IP: 180.*.*.* India

தாய்லாந்து காயல்நல மன்றத்தின் கோரிக்கையில் அந்த மன்றம் மட்டுமே 1,45,000 கொடுத்துள்ளது. மற்ற காயல்நல மன்றங்கள் 10 விழுக்காடுகள் அல்லது 6 விழுக்காடுகள் மட்டுமே அளித்துள்ளன என்ற புள்ளி விவரங்கள் ஏமாற்றம் தருகின்றன

அவர்கள் கல்விக்கும் மருத்துவத்துக்கும் அள்ளிக் கொடுக்கும் அட்சய பாத்திரங்கள், ஏன் இந்த கோரிக்கைக்கு அவ்வளவு முக்கியத்துவம் கொடுக்கவில்லை என்பதை thakwa சற்று சுய பரிசோதனை செய்து பார்க்க வேண்டும்.

நமதூர் பள்ளிவாசல்கள் பல லட்சங்கள் செலவழித்து புதுப்பித்துக் கட்டப் படுகின்றன. வருடம் முழுவதும் விழாக்கள் நடைபெறுகின்றன அதற்கும் பல லட்சங்கள் செலவிடப் படுகின்றன.ஆனால் அங்கே பணியாற்றும் இமாம்களுக்கும் பிலால்களுக்கும் மிக குறைந்த தொகையை வேதனமாக அளிக்கின்றன. அவர்களுக்கு அளிக்கப் படுகின்ற கௌரவமும் திருப்தி அளிப்பதாக இல்லை. ஒரு மாதத்துக்கு சுமார் 150 தடவை பள்ளிக்கு வரவேண்டும் 150 தடவை பள்ளியில் இருந்து வீடு செல்ல வேண்டும். காலை பனி நேரம் - வேகும் வெயில் நேரம் - அந்தி சாயும் நேரம் - நிம்மதி நாடும் இரவு நேரம் - இவை எல்லாம் அவர்களுக்கு வேலை நேரங்கள். இந்த விஷயம் பள்ளிவாசல் முதவல்லிகளுக்கு தெரியாதா. அவர்களுக்கு வருடா வருடம் சம்பளத்தை அதிகரித்துக் கொடுங்கள் என்று குரல் எழுப்ப வேண்டிய காயல் நல மன்றங்கள் இப்படி ஒரு பெருநாளில் மட்டும் 5000 ரூபாய் கொடுத்து தங்கள் கருணையை வெளிக் காட்டுவது ஏற்புடையதாக இல்லை. இது அரசியல் கட்சிகள் மக்களுக்கு வழங்கும் விலையில்லா பொருள்கள் போல் இலவசங்கள் போல் இருக்குமே தவிர, இமாம்களுக்கும் பிலால்களுக்கும் கௌரவமும் மதிப்பும் சேர்ப்பதாக ஆகாது.

எங்கள் நெஞ்சில் நிறைந்து வாழும் எனது தந்தை மக்கி ஆலிம் அவர்கள் எனக்கு ஒரு போதனை செய்தார்கள். நீ வேலை பார்க்கும் கம்பெனியில் எவ்வளவு போனஸ் தருவார்கள் என்று ஆசைப் படாதே. மாறாக எவ்வளவு சம்பள உயர்வு தருவார்கள் என்று ஆசைப் பட்டு உழை.அதுதான் நிரந்தரம். போனஸ் கானல் நீர். சம்பள உயர்வு உனது உழைப்புக்கு அங்கீகாரம் . அதேபோல் ஒரு கட்டடம் வாடகைக்கு விட்டால், அட்வான்ஸ் கூடுதலாக கேக்காதே, வாடகை அதிகமாக கேள். முன்னது திருப்பிக் கொடுக்க வேண்டும். பின்னது நமக்கே உரியது.

இந்த சூட்சுமத்தை இமாம்களும் பிலால்களும் அறிய செய்யுங்கள். பள்ளிவாசல் முதவல்லிகளிடம் போராடி வாதாடி அவர்களுக்கு சிறப்பான சம்பளங்கள் வழங்க ஆவன செய்யுங்கள் என்று பணிவன்புடன் எனது கண்ணியம் மிக்க சம்சுதீன் மாமா அவர்களை வேண்டிக் கொள்கிறேன். உங்கள் கோரிக்கைகளை ஏற்று இமாம்களுக்கும் பிலால்களுக்கும் தாராளமாக அள்ளி வழங்குபவர்களுக்கு அல்லாஹ் அள்ளி வழங்குவானாக. ஆனால் நிதர்சன உண்மைகளை நான் இங்கு பதிவு செய்துள்ளேன்.

உறவுக்கு கை கொடுப்போம்
உரிமைக்கு குரல் கொடுப்போம்.
ஏழையின் சிரிப்பில் இறைவனை காண்போம்.

இது அண்ணா சொன்னது அல்ல..அவருக்கு முன்னால் 1400 வருடங்களுக்கு முன்னால் நமது அண்ணல் சொன்னது.

வாழ்த்துக்கள்.