IP: 163.*.*.* Japan

தில்லி தேர்தல் முடிவுகள் – ஆம் ஆத்மி வெற்றிக்கு உங்களின் நல் வாழ்த்துக்களை வரவேற்கின்றேன்...!

டில்லியில் நடந்து முடிந்த புரட்சிகரமான தேர்தலில் சாதாரண மக்கள் வென்றதற்கு நாங்களும் டில்லி மக்கள் அனைவருக்கும் வாழ்த்துக்களை தெரிவித்துக் கொள்கிறோம். இதற்காக அரும்பாடுபட்டு உழைத்த தன்னார்வலர்கள் அனைவருக்கும் காயல்பட்டினம் ஆம் ஆத்மி கட்சி கிளை நன்றி தெரிவித்துக் கொள்கிறது.

டில்லி மக்களின் அடிப்படை பிரச்சனைகளான தண்ணீர், வீடு, மின்சார கட்டணம், கல்வி மற்றும் ஊழலுக்கான தீர்வுகளை முன்வைத்து செய்த வலிமையான பிராச்சாரத்திற்கு கிடைத்த மாபெரும் வெற்றி இதுவாகும்.

ஆம் ஆத்மி கட்சி தொடங்கிய போது மாற்று அரசியலுக்கு இந்தியாவில் சாத்தியமே இல்லை என்றும்; அரசியல் ஒரு சாக்கடை என்றும்; இந்தியாவில் நெறிமுறைகளின்படி கட்சி நடத்தவே முடியாது என்றும் சிலர் கருதினர். நிதியில் வெளிப்படைத்தன்மை, மற்றும் குற்றப் பின்னணி உள்ள வேட்பாளர்களை நிராகரிப்பது போன்ற நெறிமுறைகளுடன் ஒரு கட்சி மாற்று அரசியலைக் கொண்டு வர முடியும் என்று தில்லி முடிவுகள் காட்டுகின்றன. ஊழல், கருப்பு பணம் மற்றும் குற்ற அரசியலின் முடிவுக்கான ஆரம்பம் தான் இந்த வெற்றியாகும்.

இது போன்று ஒரு மாற்றம் வர, தமிழகத்தில் இருந்து 200 க்கும் மேற்பட்ட தன்னார்வலர்கள் டில்லி சென்று தமிழர்கள் வசிக்கும் இடங்களில் பிரச்சாரம் மேற்கொண்டோம். இந்த வெற்றி, புரையோடிப் போயிருக்கும் லஞ்ச ஊழலில் இருந்து விடுதலைப் பெற துடிக்கும் பிற மாநிலங்களுக்கு ஒரு அறைகூவல்.

குறிப்பாக, தமிழகத்தில் தி.மு.க /அ.தி.மு.க என்று இரு கட்சிகளும் இணைந்து வேறு மாற்றுக்கே வழியில்லாமல் மக்கள் திணறுகின்றனர். ஒரு பக்கம் அரசே மக்களை குடிப்பழக்கத்தில் ஆழ்த்தும் ஒரு அவல நிலை மற்றும் பிறக்கும் பொழுதிருந்து சுடுகாடு வரை அனைத்து அரசு அலுவலகங்களிலும் கூத்தாடும் லஞ்சம் / ஊழல் மற்றொரு புறம் மோசமான தொழில் துறை மற்றும் விவசாய கொள்கைகளால் பெருகி வரும் வறுமை எனத் தமிழகத்தில் எளிய மக்கள் ஊழலாட்சியின் எல்லாப் பரிமாணங்களையும் அனுபவித்து வருகிறார்கள். இரு பெரும் கட்சிகளும் இந்தியாவின் மிகப்பெரிய ஊழல் வழக்குகளில் சிக்கியுள்ளன. ஆட்சியில் இருக்கும் போதே சிறைக்கு அனுப்பப்பட்டுள்ளார் முந்தைய முதலமைச்சர். மிக மோசமான நிதி முறைகேடுகள் மற்றும் பணபலம் தாண்டவாமாடும் தேர்தல்களே தமிழகத்தில் வழக்கமாக உள்ளன.

தமிழகத்தில் உள்ள மக்கள் பிரச்சனைகளை பெரிய அளவில் முன்னெடுக்க உள்ளோம். மின்சார வாரியம், டாஸ்மாக் போன்றவற்றில் நடைபெறும் ஊழல்களை வெளிக்கொணர்ந்து அரசியலில் பினாமிகளின் தாண்டவத்தையும் கூட்டு சதி முதலாளித்துவத்தையும் நிறுத்துவது, தரமான கல்வி, மருத்துவம் போன்ற அடிப்படை தேவைகள், கனிமவளக் கொள்ளை, ஆற்றுமணல் கொள்ளை போன்றவற்றில் முறைகேடுகளை தடுப்பது மட்டுமின்றி, குற்றம் செய்த அரசியல்வாதிகள் மற்றும் அரசு அதிகாரிகளைக் கடுமையாகத் தண்டிக்கச் செய்வது, தமிழகத்தில் சுயராச்சியத்திற்குப் பாதை வகுக்கும்படி, நிலக் கையகப்படுத்தல் அரச கட்டளையை எதிர்ப்பது, குடிசைப்பகுதி மக்களின் நலன் போன்றவற்றை முன்னெடுப்பது, விவசாயிகளின் மிகப்பெரிய பிரச்சனைகளுக்கான தண்ணீர் மற்றும் விலை நிர்ணயம் குறித்து போராடுவது, ஊழல் எதிர்ப்பு சட்டமான லோகயுக்தாவை அமல்படுத்துவது, தேர்தல் நிதியில் வெளிப்படைத் தன்மை கொண்டு வருவது என பல மக்கள் பிரச்சனைகளை முன்னெடுக்கும் ஆம் ஆத்மி கட்சி. இவை மூலமாகத் தமிழகத்தில் உண்மையான மக்களாட்சி மலர ஆம் ஆத்மி கட்சி தன போராட்டத்தை இன்றே தொடங்கும்.

தமிழ்நாட்டை கொள்ளையர்களிடம் இருந்து மீட்க நடக்கும் இந்த இரண்டாம் சுதந்திர போராட்டத்தில் பங்கு பெற விரும்பும் அனைத்து நல்லுள்ளங்களையும் அழைக்கிறோம். கட்சியில் இணைய விரும்பும் அனைவரும் 9025644644 எண்ணுக்கு மிஸ்டு கால் கொடுக்கலாம். தி. நகரில் உள்ள எங்கள் கட்சி அலுவலகத்திலும் வந்து இணையலாம்.

தோழமையுடன் - ஆம் ஆத்மி கட்சி தமிழ்நாடு / காயல்பட்டினம் ஆம் ஆத்மி கட்சி கிளை.