Kayal on the Web

எழுத்து மேடை

அனைத்து எழுத்து மேடை ஆக்கங்களையும் காண	\|	எழுத்து மேடை வாசகர் கருத்துக்களை காண
எழுத்து மேடை ஆசிரியர்கள்

ஆக்கம் எண் (ID #) 94

#KOTWEM94

வெள்ளி, ஜுலை 5, 2013
	உம்மாவின் விழிநீர் பார்! ஆக்கம்: கவிமகன் எம்.எஸ்.அப்துல் காதர் கவிஞர் / சமூக பார்வையாளர் இவரின் அனைத்து ஆக்கங்களையும் காண இங்கு அழுத்தவும் >>

இந்த பக்கம் 2859 முறை பார்க்கப்பட்டுள்ளது | வாசகர் கருத்துக்கள் காண (4) <> கருத்து பதிவு செய்ய

(ஒப்புதலுக்காக காத்திருக்கும் கருத்துக்கள் - 0; நிராகரிக்கப்பட்ட கருத்துக்கள் - 3)

click here to post your comment using facebook

{ முகநூல் கருத்துக்கள்}{ட்விட்டர் கருத்துக்கள்}

அன்பான சகோதர, சகோதரிகளே...

அண்மைக் காலமாக நமதூரில் விபத்துக்களின் எண்ணிக்கையும், அவற்றால் ஏற்படும் உயிரிழப்புகளின் எண்ணிக்கையும் அதிர்ச்சியூட்டும் வகையில் அதிகரித்து வருவதை, செய்திகள் வாயிலாக அறிய முடிகிறது.

மதியை விட்டுவிட்டு, விதி மேல் பழி போடும் இந்த விபத்துகள் குறித்த செய்திகளால் மனம் நொந்து போன நான் அதை ஒரு கவிதையாக இங்கே வடித்துள்ளேன்...

விபத்தில் மகனைப் பறிகொடுத்த ஒரு தாயின் உள்ளக் குமுறலை வெளிப்படுத்தும் வகையில் அமைந்துள்ள இவ்வரிகளால், 10 இளைஞர்களேனும் படிப்பினை பெற்று முறைப்படி நடப்பார்களாயின், 10 உயிர்களைக் காப்பாற்றிய மகிழ்ச்சி எனக்கு நிச்சயம் கிடைக்கும் என்ற நம்பிக்கையோடு இக்கவிதையை உங்கள் பார்வைக்கு வைக்கிறேன்...

பெற்ற வயிறு பற்றி எரிகிறது...
காரணம் நெருப்பு என்றால்
கனப் பொழுதில் அணைத்திடுவேன்
இது வேறன்றோ - நீ என்
உயிரின் வேரன்றோ!

உதிரத்தை உணவாக்கி
உயிர்க்கூட்டில் உரு செய்து
வலிதாங்கிப் பெற்றேனே
வாட்டிடும் என் வேதனை பார்!

அசைவற்ற வெறுங்கூடாய்
ஆசைமகன் பிணமாகத்
திரும்புகையில் திரியின்றி
எரியுதடா தாய் மனது...

எங்கோயோ நீர்க் கரையில்
ஒதுங்கிவிட்டாய் எனக்கேட்ட
உம்மாவின் இதயத்தில்
இடி ஒன்று இறங்குவதை
எப்படி நீ அறிந்திடுவாய்
இல்லாமல் போனாயே!

விதியோடு விளையாடிவிட்டு
விதி விளையாடியது என்ற
வீண் பழி எதற்காக?
ஒட்டகத்தைக் கட்டிவிட்டு
அல்லாஹ்வை துஆ செய்ய
அண்ணல் நபி எடுத்துரைத்த
அழகு மொழி ஏன் மறந்தாய்?

இன்பமிகு பயணத்தை
அந்திமப் பயணமாக்கும்
ஆபத்தின் சூழ்ச்சிகளை
அறிந்திருந்தும் நிராகரித்தாய்!
இளங்கன்றே பயமறியாய்
இழப்பெனக்கு உனக்கென்ன?

சொன்னேன் உன் தந்தையிடம்
சண்டாளன் கேட்டானா?
பன்னிரண்டு வயதுனக்கு
பைக் வாங்கித் தந்தானே!
சாலைவிதி மதிக்காமல்
சாக்காட்டில் நீ விழுந்து
சந்தூக்கில் போகையிலே
நொந்தழுது என்ன பயன்?

கட்டி வைத்த ஆசையெல்லாம்
கனவெனவே கலைந்ததடா!
கொட்டி வைத்த செல்வமெல்லாம்
குப்பையிலே வீசுதற்கா?

எனதருமை இளம்பிறையே ...
இனம் காக்கும் தலைமுறையே..
மனம் போன போக்கினிலே
மதி கெட்டு போகாதே!

உனைநம்பி உன்பெற்றோர்
வீட்டினிலே காத்திருக்க
உன்மத்தம் தலைக்கேறி
ஊர் சுற்றப் போகாதே!

உத்திரவு இடவில்லை...
வேண்டுகோள் மாத்திரமே!

கன்றிழந்த பசு நானே
கண்ணே! நீயுமென் சிசுதானே!

வாழிய நீ நூறாண்டு
வழித்துணையாய் இறை உண்டு!

இவ்வாக்கம் குறித்த கருத்தை பதிவு செய்ய இங்கு சொடுக்கவும் >>
இறுதி கருத்துக்கு செல்ல இங்கு சொடுக்கவும் >>

1. ஒரு அபலைத் தாயின் விசும்பல்...
posted by: M.N.L.முஹம்மது ரபீக், (காயல்பட்டினம்.) on 05 July 2013
IP: 59.*.*.*

India | Comment Reference Number: 28410

விடலைகள் விவரமறியாது விபரீதத்தில் விளையாட, விதியும் கூட வந்து விளையாடி இன்னுயிர் பிரிந்து மண்ணுக்குள் புதைக்கப்படுகின்றனர். அவரது காலம் முடிந்துவிட்டது. ஆனால் காலமெல்லாம் கண்ணீர்த் துளிகள் காயாமல் கவலையுற்று கலங்கி வாடுவது பெற்றோர் உள்ளமே! வளர்த்து வாலிபமாக்கி உன்னை வாழ வைத்துப் பார்க்காமல் நொடிப்பொழுதில் மரணத்தை ஏற்று வாங்கி நொறுங்கிப்போவது நீங்கள் மட்டுமல்ல நீங்கா துயர் கொள்ளும் உங்கள் பெற்றோரும்தானே?

கவிமகனே! நீயும் ஒரு தந்தைதான் எனவேதான் உன் உள்ளக் குமுறல்கள் ஓராயிரம் கூர்முனை கொண்ட ஆணியாக எம் மனதில் பதித்து வைத்து விட்டாய்! இளங்கன்றுக்கு பயமேது? இக்கவிதையைக் கண்ட பலனால் இனி ஆபத்தை விலை பேச ஒருவரும் ஒருபோதும் முன்வராமாட்டார். பக்குவமில்லா பாலகர் வயதில் கடிவாளமில்லா பைக் எனும் அரக்கனை மறந்தும் கூட கொடுக்க மாட்டார் மதிப்புமிக்க பெற்றோர்கள்.

கவிதைதான் இதயத்தை முள்ளாய் தைக்கிறது எனில் புகைப்படமும் எம் நெஞ்சத்தைப் பொசுக்குதய்யா... வேண்டாம் பெற்றோரே...! இந்த விபரீத வினையாட்டம். பிள்ளைகளின் இன்னுயிர் மதிப்பு ஈன்றவர்க்கே தெரியும். இளங்கன்றுகளுக்கு அல்ல!

-ராபியா மணாளன்.

இந்த கருத்து உங்களுக்கு பிடித்துள்ளதா?

[இவரின் பிற கருத்துக்களை காண இங்கு சொடுக்கவும்]

2. Re:...கனக்கும் இதயமுடன்.....
posted by: Muhammad Nooh KA (Sharafiyyah, jeddah) on 05 July 2013
IP: 176.*.*.*

Saudi Arabia | Comment Reference Number: 28412

இதயமது கனத்து டேன் படித்தேன் கவிமகன் ஆக்கம்... கவி வரிகள் பார்வைக்கு புலப்பட வில்லை எம் கண்ணீரின் தாக்கம்...

பெற்ற தாயின் உற்ற தனயன் உயிர்விட்ட சோக விசும்பல் கேட்க்குமா...

உன்மத்தம் பிடித் தலையும் இளங்காளையர் களுக்கு... தம்முயிர் மதியா இளையோர் பிற உயிர் காக்க வேணும்...அவர்தம்....

பெற்றோர் உற்றோர் அமானிதம் காத்து மன சஞ்சலம் போக்க 'வேணும்...

ஓ...விடலையரே....இளைஞ்சர்களே....
வரம்பு மீறாதீர்.....
வாழ்வை தொலைக்காதீர்...
அழகிய மரணம் இருக்கும்போது....
அகால மரணமென்ன அவசியம் நமக்கு..
சிந்திப்பீர் ! சிறப்புயர்வீர் !!

இந்த கருத்து உங்களுக்கு பிடித்துள்ளதா?

[இவரின் பிற கருத்துக்களை காண இங்கு சொடுக்கவும்]

3. Re:...என் கல்லறைமேல்,
posted by: OMER ANAS (DOHA QATAR..) on 06 July 2013
IP: 37.*.*.* | Comment Reference Number: 28416

ஆஹா,இதை படிக்கும் இளைஞ்சர்களை மட்டும் இன்றி, படித்தோர் அனைவர்களின் இதயங்களையும் ரணமாக்கி விட்ட,கவிதை!

இது கவிஞனின் உள்ளத்தைக்கூட ரணமாக்கிய நிஜம். எமக்கெல்லாம் சுட்டுப்போட்டாலும் இதுபோன்ற கவிதை வராது. இருந்தாலும்,

ஓ...இளைஞ்சர்களே....
இறப்புக்கு முன் உங்கள்,
பிறப்புக்கு ஒரு,
அடையாளம் வேண்டும்.
இனியாவது புரிந்து கொள் இளைஞ்சனே...!

பெற்ற தாயின் பாசம்:
----------------------
என் கல்லறைமேல்
உன் பெயரை
எழுதிவை !!!
மகனே நீ
நினைப்பதற்கு அல்ல!!!
அங்கும்
உன்னை நான்
சுமப்பதற்கு!!!

இந்த கருத்து உங்களுக்கு பிடித்துள்ளதா?

[இவரின் பிற கருத்துக்களை காண இங்கு சொடுக்கவும்]

4. Re:...
posted by: முத்துவாப்பா (al khoar) on 06 July 2013
IP: 46.*.*.*

Saudi Arabia | Comment Reference Number: 28422

ஈன்ற பொழுதின் பெற்ற வலியை விட
தன் மகனை இழந்து வாடும் ஒரு தாயின் வலியை
தன் வைர வரிகளால் உணர்விற்கு உயிரூட்டி
விடலயர்களுக்கு வழிகாட்டி - படிக்கையில்
அனைவரின் விழியிலும் செந்நீரோடு முடிகின்றது
கவிமகன் அவர்களின் உம்மாவின் விழிநீர்......

இந்த கருத்து உங்களுக்கு பிடித்துள்ளதா?

[இவரின் பிற கருத்துக்களை காண இங்கு சொடுக்கவும்]

முதல் கருத்துக்கு செல்ல இங்கு சொடுக்கவும் >>
இவ்வாக்கம் குறித்த கருத்தை பதிவு செய்ய இங்கு சொடுக்கவும் >>

முகநூல் வழி கருத்துக்கள்