IP: 220.*.*.* Singapore

நமது குடும்பத்தில் உள்ள ஒரு மூத்த தூண் சாய்ந்து விட்டது. நமதூரின் மூத்த பெண்மணிகளுள் ஒருவர்... எனது அருமை தாயாரின் மிகவும் நெருங்கிய நண்பி . என் அருமை தோழிமா அவர்களின் வபாத் செய்தி அறிந்து மிகவும் கவலைப் பட்டேன் . இன்னா லில்லாஹி வ இன்னா இலைஹி ராஜிஊன்.

ஒரு சிறந்த பெண் ஆலிமா !
சிறந்த வணக்கசாலி !
ஈகை உள்ளம் கொண்டவர் !
மார்க்க விசயங்களில் மிகவும் பேணுதல் உடையவர் !
குடும்ப விசயங்கள் , பழைய காலத்து சரித்திரங்கள் , சன்மார்க்கத்தின் நுணுக்கமான ,தெளிவான விசயங்களை மிகவும் அறிந்தவர்கள் ! .

ஆழமான ஞாபக சக்தி உள்ளவர்கள் !
யாரையும் தேடி செல்லமாட்டார்கள் . அவர்களின் உடல் அமைப்பும், தேக ஆரோக்கியங்களும் அப்படி !

ஆனால் அவர்களை அனைவரும் தேடி வருவார்கள் ! வந்தவர்களுக்கு வயிறு நிறைய தீனும், உள்ளம் நிறைய (Dheenum) கிடைக்கும்!

அல்லாமா நஹ்வி அப்பா , சொளுக்கார் அப்பா , கண்ணாடி ஆலிம் மற்றும் பெரும்பெரும் உலமாக்களின் சரித்திர நிகழ்வுகளை அறிந்து வைத்துகொண்டு அதனை பிறருக்கும் மிகவும் விருப்பமாக சொல்லிக் காட்டுவார்கள்

அரபுத் தமிழ் தஃப்ஸீர் (திருக்குர்ஆன் விளக்கவுரை) , புர்தா ,வித்ரியா , வேதப் புராணம் என மெஞ்ஞான விசயங்களை மிக ஆழமாக அறிந்தவர்கள் .

ஊரில் அரூசியா பள்ளியில் நான் தராவீஹ் தொழவைக்கும் காலங்களில் தம்பி ஸுஐபு நூஹ் ஆலிமும் என்னோடு பாட்னராக தொழவைத்தார் . .

பள்ளிக்கு செல்லும்போது தோழிமா வீட்டுக்கு வருவேன் .ஸுஐபு நூஹ் ஆலிமை சைக்கிளில் அழைத்து செல்வேன் . அந்நேரத்தில் அவருக்கு சைக்கிள் கூட ஓட்ட தெரியாது . தோழிமா என்னிடம் வாப்பா இவன் அழகாக தொழ வைக்கிறானா ? பெறலி பண்ணுறானா ? நல்லா பாத்துகம்மா , என சொல்லி பக்கத்தில் இருக்கும் அமுல் ஸ்பிரே டப்பாவை திறந்து ஒரு பிடி எடுத்து மகனிடம் கொடுப்பார்கள் . நான் எதுவும் பண்டம் என நினைத்துக் கொள்வேன் . பிறகு பார்த்தால் அது போடி சில்லறை ஏன் தெரியவரும் கையளவு சில்லறை காசை எடுத்து மகனிடம் கொடுத்து , வரும்போது இருவரும் பண்டம் வாங்கி தின்னுங்கோ என்பார்கள் .ஐந்து , பத்து பைசாவாக சுமார் ஆறு ,ஏழு ரூபாய் தேறும் , தராவீஹ் முடிந்து வீடு வரும்போது ஜுபைர் ஸ்டோர் அருகில் இருக்கும் சேகு காக்கா ஹரீரா கடையில் ஹரீரா, மஞ்சவடை என இருவரும் வெளுத்து வாங்குவோம் , இப்படி தோழிமா பற்றிய “செய்திகளை “ சொல்லிக்கொண்டே செல்லலாம் .

நல்ல பெண்மணிக்கு இலக்கணமாக வாழ்ந்த முத்தாசிமா மாமி தோழிமா அவர்கள் இன்று நம்மை விட்டும் பிரிந்துவிட்டார்கள்.

கருணையுள்ள அல்லாஹ், மர்ஹூமா அவர்களின் அனைத்துப் பிழைகளையும் மன்னித்து, ஜன்னத்துல் ஃபிர்தவ்ஸ் எனும் உயர் சுவனத்தில் அண்ணல் கண்மணி நாயகம் (ஸல்லல்லாஹு அலைஹி

வ ஸல்லம்) மற்றும் நல்லோர்கள் , நாதாக்கள் , வலிமார்கள் ,சாளிஹீன்கள் ஆகியவர்களோடு இணைந்திருக்கச் செய்வானாக...

அன்னாரின் கப்ரை வெளிச்சமாக்கி, விசாலமாக்கி , கேள்வி கணக்கை இலேசாக்குவானாக !

அன்னாரின் பிரிவால் துயருற்றிருக்கும் அனைவருக்கும் எனது ஆழ்ந்த இரங்கலை தெரிவித்துக் கொள்கிறேன் ! அவர்களது அன்பு மக்களான செய்யித் அஹ்மத் கபீர் காக்கா,தம்பி ஷுஅய்ப் நூஹ் ஆலிம் மஹ்லரி உள்ளிட்ட - மர்ஹூமா அவர்களின் குடும்பத்தார் யாவருக்கும் அழகிய பொறுமையைத் தந்தருள்வானாக, ஆமீன் யா ரப்பல் ஆலமீன் !!!!!!!

அஸ்ஸலாமு அலைக்கும் வரஹ்மத்துல்லாஹி வபரக்காதுஹ்...