IP: 180.*.*.* India

தன் மலர்ந்த முகத்தால் அனைவரையும் காலமெல்லாம் கவர்ந்தவர்...

இந்திய யூனியன் முஸ்லிம் லீக், காயல்பட்டினம் பைத்துல்மால் அறக்கட்டளை ஆகிய இரண்டும் அவர்களது இரண்டு கண்கள் எனலாம். அப்படி இவ்விரு அமைப்புகளிலும் தன்னாலான உழைப்பை நிறைவாக வழங்கியவர்...

இந்திய யூனியன் முஸ்லிம் லீக் தூத்துக்குடி மாவட்ட செய்தி தொடர்பாளராக அடியேன் இருந்தபோது, நகர கலந்தாலோசனைக் கூட்டங்கள் நடைபெறும் காலங்களிலெல்லாம் அதைச் செய்தியாக்கி, ஊடகங்களுக்கு அனுப்பிவிட்டு, காயல்பட்டணம்.காம் தளத்திலும் வெளியிடுவேன்.

ஆனால், அதே வாசகங்களை நாஸர் மாமா அவர்கள் ‘மாங்கு’ ‘மாங்கு’ என்று மினிட் புத்தகத்தில் எழுதி சிரமப்பட்டுக்கொண்டிருந்ததைக் கண்டு,

“ஏன் மாமா அவதிப்படுறீங்க...? செய்திக்காக எந்த வாசகத்தை வடிவமைக்கிறேனோ, அதை மினிட் புத்தகத்தில் பதிவதற்கேற்ப வாசகங்களை மாற்றியமைத்து, ப்ரிண்ட் எடுத்துத் தருகிறேன்... அதை அப்படியே வெட்டி, மினிட் புத்தகத்தில் ஒட்டிவிட்டு. தங்களது கைச்சான்றை அதில் பதிவு செய்யுங்கள்” என்றேன்.

அதன் பிறகு நடைபெற்ற அனைத்துக் கூட்டங்களின் வாசகங்களையும் அடியேனின் உதவியுடன் அவர்கள் அவ்வாறே செய்து வந்தார்கள்.

எனது பணிப்பளு, “வழமையான“ மறதி போன்றவை காரணமாக நாட்கள் தள்ளிப்போகும் காலங்களில், சளைக்காமல் எனது கைபேசியைத் தொடர்புகொண்டு கேட்பார்கள்... பெரிய மனிதர் கேட்கிறார்கள் என்றவுடன் எனது இதர பணிகள் அனைத்தையும் தவிர்த்துவிட்டு, அவர்களுக்கு ஆக வேண்டியதைச் செய்துகொடுக்கும் பாக்கியம் பெற்றவனாக இருந்தேன்.

நடையில் அவர்களின் வேகத்தை யாரும் விஞ்ச இயலாது என்று கூறுமளவுக்கு வேகமாக நடக்கக் கூடியவர்கள். எனது வீட்டிற்கும் பலமுறை நடந்தே வந்து, மினிட் புத்தகத்திற்குத் தேவையான ஆவணங்களை வாங்கிச் சென்றுள்ளார்கள்.

முஸ்லிம் லீக், பைத்துல்மால் தவிர - கே.எம்.டீ. மருத்துவமனை, ஐக்கியப் பேரவை என தனது பணிகளை விரிவாக்கிக் கொண்டு, தன்னாலான ஒத்துழைப்புகளை வழங்கியவர்கள்.

கடந்த சில மாதங்களாக சுகவீனப்பட்டு, மருத்துவமனை - வீடு என மாறி மாறி அவர்களது கடைசி கால வாழ்வு அமைந்துவிட்டது. மிகவும் அவதிப்பட்டுவிட்ட அவர்கள், இன்று வல்ல அல்லாஹ்வின் கட்டளைக்கிணங்க தமது இவ்வுலக வாழ்வை முடித்துக்கொண்டார்கள்.

அவர்கள் தம் வாழ்நாளில் அறிந்தோ, அறியாமலோ செய்த பாவப்பிழைகள் அனைத்தையும் கருணையுள்ள அல்லாஹ் தன் அளப்பெரும் கிருபை கொண்டு பொறுத்தருளி, ஜன்னத்துல் ஃபிர்தவ்ஸ் எனும் உயர்சுவனத்தில், நபிமார் - ஸித்தீக்கீன் - ஷுஹதா - ஸாலிஹீனுடன் இணைந்திருக்கும் பாக்கியத்தை நற்கூலியாக வழங்கியருள்வானாக...

மாமா அவர்களின் பிரிவால் துயருற்றிருக்கும் - எனதன்பு நண்பன் வாவு எம்.என்.காதிர் ஸாஹிப் உள்ளிட்ட குடும்பத்தார் யாவருக்கும் அல்லாஹ் ‘ஸப்ரன் ஜமீலா’ எனும் அழகிய பொறுமையை வழங்கியருள்வானாக... ஆமீன்.

அனைவருக்கும் அஸ்ஸலாமு அலைக்கும் வரஹ்மத்துல்லாஹி வபரக்காதுஹ்.

துஆக்களுடன்,
எஸ்.கே.ஸாலிஹ்
மற்றும்
மர்ஹூம் எஸ்.கே.ஷாஹுல் ஹமீத் குடும்பத்தார்
கொச்சியார் தெரு, காயல்பட்டினம்.