IP: 180.*.*.* India

தேறான் தெளிவும் தெளிவுற்றான் கண் ஐயுறலும் தீரா இடும்பை தரும் என்ற வள்ளுவன் குறள் இந்த கலிங்கத்து புலிக்கு தெரியாமல் போனது ஏன்? புலி பசித்தாலும் புல்லை திங்காது என்ற பழ மொழி இந்த தமிழகத்து தளபதிக்கு தெரியாமல் போனது ஏன்? சிங்கம் சிங்கிளாகத்தான் போகும் என்ற சூப்பர் ஸ்டாரின் சமீபத்திய டயலாக் கூடவா இந்த புரட்சி புயலுக்கு புரியாமல் போனது?

கொள்கைக்காக கூட்டணி என்ற லட்சிய நிலை மாறி, சீட்டுக்காக கூட்டு - நோட்டுக்காக ஓட்டு என்று லட்சங்களுக்காக கூட்டணி என்ற நிலை தமிழகத்தில் அரங்கேறியபோது இதை எல்லாம் நினைத்து பார்க்க வைகோவுக்கு நேரம் இல்லாமல் போய்விட்டது. கைபர் கணவாய் வழியே இந்தியாவுக்குள் ஊடுருவிய ஆரியக் கூட்டங்கள் திராவிடக் கட்சிகளுடன் எப்படி கொஞ்சி குலாவ முடியும். எண்ணையும் தண்ணியுமாக எத்தனை நாட்கள் இருக்க முடியும். இதெல்லாம் சாமானிய மக்கள் எதிர்பார்த்தே இருந்தார்கள். அதனால்தான் கடந்த தேர்தலில் வைக்கோவையே மக்கள் புறக்கணித்தார்கள். தங்க ஊசி என்றால் கண்ணில் குத்திக் கொள்ள முடியுமா?

திமுகவில் இருந்தபோது மூன்றாம் அத்தியாயமே வருக என்று சுவர்களில் இவர் புகழ் பாடி நோடிஸ்கள் வெளியானபோது அதை பொறுக்க முடியாத கலைஞர், அந்த தளபதிக்கு விடை கொடுத்து அனுப்பினார். மீண்டும் இணைந்தபோதும் உறவுகள் ஒட்டாமலே இருந்தது. மகன் என்றால் உதடுகள் ஒட்டும் அண்ணன் என்றால் உதடுகள் ஒட்டாது. போதாத காலம் அம்மாவிடம் அடைக்கலம் புகுந்த புரட்சி புயலுக்கு அங்கும் ஏமாற்றமே காத்திருந்தது. இது புயல் அல்ல புழுதி என்று அவர் ஊதி தள்ளப் பட்டார். வாராத வரமாக வந்தது மக்களவை தேர்தல். தமிழகத்தின் LADY ஒரு பக்கம் -ஸ்டாலினின் DADDY மறுபக்கம் இவர்களுக்கு ஒரு சவாலாக குஜராத்தின் MODI அமைவார் என்று எதிர்பார்த்து அந்த கூடாரத்தில் சங்கமமாகிய வைக்கோவுக்கு அங்கும் ஏமாற்றமே பரிசாக கிடைத்தது.. அவருக்கொரு ராசி. அவர் எங்கிருந்து வெளியேறினாலும் அவருக்கு கை கொடுக்க ஒரு புது கட்சி எப்போதுமே தயாராக இருக்கும். இப்போது அது தமிழ் மாநில காங்கிரஸ் என்ற வடிவில் உதயமாகி உள்ளது. அவர் அங்கே சங்கமமாகலாம் என்று மக்கள் எதிர்பார்ப்பதில் தவறு இல்லை. ஆனால் சுமார் 20 ஆண்டுகளாக இவரையே நம்பி இருக்கும் தொண்டர்கள் இனி என்ன முடிவெடுப்பார்கள் என்று பொறுத்திருந்துதான் பார்க்க வேண்டும்.

வைகறையே வருக என்று ஆரத்தழுவி அணைத்தவர்கள் - இவர் ஒரு மூன்றாம் பிறை இவருக்குள் ஒரு முழு நிலவு மறைந்திருக்கிறது என்று நினைத்தவர்கள் - இப்படி தேய் பிறையாகி விட்டதே என்று கண் கலங்கி நிற்கிறார்கள். இப்போதும் சரியான வியூகம் வகுத்து அவர் காய் நகர்த்த தவறினால் 45 வயது விஸ்வநாதன் ஆனந்தனை 25 வயது கார்ல்சன் வெற்றி கொண்ட கதைதான் அரசியல் சதுரங்க விளையாட்டில் இனி நடக்கும்.

நாடகமே உலகம் நாளை நடப்பதை யார் அறிவார்.