IP: 163.*.*.* Japan

ஊர் கட்டுப்பாடு என்று வெளியூர்களில் ஒரு பழக்கம் வழக்கம் உண்டு.என்னதான் கருத்து வேறுபாடுகள் இருந்தாலும் அது வெளிப்படையாக பேசப்பட்டு கடைசியில் ஒரு முடிவுக்கு வருவார்கள். அதில் சிலருக்கு உடன்பாடு இருக்காது. இருந்தாலும் ஊர் கட்டுப்பாடு கண்ணியம் காக்க வேண்டும் என்று அதனை ஏற்றுக் கொள்வார்கள். இப்போதும் அது நடை முறையில் இருக்கிறது.

ஆனால் உலமாக்கள் நிறைந்த நமதூரில் அப்படி ஒரு அணுகுமுறை இல்லை என்பது ஒரு கசப்பான உண்மை. ஆனாலும் அதை ஜீரணித்துக் கொள்ள உள்வாங்கி கொள்ள பொறுமையுடன் அதனை ஏற்றுக் கொள்ள நாம் பழகி விட்டோம் எனவே வேற்றுமையிலும் ஒற்றுமை நம்மிடம் ஒரு வாழ்வியலாகவே அமைந்து விட்டது. நோன்பு, பெருநாள் என்று வந்து விட்டாலே இந்த பிறை படும் பாடு சொல்லி மாளாது.

தமிழ்நாடு தவ்ஹீத் ஜமாத் தலைமை செயலகம் என்ன அறிவுப்பு செய்கிறதோ அதை அப்படியே ஏற்றுக் கொள்வார்கள் அந்த அமைப்பில் உள்ளவர்கள். JAHQ என்ற அமைப்பின் தலைமை சொல்லும் அறிவிப்பை அமுல்படுத்துவார்கள் அந்த அமைப்பில் உள்ளவர்கள். அதே போல் சுன்னத் வல் ஜமாத் அமைப்பில் உள்ளவர்கள் அந்த தலைமை சொல்வதை ஏற்றுக் கொள்வார்கள். இதில் அங்கம் வகிக்கும் பாமர மக்கள் படித்தவர்கள் சொல்வதைவிட அந்த அமைப்பில் உள்ள உலமாக்கள் குர் ஆன் ஹதீத்படி தீர்ப்பளிப்பதாக சொல்வார்கள். அந்த குறிப்புகளையும் நேர்த்தியாக எடுத்து வைப்பார்கள். எனவே இதில் யாரையும் குற்றம் குறை சொல்வதோ நீ சொல்வது சரி நான் சொல்வது சரி என்று வாதிடுவதற்கோ அவசியம் இல்லை. சர்ச்சைகளை தவிர்த்து நிதர்சன உண்மைகளை ஏற்றுக் கொண்டு நமது பெருநாளை அணுகுவோம்.

நோன்பு, பெருநாள் இவற்றின் நல் அமல்களை கண்காணிப்பவன் அதில் சரி தவறு கண்டுபிடிப்பவன் அதற்கான கூலிகளை குறைப்பவன் நிறைவாக தருபவன் நமது பாவங்களை மன்னிப்பவன் எல்லாமே சர்வ வல்லமையுள்ள அல்லாஹ் ஒருவனே.

எனவே குளிரூட்டப்பட்ட அறையில் உட்கார்ந்து கொண்டு கணினியில் பிறை கண்டு அறிவிப்பதை தவிர பிறை கண்டு நோன்பு வைப்பது, பிறை கண்டு பெருநாள் கொண்டாடுவது என்ற ஒரு நிலை இருந்தால் அது ஏற்புடையதுதான். .

காயல்பட்டினத்தில் இருந்து எத்தனை மைல் தொலைவில் வான் வழியோ கடல் வழியோ தரை வழியோ பிறை தென்பட்டால் அதை ஏற்றுக் கொள்ளலாம் என்ற தெளிவான தகவல் மட்டும் இன்னும் என்னைப் போன்ற சாமானியர்களை வந்து அடையவில்லை. மற்றப் படி சுன்னத் ஜமாத் உலமாக்கள் ஒருங்கிணைந்து கூட்டறிக்கை அளித்துள்ளதை ஏற்றுக் கொள்ள வேண்டும் என்பதில் நாம் உறுதியாக இருக்க வேண்டும். ஆளுக்காள் பேச ஆரம்பித்தால் உலமாக்கள் நம்மை விட்டு விலகி விடுவார்கள். நீங்களாக பார்த்து முடிவெடுத்துக் கொள்ளுங்கள் என்று சொல்லி விடுவார்கள். உலமாக்களின் கூட்டறிக்கையை ஏற்றுக் கொண்டு நாம் செயல்பட்டால் அதில் ஏற்படும் குறை நிறைகளுக்கு அவர்களே அல்லாஹ்விடம் பதில் சொல்லக் கடமைப் பட்டிருக்கிறார்கள்.எனவே அவர்கள் மிக பய பக்தியுடன் அல்லாஹ்வுக்கு பயந்து எடுத்துள்ள முடிவை நாம் ஏற்றுக் கொண்டு இன்றைய நாளை நோன்பு நாளாக அனுசரித்து நமது பெருநாளை கொண்டாடுவோம்.

எல்லாம் வல்ல அல்லாஹ் இந்த புனித ரமலானில் நாம் செய்த வணக்கங்களை ஏற்று கொள்வானாக நமது பாவங்களை மன்னித்துக் கொள்வானாக. நம் எல்லோரது இம்மை மறுமை வாழ்வை சிறப்பாக்கி வைப்பானாக,

எல்லோருக்கும் எனது இதயம் நிறைந்த ஈகை திருநாள் வாழ்த்துக்கள்.