IP: 180.*.*.* India

இன்னா லில்லாஹி வ இன்னா இலைஹி ராஜிஊன். துக்கத்தில் துவண்டு போகும் அளவு மிகவும் அதிர்ச்சியான செய்தி.

இன்று காலையில் என் தூக்கத்தை கலைத்தது என் ஆருயிர் நண்பன் எஸ்.ஓ.வின் மதிப்பிற்குரிய மனைவி இறந்த செய்திதான்.

சில காலமாக பெரு நோயால் மிகவும் பாதிக்கப்பட்டு தன் இரட்சகனின் நாட்டப்படி அவன்பால் மீண்டு இருக்கிறார். இரண்டு வருடத்திற்கு முன் அருமை நண்பன் கீழே விழுந்ததில் கால் முறிந்து படுக்கையில் கிடந்த நேரம் ஒரு மனைவி என்பதையும் விட அதிகமாக அவனருகில் இருந்து முழு பணிவிடையையும் செய்து கொண்டிருந்தது என் கண்களில் இன்றும் நிழலாடிக் கொண்டிருக்கிறது.

அதற்குப் பின் அவன் சிறிது சிறிதாக தேறி வந்தபோது அவனுக்கு நடை பயின்று கொடுக்க நமதூர் கடற்கரையில் தன்னலம் பாராது கண்துஞ்சாது அதிகாலையில் தினமும் உடன் சென்றது இந்த இளம் மங்கை தான்.

அவரது கணவர் முழுதாக குணமடைந்து என்னுடன் மீண்டும் பணி செய்ய வந்த போது தான் இவர் சுகவீனமுற்றார். அமைதி, பொறுமை, உதவும் மனப்பான்மை, நற்குணம், நற்பண்பிற்கு சொந்தக்காரர் இந்த மாது. தனக்காக பெரிதாக எதற்கும் ஆசைப்பட்டதில்லை. தன் பிள்ளைகளை மார்க்க அடிப்படையில் உருவாக்கிட முயற்சி மேற்கொண்டவர்.

யா அல்லாஹ்.....!!! சுவர்க்கம் செல்ல ஒரு பெண்ணிற்கு அனைத்திற்கும் மேலாக தனது கணவனின் திருப்தி தான் வேண்டும் என உன் ஹபீப் முஹம்மத் சல்லல்லாஹு அலைஹி வஸல்லம் அவர்கள் கூறினார்கள் என்றால் இதோ உன் அடியார் அந்த கணவனின் முழுத் திருப்தியை பெற்றவாராக உன் பால் மீண்டிருக்கிறார். யா அல்லாஹ். உலகில் இவர் அடையப் பெறாத இன்பங்கள பலவற்றை நீ அவருக்கு கப்ரிலும் சுவர்க்கத்திலும் கொடு. இவர் சுகவீனப்பட்டு சில காலம் பட்ட துன்பங்களையும் நீ இவர் மண்ணரை வாழ்வில் இன்பமாக்கி வை.

உன் அடியார்களை விட பொங்கு கருணையாளனும் தொடர் கிருபையாளனும் நீயே. எங்கள் இரட்சகா. இவரது பாவங்கள் அனைத்தையும் மன்னித்து விடு.

யா அல்லாஹ், உனது ஹபீப் முஹம்மத் சல்லல்லாஹு அலைஹி வஸல்லம் அவர்கள் கூறினார்களே, 'யாரொருவர் நோயால் பாதிக்கப்பட்டவராக இறப்பெய்தினாரோ அவர் ஷஹீதுடைய அந்தஸ்தைப் பெறுகிறார், மேலும் கப்ரின் சோதனைகளிலிருந்து காக்கப்படுகிறார், மேலும் ஒவ்வொரு நாளும் காலையிலும் மாலையிலும் சுவனபதியிலிருந்து உணவளிக்கப்படுகிறது (இப்னு மாஜா)' அவை அனைத்தையும் இவருக்கு கொடு இரட்சகா.

யா அல்லாஹ், இவரது பிரிவால் துயருற்றுள்ள என் அருமை நண்பன் எஸ்.ஓ.உக்கும் அவனது பிள்ளைகள், அருமை நண்பன் பாசுல் ஹமீத் மற்றும் குடும்பத்தார் அனைவருக்கும் இந்த இழப்பை ஈடு செய். அவர்களுக்கு சிறப்பானதைக் கொடு. ஆமீன்.

நீங்கா துயருடன்,

எஸ்.கே.ஷமீமுல் இஸ்லாம் & குடும்பத்தார்,
எஸ்.கே.ஹவுஸ் காயல்பட்டணம் &சென்னை.