IP: 157.*.*.* Indonesia

எங்கள் குடும்பத் தலைவரை இழந்திருக்கிறோம்...

சிறந்த விளையாட்டு வீரர்... எப்போது வீட்டுக்கு வந்தாலும் அவர்களின் நகைச்சுவையும், உரத்த குரலிலான சிரிப்புப் பேச்சும் வீட்டையே அதிரச் செய்யும்.

என் தாயாரின் தாயாரும் (உம்மம்மா), இவர்களும் உடன்பிறப்புகள். உம்மம்மா ஹயாத்தோடு இருந்த காலகட்டத்தில், அவர்களைச் சந்திக்காமல் ஒரு நாள் கூட இவர்களுக்கு நகராது. இவர்களைப் போலவே, இவர்களது காக்கா மர்ஹூம் எஸ்.எஸ்.எம்.கபீர் அப்புமாமா அவர்களும்.

என் உம்மம்மாவின் வஃபாத்தையடுத்து, இவர்களின் வரத்தும் குறைந்துபோனது... நாட்கள் செல்லச் செல்ல இவ்விருவரும் வீட்டிலேயே இருக்கும் நிலையும் ஏற்பட்டது.

என்றாலும், எனக்கு வாய்ப்பு கிடைத்தபோதெல்லாம் இவ்விருவரையும் வீடு சென்று சந்திப்பதை வழமையாகக் கொண்டிருந்தேன். தற்போது மறைந்துள்ள சாபு மாமா (அப்பு மாமா) அவர்களை அடிக்கடி சந்திக்கும் வாய்ப்பையும் பெற்றேன்தான்! என்றாலும், அவர்களின் இப்பிரிவு, “ஒவ்வொரு நாளும் அவர்களைச் சந்தித்திருக்கலாமோ...?” என என்னை ஏங்க வைத்துவிட்டது.

பழங்கால அரிய பெரியவர்களின் புகைப்படங்களை இவர்கள் சேர்த்து வைத்துள்ள பாங்கே அலாதி. என் தந்தை ஹயாத்தாக இருந்த காலத்தில் இருவருக்கும் நன்றாக ஓடும். பேசி முடித்து இவர்கள் விடைபெற்ற பிறகு, அவர்களுக்குக் காண்பிக்க வைத்திருந்த பழைய படங்களை ஒவ்வொன்றாக ஆராய்வார்கள் என் வாப்பா... நிறைவில், “தூக்கிட்டுப் போயிட்டாரா...? தூக்கிட்டுப் போயிட்டாரா...?” என்று புலம்புவார்கள். பிறகு என்றாவது நேரில் கண்டு கேட்டால், அவர்களுக்கே உரிய வெடிச்சிரிப்பை பதிலாகத் தருவார்கள் சாபு மாமா...

அதேபோன்று, அவர்கள் வைத்திருக்கும் பழைய படங்களை என் தந்தையும் “சுட்டு”ச் செல்வது வழமை.

“நா ஊருல உள்ள கள்ளனுக்கெல்லாம் கூட இந்தளவுக்கு பயந்ததில்லை எஸ்கே... நீ வந்துட்டாத்தான் பக்கு பக்குன்னு அடிக்கிது...” என்பார்கள். இதைக் கேட்டு என் தந்தையும் சிரிப்பார்கள். “நான் சொல்ல வேண்டியதை நீங்க சொல்றீங்களாக்கும்?” என மறுதலிப்பார்கள் என் தந்தை அவர்கள்.

வல்ல அல்லாஹ்வின் கட்டளைக்கிணங்க மர்ஹூம் (அப்பு மாமா) அவர்கள் தமது இவ்வுலக வாழ்வை முடித்துக்கொண்டார்கள்.

அவர்களும், நாமும் நம் வாழ்நாளில் அறிந்தோ, அறியாமலோ செய்த பாவப்பிழைகள் அனைத்தையும் கருணையுள்ள அல்லாஹ் தன் அளப்பெரும் கிருபை கொண்டு பொறுத்தருளி, ஜன்னத்துல் ஃபிர்தவ்ஸ் எனும் உயர்சுவனத்தில், நபிமார் - ஸித்தீக்கீன் - ஷுஹதா - ஸாலிஹீனுடன் இணைந்திருக்கும் பாக்கியத்தை அவர்களுக்கும், நமக்கும் நற்கூலியாக வழங்கியருள்வானாக...

மர்ஹூம் அவர்களது பிரிவால் துயரிலிருக்கும் எனதன்பு சாச்சப்பா எஸ்.ஒய்.எஸ்.செய்யித் முஹம்மத் ஸாஹிப் ஆலிம் மஹ்ழரீ உள்ளிட்ட குடும்பத்தார் யாவருக்கும் அல்லாஹ் ‘ஸப்ரன் ஜமீலா’ எனும் அழகிய பொறுமையை வழங்கியருள்வானாக... ஆமீன்.

அனைவருக்கும் அஸ்ஸலாமு அலைக்கும் வரஹ்மத்துல்லாஹி வபரக்காதுஹ்.

துஆக்களுடன்,
எஸ்.கே.ஸாலிஹ்
மற்றும்
மர்ஹூம் எஸ்.கே.ஷாஹுல் ஹமீத் குடும்பத்தார்
கொச்சியார் தெரு, காயல்பட்டினம்.