தீன் உடைய விட்டுக்கொடுத்த மனப்பான்மையை வெகுவாக பாராட்டியதுடன், விட்டுக்கொடுத்தோர் கெட்டுப்போனதில்லை என்பதை சூசகமாக தெரிவித்தனர்.

கூட்டத்தில் பேசிய திருமாவளவன்: பேராசிரியர் காதர்மொய்தீன் செய்த இந்த தியாகம் இன்று இந்தியா முழுவதும் இந்திய யூனியன் முஸ்லிம் லீகைப் பற்றியே பேச வைத்திருக்கிறது என்று குறிப்பிட்டு அனைவர்களின் மனதிற்கும் மருந்திட்டார்.