IP: 180.*.*.* India

காயல்பட்ணம் இணைய தளத்தில் இது வரை வாசகர் மடல் மூலம் தனது முத்தாய்ப்பான கருத்துக்களை பொழிந்து வந்த ஷுஅய்ப் காக்கா அவர்கள் முதல் முறையாக கட்டுரை எழுதியுள்ளார்கள். எனது எழுத்தாள சகாவின் வருகை நல்வரவாகுக!

வாழ்வாதார பிரச்சினையை முழுத்தரவுகளுடனும் வைத்து வெளுத்து கட்டியுள்ளார். அவர் எழுதிய கட்டுரை மணி கிரீடத்தில் ஒரு வைரத்தை பொறித்த மாதிரி உள்ளது. வாழ்த்துக்களும் பாராட்டுக்களும்!

அடுத்து ஓர் உலகப் போர் மூள்வதாக இருந்தால் அது தண்ணீருக்கான போராகத்தான் இருக்கும் என வல்லுனர்கள் தெரிவிக்கின்றனர்.

மாமழை மாமழை போற்றுதும் மாமழை போற்றுதும் , நீரின்றி அமையாது உலகு என்பன போன்ற நீரியல் கருத்துக்கள் தமிழர்களின் வாழ்வில் தொன்று தொட்டே நீங்கா இடத்தை பிடித்திருக்கின்றன.

ஆனால் அணு குண்டையும், செயற்கை கோளையும் வல்லரசுக்கான அளவு கோளாக கருதும் நம் தாய் திரு நாட்டில் ஒரு குடிமகனுக்கு தூய்மையான போதுமான பாதுகாக்கப்பட்ட குடிநீரை அரசினரால் வழங்க முடியவில்லை என்பது பேரவலம்தானே !! அது ஒரு தோற்ற அரசுதானே !!!

சென்னையில் வினியோகிக்கப்படும் மாநகராட்சி தண்ணீரானது எப்போது வரும் என்ற உத்திரவாதமில்லை. வந்த நீரிலும் கழிவு நீர் கலக்கவில்லை என்பதை உறுதியாக சொல்ல முடியாது.

தனியார் விற்கும் குடம் நீர் , குடுவை நீரையாவது வாங்கலாம் என்றால் அதன் விலைகளும் கட்டுப்படியாகவில்லை. அப்படியே அவர்கள் கேட்கும் காசை கொடுத்தாலும் உரிய நேரத்தில் நீர் வந்து சேராது. பல முறை தொலைபேசியில் மன்றாடிய பிறகுதான் குடமும் குடுவையும் வந்து சேரும்.

அன்றாட தொழில் அலைச்சலுடன் நீருக்கான உளைச்சலும் கூடுதல் சுமையாக தலையில் வந்து உட்கார்ந்து கொள்கின்றது. இது எனது சொந்த பட்டறிவு.

சென்னையில் நீர் நிலைகள் இருந்தும் வருடாந்திர பருவ மழையானது தேவைக்கு மேல் பொழிந்தும் பயனில்லை. இன்று சென்னை நகரம் தனியார் தண்ணீர் லொறி மாஃபியாக்களின் பிடியில் சிக்கி தவிக்கின்றது.

அது போல் நமதூர் சுற்று வட்டாரத்தில் இருந்த நீர் நிலைகளை இன்று காணவில்லை. ( எ.கா ) கடல் போல் அலையடிக்கும் நல்லூர் குளம், குளிக்க குளிக்க இன்பமூட்டும் சுனை.

பொதுவாக நமது மாவட்டம் மழை மறைவு மாவட்டமாகும். இந்த நிலையில் நமது மாவட்டத்தில் உள்ள தனியார் ஆலைகள் சட்டத்திற்கு முரணாக நிலத்தடி நீரை பென்னம் பெரும் தொட்டி உருளை லொறிகளை வைத்து உறிஞ்சுகின்றன. இது இப்படியே தொடர்ந்தால் நமது மாவட்டமும் வறண்ட பாலையாகி விடும்.

வற்றாத உயிர் நதியான தாமிரபரணியிலிருந்து நமக்கு தேவையான தண்ணீரை குடிநீர் வடிகால் வாரியம் வழங்கி வருகின்றது. ஆனால் தண்ணீர் மாஃபியாக்களை ஊக்குவிக்க கொழுத்து கொள்ளையடிக்க நகராட்சியில் உள்ள சில அழுகிய சக்திகள் அரசு வழங்கும் நீரை தடுத்து வருவதாக செய்திகள் வருகின்றன.

ரத்தம் சிந்தும் யுத்தம் நடத்திதான் நமது அடிப்படை தேவையான தண்ணீரை பெற முடியும் அல்லது மீட்க முடியும் என்கின்ற நிலை வந்து விடுமோ என்ற அச்சம் நம் மனதில் அலையடிக்கின்றது.

இந்த நேரத்தில் தொலை நோக்குள்ள நமது முன்னோர்களை நினைக்காமல் நன்றி செலுத்தாமல் இருக்க முடியவில்லை. அவர்கள் உருவாக்கித் தந்த மறு சுழற்சி முறையிலான கழிவு நீர் தொட்டிதான் நமதூரின் நிலத்தடி நீர் மட்டத்தை பாதுகாத்து வருகின்றது.

நீரை தந்த அல்லாஹ்வின் அருட்கொடைக்கு நன்றி செலுத்துவோம். தண்ணீரின் அருமை அறிந்து அளவாக செலவழிப்போம்.