IP: 61.*.*.* India

எமது குருவித்துறைப் பள்ளி மஹல்லாவிற்குட்பட்ட அப்பா பள்ளித் தெரு, மரைக்கார் பள்ளித் தெரு, தீவுத்தெரு, சொளுக்கார் தெரு, கொச்சியார் தெரு குடும்பத்தினருக்கு நல்ல ஆலோசகராகவும், பிரச்சினைகளைத் தீர்த்து வைக்கும் அருமருந்தாகவும் திகழ்ந்தவர்கள்...

சொளுக்கார் தெரு அ.க. பெண்கள் தைக்காவைக் கட்டிக்காத்து வந்த புனிதர்...

மஜ்லிஸுல் புகாரிஷ் ஷரீஃபின் பெண்கள் பகுதி வைபவக் கமிட்டி தலைவராக இவர்கள் ஆற்றிய பணி வெறும் சொற்களால் விவரிக்க முடியாதது. அங்கிருந்த அனைவருக்கும் முன்மாதிரியாகத் திகழ்ந்தவர்கள்.

தன் தேனினுமினிய வாய்மொழியால் நன்கொடையாளர்கள் மனதில் இடம் பிடித்து - நல்ல காரியங்களுக்காக பல ஆண்கள் சேர்ந்து திரட்டும் நன்கொடைத் தொகையளவை தனியொரு பெண்ணாக திரட்டிடும் சக்தியை இந்த சீதேவிக்கு அல்லாஹ் அருளியிருந்தான்.

நானறிய - தன் வாழ்நாளில் கோபப்பட்டோ, தகாத சொற்களை உதிர்த்தோ பார்த்ததேயில்லை. இதே கருத்தை - ஜனாஸாவில் பங்கேற்ற பலரும் கூற என் காதாரக் கேட்டேன்.

தனிப்பட்ட முறையில் எங்கள் குடும்பத்திற்கு சிறந்த ஆலோசகர். நல்ல வழிகாட்டி. கிட்டத்தட்ட எங்கள் குடும்பத்தின் மூத்த உறுப்பினர்.

அவர்களது இல்லம் இருக்கும் சந்து (முடுக்கு) வழியே செல்ல நேரும்போதெல்லாம் வாயார விசாரிப்பார்கள். வீட்டிற்குள் செல்லாமல் கடந்து சென்றால் உரிமையுடன் கோபிப்பார்கள். வீட்டிற்குள் சென்று விட்டாலோ, அடுத்தவர் வீடு என கற்பனையிலும் நினைத்து விடாத அளவுக்கு தாயாக உபசரிப்பார்கள்.

வாழும் காலத்திலும் சிரித்த முகம்... இவ்வுலகை விட்டும் பிரிந்து பொதுமக்களுக்கு ஜனாஸாவாகக் காட்சியளித்தபோதும் அதே சிரித்த முகம். ஒரு சிலருக்கே அமையும் இந்த பாக்கியம் எங்கள் தாய்க்கும் அமைந்துவிட்டது.

கருணையுள்ள அல்லாஹ், மர்ஹூமா அவர்கள் தன் வாழ்நாளில் அறிந்தோ, அறியாமலோ செய்த பாவப்பிழைகளைப் பொருத்தருளி, மண்ணறை - மறுமை வாழ்வுகளை ஒளிமயமாக்கி வைத்து, நபிமார், ஸித்தீக்கீன், ஷுஹதா, ஸாலிஹீனுடன் அவர்களையும், நம்மையும் சேர்த்தருள்வானாக...

அன்னாரின் பிரிவால் துயருற்றிருக்கும் என் அன்பு சொளுக்கு மச்சான், மச்சிமார் உள்ளிட்ட குடும்பத்தார் அனைவருக்கும் ஸப்ரன் ஜமீலா எனும் அழகிய பொறுமையைத் தந்தருள்வானாக ஆமீன்.

அனைவருக்கும் எமதன்பான அஸ்ஸலாமு அலைக்கும் வரஹ்மத்துல்லாஹி வபரக்காதுஹ்.

கண்ணீருடன்,
எஸ்.கே.ஸாலிஹ்
மற்றும்
மர்ஹூம் எஸ்.கே.ஷாஹுல் ஹமீத் குடும்பத்தினர்
கொச்சியார் தெரு, காயல்பட்டினம்.