IP: 175.*.*.* Sri Lanka

எனது இனிய மருமகன் என் நினைவில் வாழும் மிஸ்பாஹி அவர்களின் மண்ணறையை பார்க்கும் வாய்ப்பு அவர்கள் அடக்கஸ்தலத்தில் நின்று அவர்களுக்காக அல்லாஹ்விடம் பிரார்த்திக்கும் வாய்ப்பு எனக்கும் என் சகோதரர் அஹ்மத் சாஹிப் ஆலிம் அவர்களுக்கும் எனது மருமகன் மிஸ்பாஹி ஆலிம் அவர்களின் மிக நெருங்கிய சொந்தம் ரஹ்மத்துல்லாஹ் ஆலிம் அவர்களுக்கும் சென்ற வாரம் நாங்கள் புத்தளம் மத்ரஸாவை பார்த்து அங்குள்ள ஆலிம் அவர்களுடன் உரையாட சென்றபோது கிடைத்தது அல்ஹம்து லில்லாஹ்.

மிஸ்பாஹி ஆலிம் அவர்களின் ஆற்றலை இந்த சாமானியனால் வர்ணித்து கூற முடியாது.

ஏற்றுக் கொண்ட பதவிக்கெல்லாம் பெருமையை கொடுத்தார். தன் இனிய குடும்பம் ஒன்றுக்குத்தான் வறுமையை கொடுத்தார் என்று பேரறிஞர் அண்ணாவை பற்றி ஒரு கவிஞர் பாடுவார். எனக்கும் மிஸ்பாஹி அவர்கள் மண்ணறையில் நின்று து ஆ ஓதியபோது அதுதான் நினைவுக்கு வந்தது.

எனது தம்பி அஹ்மத் சாஹிப் அவர்களும் மிஸ்பாஹி அவர்களும் சவூதி அரேபியா தலைநகரில் பணியாற்றிய காலங்களை தம்பி அப்போது நினைவு கூர்ந்தார். அவரது அரபி ஞானம் திருமறை செல்வனாக ஒரே ரகத்தில் 30 ஜூசுவை ஓதி தராவீஹ் தொழுகவைத்து கொழும்பில் சாதனை படைத்தது, அரப் நியூஸ் பத்திரிக்கையில் அவரது கட்டுரைகள்,அரபி செய்தித்தாள்களில் அவர்களுடைய ஆளுமை வெளிப்பாடு எல்லாமே பரவலாக பேசி அசைபோட்டுக் கொண்டு வந்தோம்.

அப்படிப் பட்ட பெருமகனாரின்திடீர் மறைவைப் பற்றி அங்குள்ள ஆலிம் பெருந்தகை அவர்களிடம் கேட்டேன். அவர்கள் சொன்ன பதில். ''உடல் நோய்க்கு மருந்து சாப்பிடலாம் ஆனால் மன அழுத்தத்துக்கு மருந்து'' இல்லை என்று சொன்னார்கள். அவர்களுக்கிருந்த மன அழுத்தத்தை அல்லாஹ்வே அறிவான்.

இப்போது அவரது அன்பு மகள் எழுதியுள்ள கட்டுரையும் அப்படி ஒரு மன அழுத்தத்தை இந்த சமுதாயம் படும் அவலத்தை நினைத்து ரொஹிங்கா முஸ்லிம்களை நினைத்து சகோதரிக்கு கொடுத்து விடுமோ என்று பயப்படும் அளவுக்கு கட்டுரை விரிந்து செல்கிறது.

இவ்வளவு செய்திகளை இந்த பெண்மணியால் எப்படி சேகரிக்க முடிந்ததது. என்று நான் நினைத்துப் பார்த்தபோது மிஸ்பாஹி அவர்களின் சாயல் அவர்களின் நிழலாக சகோதரி இருப்பது நிதர்சனமாக தெரிந்தது .

நாம் கவலைப் படலாம் து ஆ செய்வதை தவிர வேறொன்றும் செய்ய முடியாத நிலையில் உள்ளோம். பணம் படைத்த அரபு நாடுகள் எங்கே சென்றன அமீரகங்களின் வானளாவிய கட்டிடங்களை உருவாக்கி பெருமை பேசிக் கொண்டிருக்கும் மன்னர்கள் இந்த மக்களின் விடியலுக்காக என்ன செய்து கொண்டிருக்கிறார்கள். ஐக்கிய நாடுகள் சபை என்ன செய்து கொண்டிருக்கிறது. இவர்களுக்கு மறுவாழ்வளிக்க அவர்கள் ஒன்றும் செய்யாமல் இருக்கும்போது மிக சாமானியர்கள் நாம் என்ன செய்ய முடியும்.

சகோதரி அவர்களே உங்கள் ஆதங்கம் புரிகிறது. நீங்கள் எழுதியிருப்பது பேனாவின் மை அல்ல, குருதி என்று கட்டுரை முடிகிறது. உங்களை இன்னொரு மிஸ்பாஹியாக நான் பார்க்கிறேன். ஆனால் மன அழுத்தத்தால் சிறுவயதிலேயே மறைந்து விட்ட எனது மருமகனாக நீங்கள் ஆகி விடாதீர்கள். அல்லாஹ் பாது காப்பானாக!

உங்களை போன்ற பெண் எழுத்தாளர்கள் இந்த சமுதாயத்துக்கு நிறைய தேவைப் படுகிறார்கள் அவர்களை உருவாக்கும் அற பணியில் உங்களை ஈடுபடுத்திக் கொள்ளுங்கள். உங்கள் ஆதங்கம் இந்த சாமானியனுக்கு புரிந்தபோது எல்லாம் படைத்தது பரிபாலித்து ஆட்சி செய்து கொண்டிருக்கும் அல்லாஹ்வுக்கு தெரியாதா...?

விரைவில் ஒரு வெள்ளி முளைக்கும் இந்த மாயத்திரை விலகும்...ரோஹிங்கியா முஸ்லிம்களுக்கு நல்வாழ்வு கிடைக்கும். அல்லாஹ் நமது து ஆக்களை கபூல் செய்வானாக ஆமீன்.