IP: 116.*.*.* India

நோன்பு காலங்களில் செய்யவேண்டிய நற்கருமங்கள் இவ்வளவு இருக்க, நமது இரவு நேர பொழுதுபோக்குகளாக சஹர் நேர ஒளிபரப்புக்கள், தாம் விளையாடுவது, கேரம் போர்டு விளையாடுவது என்று மாறி விட்ட அவலத்தை யாரிடம் சொல்வது. பகல் நேரங்கள் வெறும் அரட்டையிலும் அடுத்தவர் பற்றி புறம் பேசுவதிலும் கழிகிறது. விழித்து இருந்து பசியை உணர்வதை விட, தூங்கியே நமது பகல் பொழுதை கழிக்கும் பழக்கமும் நம்மிடம் உள்ளது.

இந்த மாதிரி கட்டுரைகள் இணையதள வசதி உள்ளவர்களைத்தான் சென்றடைகிறது. சாதாரண மக்கள் இதை அறிவது எப்படி.

நமதூரில் ஜாவியாவில் மட்டும் காலை 11 மணி முதல் 12 மணி வரை மார்க்க விஷயங்கள் சொல்லப்படுகின்றன. முன்பு மிஷ்காத் என்ற நூலில் இருந்து செய்து ஆலிம் அவர்கள் மார்க்க விஷயங்கள காலை 11 மணிக்கு ஜாமிஉல் அஸ்ஹர பள்ளியில் சொல்வார்கள். இப்போது அகீதா என்று ஒரு பிரச்சினை நம்மிடையே தோன்றி மன மாச்சரியங்களை ஏற்படுத்தி, இது மாதிரி நல்ல செய்திகளை கேட்க தடையாக உள்ளது. மற்ற எல்லா முஹல்லா பள்ளி வாசல்களிலும் இப்படி ஒரு ஏற்பாடு செய்யலாம். எத்தனை பேர் வருகிறார்கள் எனபது முக்கியமல்ல. காலபோக்கில் மக்கள் வர ஆரம்பிப்பார்கள்.

இதை விட்டு விட்டு நோன்பு திறந்த பிறகு தராவீஹ் தொழுத பிறகு பயான்கள் நடக்கின்றன. வீடு போய் சேர 12 மணி ஆகிறது. தூக்க மேலீட்டால் சஹர் நேரத்தில் பதறி பதறி எழுகிறார்கள். தஹஜ்ஜத் தொழுகை, இஸ்திக்பார், சலவாத் ஓதக் கூட நேரமில்லை. சிலர் சஹர் நேர ஒளிபரப்பில் மூழ்கி விடுகிறார்கள். எல்லா டிவி களிலும் பலதரப்பட்ட உலமா பெருமக்கள் பேசுகிறார்கள். அமல் செய்யும்படிதான் பிரசங்கம். ஆனால் பிரசங்கம் முடியும்போது சஹர் முடியும் நேரம் வந்து விடுகிறது. எங்கே அமல் செய்வது, எப்போது அமல் செய்வது.இதை எப்படி சரிசெய்வது ஒன்றுமே புரியவில்லை.

ஆசிரியர் அவர்கள் நல்ல சிந்தனையாளர், அவரது தந்தை SK எனது நெஞ்சில் நிறைந்தவர். அந்த காலத்தில் சஹர் நேர ஒலி பரப்புக்கள் குழாய்கள் வைத்து எழுப்பும் பழக்கம் இல்லை. சஹர் நேர ஒளிபரப்புக்கு டிவி க்கள் இல்லை. ஆலிம்கள் முண்டி அடித்துக் கொண்டு வருவதில்லை..ஆனால் , ஒரு கூட்டம் தெரு தெருவாக வருவார்கள். "ஒத்தை அடியும் அடிச்சாச்சி, ரெட்டை அடியும் அடிச்சாச்சி எழும்புங்க லாத்தா, எழும்புங்க லாத்தா சஹ்ரின் வக்தாச்சி, பொட்ட எழும்புங்க லாத்தா எழும்புங்க லாத்தா சஹ்ரின் வக்தாச்சி" என்று பாடிக் கொண்டு வருவார்கள் அதில் SK யின் பங்கும் பாங்கும் அலாதியானது.பக்கீர்கள் கொட்டு அடித்துக் கொண்டு வருவார்கள் எந்த நோயாளியும் கஷ்டப்பட மாட்டார்கள் திட்ட மாட்டார்கள்.

இப்போது நவீன வாழ்க்கை வசதிகள் ஆனால் மன சங்கடங்கள் அதிகம். அல்லாஹ் ஒருவனே இந்த நிலைகளை மாற்றி நமது சிறிய அமல்களுக்கும் நிறை கூலிகள் தர போதுமானவன். ஆனாலும் இந்த செய்திகளை மக்களிடம் கொண்டு செல்ல இணையதளத்தை தவிர வேறு வழிகள் இருக்கிறதா என்றும் சிந்திக்க வேண்டி உள்ளது. கட்டுரை ஆசிரியர் போன்ற சமூக ஆர்வமுள்ள இளைஞர்கள் இதில் கவனம் செலுத்தினால் மாற்றம் நிச்சயம் வரும். YA MAUSHARA SHABAAB என்று இளைஞர்களை தான் நபிகள் நாயகம் அழைத்தார்கள். அந்த புரட்சியை 13 வருட காலத்தில் செய்து சாதனை படைத்தார்கள்.

நபி அவர்கள் இன்று நம்மிடையே இல்லை. ஆனால் அவர்கள் வாழ்க்கை முறை, போதனைகள் எல்லாம் புத்தகங்களாக நம்மிடையே இருக்கின்றன. சஹாபாக்கள் உள்ளம் தோறும் ஈமான் இருந்தது நபியின் வாழ்க்கை முறை இருந்தது அன்று. ஆனால் நமது இல்லம் தோறும் அந்த ஈமான் நபியின் வாழ்க்கைமுறை குறுந்தகடுகளாக இருக்கின்றன. நமக்கு நேரம் கிடைக்கும்போது போட்டு பார்த்து கேட்டு ரசித்து, சுபுஹானல்லாஹ் என்று சொல்லி அவர்கள் வாழ்க்கைபற்றி பேசி புகழ்ந்து மகிழ்ந்து கொண்டிருக்கிறோம். நாம் எப்போது அமல் செய்வது, அந்த மனித புனிதர்களின் வாழ்வை வாழ்வது, அல்லாஹ் தவ்பீக் செய்வானாக.