IP: 117.*.*.* India

பெருமதிப்பிற்கும், பேரன்பிற்குமுரிய DM மாமா அவர்களை நான் என் வாழ்நாளில் கோப முகத்தோடு ஒரு வினாடி கூட பார்த்ததில்லை... அவர்களின் அழகான புன்சிரிப்புடன் கூடிய முகத்தை ஒரு வினாடி கூட பார்க்கத் தவறியதுமில்லை.

அன்பே உருவான அவரது அரவணைப்பு அனைவரையும் வியப்பிலாழ்த்தும் அரிய பண்பாகும். இந்த அவசர உலகத்திலும் இவர்களைப் போன்ற கண்ணியவான்கள் வெகு சிலரே இறையருளால் இக்குணத்தைக் கொண்டுள்ளனர்.

நல்லவற்றுக்கு அள்ளியள்ளி கொடுப்பவர்...

தனது மாணிக்க வணிகத்தில், அனைத்து வணிகர்களிடையேயும் நல்ல மதிப்பையும், மரியாதையையும் பெற்றிருந்தவர்...

நேர்மை, நாணயம் என்பதை மக்கள் இவரிடமிருந்து கற்றுக்கொள்ள வேண்டும் என்று சொல்லுமளவுக்கு வாழ்ந்து காட்டியவர்...

விலை மதிக்கவியலாத மாணிக்கக் கல்லை, அதன் உண்மையான தரத்தை அறிந்திடும் பொருட்டு இவரை நாடியே அனைவரும் கொண்டு வந்து காட்டுவர். அவ்வாறு யார் கொண்டு வந்தாலும், அப்பொருள் எப்படியாவது தன்னிடத்தில் வந்து சேர வேண்டும் என்ற - வியாபாரிகளின் பொதுவான எண்ணங்களுக்கு (விதிவிலக்கானவர்களும் உண்டு!) அப்பாற்பட்டு, அந்த உயர்விலை கொண்ட கல்லின் உண்மையான தரத்தை உரியவரிடம் மனந்திறந்து சொல்லி, பிறர் சம்பாதிப்பதைப் பார்த்துப் பார்த்து மகிழ்ந்தவர்...

எல்லா ஆத்மாவும் மரணத்தைச் சுவைத்தே ஆக வேண்டும் என்ற இறை நியதி இவர்களுக்கும் பொருந்தத்தானே செய்யும்...? தாங்க முடியாதுதான்... ஆனால் தாங்கித்தானே ஆக வேண்டும்...?

அவர்களின் அன்பு மக்களான என் நெஞ்சில் நிறைந்த உவைஸ் காக்கா, நண்பன் முஹம்மத், நண்பன் பிலால் உள்ளிட்டோருக்கும், நான் மிகுந்த மரியாதை வைத்திருக்கும் மர்ஹூம் அவர்களின் அன்பு மருமகனார் ஷேக் அலீ ஹாஜியார் மற்றும் குடும்பத்தார் அனைவருக்கும் வல்ல அல்லாஹ் அழகிய பொறுமையைத் தந்தருள்வானாக...

கிருபையுள்ள ரஹ்மான், மர்ஹூம் அவர்கள் அறிந்தோ, அறியாமலோ செய்த பாவங்களை அவனது வற்றாத கருணையால் பொறுத்தருளி, அவர்களின் சிறியது முதல் பெரியது வரையிலான அனைதது நற்காரியங்களையும் கபூல் செய்து, ஜன்னத்துல் ஃபிர்தவ்ஸ் எனும் உயர் சுவனத்தை அவர்களுக்கு வழங்கி, அவர்களோடு அண்டியிருக்கும் பாக்கியத்தை அவர்களின் குடும்பத்தாருக்கும், அவர்களை நேசிக்கும் நம் யாவருக்கும் தந்தருள்வானாக... ஆமீன்.

கண்ணீருடன்,
எஸ்.கே.ஸாலிஹ் மற்றும் எஸ்.கே.குடும்பத்தினர்