IP: 163.*.*.* Japan

கனவு தூக்கத்தில் வருவது இரவில் காணும் கனவு பகலில் காணும் கனவு. நாம் நம் தகுதிக்கு மேல் பெற வேண்டும் என்று ஆசைப்படுவது எல்லாமே கனவு என்றுதான் பேசப்படுகிறது.

”கனவு என்பது உங்கள் தூக்கத்தில் வருவதல்ல அது உங்களை தூங்க விடாமல் செய்வது” என்று கனவுக்கு புதிய பரிணாமம் தந்தவர் அப்துல் கலாம் அவர்கள்.

இளைய தலைமுறைக்கும் புதிய தலைமுறைக்கும் ஒரு புதிய தெம்பை தந்த ஒரு முதிய தலைமுறைக்கு சொந்தக்காரர் அப்துல் கலாம். நம்மிடையே 84 வயது நிறைந்தவர்களை கேட்டு பாருங்கள் காடு வா வா என்கிறது வீடு போ போ என்கிறது, இந்த நிலையில் எங்கே போவது எங்கே உழைப்பது. சாப்பாட்டுக்கு ஏதாவது இருந்தால் போதும் காலத்தை இப்படியே ஓட்டி கொண்டு போய் சேர வேண்டியது தான் என்பார்கள். ”மரணத்தை பற்றி நான் எப்போதும் அஞ்சியதே இல்லை எல்லோரும் ஒரு நாள் போய் சேர வேண்டியவர்கள்தான்” என்று சொன்னவர் அப்துல் கலாம்.

84 வயதில் ஒரு குளிர் பிரதேசத்தில் சென்று உரையாற்றும் தெம்பு இந்த வயதில் யாருக்கும் இலகுவில் வரக்கூடியது அல்ல. அதுவும் அரசு கார்கள் காவலர்களுடன் தக்க பாதுகாப்புகளுடன் சென்று வரும் ஒரு ஜனாதிபதியோ பிரதமரோ ஒரு கட்சியின் தலைவரோ அல்ல. சாதாரண ஒரு மனிதராக சென்றிருக்கிறார். அவரது வயதை ஒத்தவர்களுக்கு மத்தியில் அவர் உரையாடவில்லை. 18 – 30 வயதுற்குப்பட்ட மாணவ மாணவிகள் மத்தியில் எழுச்சி உரை ஆற்றி இருக்கிறார். நிகழ்ச்சி முடிந்ததும் அவரிடம் அவர்கள் கேள்விகள் கேட்பார்கள். எந்த விதமான முன் குறிப்பும் இல்லாமல் பதில் சொல்லக் கூடிய ஆற்றல் – நகை சுவையுடன் அவர்களுடன் உரையாடும் அற்புதமான அக்னி சிறகு கொண்டு பறப்பவர் இந்த 84 வயது இளைஞர். அவர் வாழும் காலத்திலேயே அவருக்கு பாரத ரத்னா விருது கொடுத்து இந்திய அரசு அவரை கௌரவித்தது உலகில் 9 வது அதிசயம்.

அவர் மறைந்து விட்டாலும் அவருடைய துணிவு, தளாரத உணர்வு, தனக்கு வயதாகி விட்டது என்ற சோர்வு இல்லாமை எல்லாம் நமக் கொரு முன்மாதிரி.

அவர் தமிழ் மண்ணில் பிறந்தவர் இஸ்லாமிய சமுதாயத்தில் பிறந்தவர் என்பதில் நமக்கெல்லாம் பெருமை.

”இருந்தாலும் மறைந்தாலும் பேர் சொல்ல வேண்டும் இவர் போல யாரென்று ஊர் சொல்ல வேண்டும்..

எத்தனை காலம் மனிதன் வாழ்ந்தான் என்ற கேள்வி இல்லை அவன் எப்படி வாழ்ந்தான் என்பதை நினைத்தால் வாழ்க்கையில் தோல்வி இல்லை.

மர்ஹூம் அவர்களின் பாவங்களை அல்லாஹ் பொறுத்தருள்வானாக அவரது நற் செயல்களை பொருந்திக் கொள்வானாக அவருக்கு சொர்க்க வாழ்வை நசீபாக்கி கொடுப்பானாக என்று அல்லாஹ்வை பிரார்த்திப்போம்.

உங்களின் மறைந்தவர்களின் நன்மைகளை மட்டுமே பேசுங்கள் என்ற நபி மொழிக்கொப்ப அவரது குறைகளை இங்கு குறிப்பிட்டு கருத்துப் பதிவுகள் செய்வதை தவிர்ப்போமாக.