IP: 116.*.*.* India

சகோதரர் அபூபக்ரின் உரை வரவேற்புக்குரியது. இது போன்ற முதிர்ச்சி வாய்ந்த சொற்கள் மகிழ்ச்சியளிக்கின்றது. அவை செயல்வடிவம் பெறும்போது இன்னும் மன நிறைவளிக்கக்கூடியதாக இருக்கும். இன்ஷா அல்லாஹ் அபூபக்ர் அவர் பிறந்த காயல்பதிக்கும் தமிழ்மண்ணுக்கும் பெருமை சேர்க்க இறையை வேண்டுவோம்.

இத்தருணத்தில் அபூபக்ர் சார்ந்துள்ள பழமை வாய்ந்த சமுதாயக்கட்சி முஸ்லிம் லீக்கிற்கு சில செய்திகள் சொல்லப்பட வேண்டியுள்ளது. அக்கட்சிக்கு தன் செந்நீராலும், உப்பு நீராலும் உரம் சேர்த்த கண்ணியத்திற்குரிய காயிதே மில்லத் அவர்களின் தனித்தன்மையை விட்டுக்கொடுக்காத தொலைநோக்குடைய பேரம் செய்யும் திறனையும் அக்கட்சி கற்க வேண்டும்.

எத்தனை திறமைகள் அவருக்குள் மலையென குவிந்திருந்தாலும் உயர்விலும் தாழ்விலும் அல்லாஹ்வின் முன் பணிந்ததனால்தான் அந்த மாமனிதர் வாழும்போதும் வாழ்ந்தார் இறந்த பின்னரும் வாழ்கின்றார். அவரின் சீரிய வழிமுறைகளை மீண்டும் கட்சி கடைப்பிடிக்க வேண்டும்.

முஸ்லிம் லீக் கட்சியானது தனது வாழ்விற்கும் வளர்ச்சிக்கும் திராவிடக்கட்சி ஒன்றினை மாத்திரம் காலாகாலத்திற்கும் சார்ந்திருப்பது சரியா என ஆலோசிக்க வேண்டும் .பெயரில் முஸ்லிம் லீக் என்றிருப்பதினாலேயே முஸ்லிம்களின் பிரச்சினைகளை மாத்திரம் பேச வேண்டும் என்பதில்லை. மானுடத்தை பாதிக்கும் அனைத்து பிரச்னைகளிலும் நமக்கென ஒரு பார்வையும், வியூகமும் வேண்டும்.

ஹிந்து மஹா சபை, ஆர்.எஸ்.எஸ். ஆகியவற்றின் பிரித்தாளும் அரசியலின் எதிர்வினைதான் முஸ்லிம் லீக். ஆனால் அவ்விரண்டு கட்சிகளும் தங்களின் தங்களின் குறுகிய தன்னலமிக்க சீர்குலைவு நிகழ்ச்சி நிரலை இந்திய பொது குடிமகனின் மொத்த பிரச்சினை போல சித்தரிப்பதில் வெற்றி பெற்றுள்ளனர்.

ஆனால் நாட்டின் விடுதலைக்குப்பிறகு முஸ்லிம் லீக்கோ வரலாற்றின் எதிர்திசையில்தான் பயணம் செய்து வந்திருக்கின்றது. அவை இனி கடந்த காலங்களாக இருக்கட்டும். முஸ்லிம் லீக் தனது பாதையையும் பயணத்தையும் நன்கு மீளாய்வு செய்து வரலாற்றின் சிறையிலிருந்து விடுதலை பெற வேண்டும்.