IP: 89.*.*.* Saudi Arabia

திமுக முஸ்லிம்களுக்கு அதிகமாக செய்துள்ளதாக ஒரு சகோதரர் எழுதியுள்ளார். இங்கு கவனத்தில் கொள்ள வேண்டியது முஸ்லிம்களின் அரசியல் தனித்தன்மை. திமுக முஸ்லிம்களுக்கு அதிகமாக நன்மை செய்துள்ளது என்றால் நேரடியாக திமுகவே முஸ்லிம்களின் ஓட்டை வேட்டை ஆட வேண்டியதுதானே! எதற்காக முஸ்லிம் லீக்கிற்கு கொடுப்பது போல் கொடுத்து பின்பு சீட்டை புடுங்கி முஸ்லிம்களை அவமானப்படுத்த வேண்டும். இல்லையென்றால் முஸ்லிம் லீக்கை திமுகவின் சிறுபான்மை பிரிவாக அறிவிக்க வேண்டியது தானே?

முஸ்லிம்களின் அரசியல் தனித்தன்மையை காலங்காலமாக சிதைப்பது கலைஞர்தானே!. ஏன் முஸ்லிம் லீக்கிற்கு என்று ஒதுக்கிய சீட்டை புடுங்கி அவமானப்படுத்துவது இது முதல் முறை அல்லவே! அதுவும் உதயசூரியன் சின்னத்தில் போட்டியிட சம்மதித்த பிறகு. சென்ற சட்டமன்றத் தேர்தலிலும் 3 சீட்டு கொடுத்த பிறகு 1 சீட்டு அபகரிப்பு. சென்ற பாராளுமன்றத் தேர்தலில் 1 சீட்டு. முஸ்லிம் லீக் தலைவர் துணிச்சலாக ஏணி சின்னத்தில் நிற்போம் என்ற உடன், அதில் துரைமுருகன் தலையிட்டு அபுதாபியிலிருந்து சகோ. அப்துல் ரஹ்மானை தருவித்து உதயசூரியன் சின்னத்தில் போட்டியிட வைக்கப்பட்டார். முஸ்லிம் லீக் தலைவராலேயே ஒன்றும் செய்ய முடியாத அவல நிலையைதானே நாம் பார்த்தோம்.

எம்ஜிஆர், அதிமுக ஆரம்பித்த காலத்திலிருந்தே முஸ்லிம்கள் பரவலாக அக்கட்சியை எதிர்த்தே வாக்களித்தோம். அதிமுகவை ஆதரித்த பல சமுதாயத்தின் நிலையை எம்ஜிஆர் உயர்த்தி விட்டார். அதிமுகவை முஸ்லிம்கள் ஆதரித்து இருந்தால், நம் சமுதாயத்தையும் பல நிலைகளில் உயர்த்தி இருப்பார். இதுதானே யதார்த்தம்.

எம்ஜிஆர் நடிகர் ஆதலால் எதிர்க்க வேண்டும் என்று ஏதோ மார்க்க கடமை போல் எதிர்த்தோம். ஆனால் எம்ஜிஆரின் படங்களுக்கு திரைகதை எழுதிய கருணாநிதியை ஆதரித்தோம்.

சட்டசபையில் முஸ்லிம் தீவிரவாதிகள் என்ற சொல்லாடலை முதலில் பதிவு செய்தவரே கருணாநிதிதான் என்பதை யார்தான் மறக்க முடியும். கருணாநிதியின் ஆட்சியில்தான் கோவை கலவரமும் அதை தொடர்ந்து 19 முஸ்லிம்கள் அநியாயமாக எரித்தும் / சுட்டும் கொல்லப்பட்டார்கள். இதை யாராலும் மறுக்க முடியுமா? ஆனால் கருணாநிதி போலீஸாரை தட்டிக் கொடுத்தார்.

நமதூரில் எம்ஜிஆர் மீது கல் / செருப்பு வீசியபோதும், பெருந்தன்மையாக கல் வீசியவர்கள் காயலர்கள் அல்ல, வெளியுரிலிருந்து வந்தவர்கள் என்று பேசி, ஆவேசமாக இருந்த அவரின் ஆதரவாளர்களை கட்டுக்குள் கொண்டு வந்தார். இந்த பெருந்தன்மை கருணாநிதியிடம் உண்டா?

எம்ஜிஆர் உயிருடன் இருக்கும் வரை திமுகவால் ஆட்சியை கைப்பற்ற முடியவில்லை. அந்த கஷ்ட காலத்தில் முஸ்லிம்கள் திமுகவிற்கு முட்டுக் கொடுத்தார்கள். ஆனால் முஸ்லிம்கள் குஜராத்தில் கொன்றொழிக்கப்படும் போது கருணாநிதி முஸ்லிம்களின் எதிரியான பாஜகவின் ஆட்சிக்கு முட்டுக் கொடுத்து கொண்டு இருந்தார். இப்படி பல துரோகங்களை எழுதிக் கொண்டே போகலாம்.

திமுகதான் முஸ்லிம்களின் அரசியல் தனித்தன்மையை முடக்குகிறது என்பதை முஸ்லிம்கள் விளங்கியே வைத்துள்ளார்கள். இன்ஷா அல்லாஹ் திமுக முஸ்லிம்களும் கூடிய சீக்கிரம் தெளிவடைவார்கள் என்பது திண்ணம்.