IP: 122.*.*.* India

ஹாஜி காயல் எஸ்.ஈ. அமானுல்லாஹ் அவர்களுக்கு,

அஸ்ஸலாமு அலைக்கும்,

இன்று காலை ஐக்கிய பேரவை ஏற்பாட்டில் நடந்த கூட்டம் குறித்த செய்தி காயல்பட்டணம்.காம் இணையதளத்தில் வெளியாகியிருந்தது. இது குறித்த தங்கள் தன்னிலை விளக்கத்தில் எழுப்பப்பட்டுள்ள சில கேள்விகளுக்கு விளக்கம்:

ஐக்கிய பேரவை கூட்டம் குறித்த செய்தி அவசர கோலத்தில் வெளியிடப்படவில்லை என்பதனை தெரிவித்துக்கொள்கிறோம். கூட்டத்தில் கலந்துக்கொண்ட ஒன்றுக்கும் மேற்பட்டவரிடம் ஊர்ஜிதம் செய்யப்பட்டே அச்செய்தி வெளியிடப்பட்டது.

வாக்கு என்ற வாசகம் தீர்மானத்தில் இல்லை என்று தாங்கள் தெரிவித்துள்ளீர்கள். அச்செய்தியில் தீர்மான வாசகங்கள் எதுவும் வெளியிடப்படவில்லை. கீழ்க்காணும் பொருளில் தீர்மானங்கள் நிறைவேற்றப்பட்டன என்றே தெரிவிக்கப்பட்டுள்ளது.

ஐக்கிய பேரவையால் அமைக்கப்படும் தேர்தல் குழுவுக்கு - ஒரு ஜமாஅத்தில் இருந்து இரு பிரதிநிதிகளும், ஒரு சமூக அமைப்பில் இருந்து ஒரு பிரதிநிதியும் தேர்வுசெய்யப்படுவர் என்ற முடிவு அக்கூட்டத்தில் எடுக்கப்பட்டுள்ளது. இரு பிரதிநிதி என்ற சொல்லுக்கு, இரு வாக்கு என்ற பொருள் பொருந்தாதா? நகர்மன்ற தேர்தலில் நிற்க விரும்புவோரின் மனுக்களை பரிசீலிக்கும் ஐக்கிய பேரவையின் தேர்தல் குழு, ஒருமித்த கருத்து இல்லாத பட்சத்தில், தனது முடிவை எவ்வாறு எடுக்கும்? அக்குழுவில் இடம்பெற்றுள்ளவர்களின் பெருவாரியானவர்களின் ஆதரவு அடிப்படையில்தானே? அப்படியெனில் பிரதிநிதிக்கும், வாக்குக்கும் வித்தியாசம் இல்லைதானே?

மேலும் 25 பேர் நியமனம் குறித்த வாசகத்தில் - அவர்கள் ஐக்கிய பேரவையை சார்ந்த 25 பேர் என்று குறிப்பிடவில்லை. ஐக்கிய பேரவை சார்பில் 25 பிரதிநிதிகள் நியமிக்கப்பட்டு என்றே தெரிவிக்கப்பட்டுள்ளது.

மேலும் - பிரதிநிதித்துவம் பெறும் ஜமாஅத்துக்கள், சமூக அமைப்புகள் விபரங்கள் வெளியிடப்படவில்லை என்று கூட்ட நடப்பே செய்தியில் தெரிவிக்கப்பட்டது. மேலும் - சமூக அமைப்பு என்று எந்த தகுதியில் தீர்மானிக்கப்படும் என்ற அளவுகோல் (துவக்கப்பட்ட ஆண்டு, செயல்புரியும் பகுதி, சேவை ஆற்றும் விஷயங்கள், அவைகளின் எண்ணிக்கை) அக்கூட்டத்தில் தெரிவிக்கப்படவில்லை என்ற நிகழ்வே அச்செய்தியில் சுட்டி காண்பிக்கப்பட்டது.

மக்கள் விளங்க வேண்டும் என்ற நோக்கத்திலேயே அச்செய்தி வெளியிடப்பட்டதேயன்றி வேறு நோக்கத்தில் அல்ல.