IP: 180.*.*.* India

இன்னா லில்லாஹி வ இன்னா இலைஹி ராஜிஊன். இன்று காலையில் முழிழ்த்தவுடன் இன்னுமொரு அதிர்ச்சி செய்தி. புன்முறுவல் பேர்வழி சகோதரர் ஷக்கீலின் மறைவுச் செய்தி. சத்தமில்லாமல் சமூகச் சேவை செய்தவர். நன்மைகளுக்கு முந்திக் கொண்டு துணை நின்றவர்.

எனக்கு ஓராண்டு மூப்பெனினும் பால்யவயது நெருங்கிய நண்பர். வாழ்வில் பல நாள் இன்னொரு மூலையில் கழித்தவர் இனி ஊரோடு வருவதற்கு கொஞ்சம் காலம் தான் என்று என்னும் போது உலகையே துறந்துவிட்டார்.

அல்லாஹ் மர்ஹூம் அவர்களின் பாவங்களை மன்னித்து கப்ரின் வாழ்வை சிறந்ததாக்கி மறுமையில் உயரிய சுவனச்சோலையில் நுழையச் செய்வானாக. அவரது இழப்பை தாங்கிடும் வலிமையை அவரின் குடும்பத்தார் அனைவருக்கும் தந்தருள்வானாக. ஆமீன்.

திடீர் பிரிவுகளும் தொடரும் மரணமும் சில நினைவுகளும். ------------------------------------------------------------------------------------------

அடுத்தவர் யாரோ என்னும் அளவு மரித்தோர் உலகு பெருகி கொண்டே போகிறது. உறவுகளைப் பேணுவது வாழ்நாளை அதிகரிக்குமாம். ஒரு நபி மொழி எனக்கு ஞாபகம் வருகிறது. உதுமான் பின் அஃப்ஃபான் (ரழி) அவர்கள் கபுருஸ்தானை காணும்போதெல்லாம் தேம்பித் தேம்பி அழுவார்களாம். மறுமை குறித்து பேசும் போதெல்லாம் அந்தளவு அழுகாத நீங்கள் ஏன் கப்ரைக் காணும்போது அழுகிறீர்கள் எனக் கேட்கப்பட்டால் கப்ர் மனிதனின் மறுமைக்கான முதல் படி. அதில் ஒருவர் வென்றுவிட்டால் அவரின் மறுமை வாழ்வு முழுதும் வெற்றி தான். அதை வெல்ல வேண்டுமே என்றுதான் அழுகிறேன் என்பார்களாம்.

அண்ணல் நபி (ஸல்) அவர்கள் இவரிவர் முனாஃபிக்குகள் என்றொரு ரகசியப் பட்டியலை ஹுதைஃபதுப்னுல் யமான் (ரழி) அவர்களிடம் சொல்லி இருக்க உமர் ஃகத்தாப் (ரழி) அவர்களோ எனக்கு மற்றவர் பற்றி ஒன்றும் கூறவேண்டாம். ஆனால் அப்பட்டியலில் நான் இருக்கின்றேனா என்பதை மட்டும் பார்த்துச் சொல்லுங்கள் என்றனராம்.

மறுமை என்றே வாழ்ந்தவர் நிலை இவ்வாறிருக்க மிகவும் சுருங்கிப்போன ஆயுள் காலத்தை பெரிதாக எண்ணி வாழும் நாம் என்ன செய்து கொண்டிருக்கிறோம்.

"நம்பிக்கை கொண்டோரே! அல்லாஹ்விடம் கலப்பற்ற முறையில் பாவ மன்னிப்புத் தேடுங்கள்! உங்கள் இறைவன் உங்கள் தீமைகளை அழித்து விடக்கூடும். உங்களை சொர்க்கச் சோலைகளில் நுழையச் செய்வான் (அல் குர்ஆன் 66:8)" என்ற இறைவசனத்திற்கேற்ப அல்லாஹ்வை நெருங்குவோம். அனுதினமும் தவ்பாவும் இஸ்திஃக்ஃபாரும் செய்வோம். நொடிப்பொழுதில் காற்றில் கலந்து போகும் இந்த நிலையற்ற வாழ்க்கையில் கொண்டு போவது நன்மையைத் தவிர வேறில்லை. வல்லவனான அல்லாஹ் நம் அனைவரின் பாவங்களையும் மன்னித்து கப்ரிலும் மறுமை வாழ்விலும் உயரிய ஜன்னதுல் ஃபிர்தவ்சுல் அஃலாவில் நம் அனைவரையும் ஒன்று சேர்ப்பானாக. ஆமீன்.