IP: 117.*.*.* India

பொதுவாக விளையாட்டுத் துறையில் ஒருவர் புகழ்பெற்றுவிட்டால், அவரிடமிருந்து மார்க்க ஒழுக்கங்கள், நற்குணங்கள், மனிதாபிமானப் பண்புகள் கொஞ்சங்கொஞ்சமாக விடைபெறும் இக்காலகட்டத்திலும், கைப்பந்து விளையாட்டில் தனக்கென தனி முத்திரையையும், ரசிகர் பட்டாளத்தையும் கொண்டிருந்த சகோதரர் முஹம்மத் லெப்பை என்ற மம்மாலெப்பை காக்கா அவர்கள், ஒழுக்கத்தின் உறைவிடமாக வாழ்ந்து மறைந்துள்ளார்கள்.

அன்னாரோடு, எங்கள் ஈக்கியப்பா தைக்கா மைதானத்தில் அதிக நாட்கள் கைப்பந்து விளையாடிய அனுபவமும், அவர் நடுவராகப் பணியாற்றிய பல போட்டிகளைக் கண்டு களித்த அனுபவமும் எனக்குண்டு. (அவர் விளையாடுவார்; நான் களத்தில் இருப்பேன். அவ்வளவுதான்!)

சாதாரணமாக தனது உள்ளங்கையால் சர்வீஸ் தட்டுவது போலிருக்கும். பந்து நம்மைக் கடக்கும்போது - ‘விர்’ரென காற்றைக் கிழித்துப் பறப்பதை வைத்துதான், பந்து நம் முகத்தில் படாததை எண்ணி பயத்துடன் கூடிய மகிழ்ச்சி ஏற்படும். அத்தனை அற்புதமான சர்வீஸ். முக்கி, முனங்கி விளையாடும் வீரர்களுக்கிடையில், இவர் களமிறங்கி விட்டாலோ எதிரணி தனது தோல்வியை துவக்கத்திலேயே மனதளவில் ஒப்புக்கொள்ளும்.

மார்க்கத் துறையிலும் மம்மாலெப்பை காக்கா அவர்களுடன் பல நிகழ்ச்சிகளில் பங்கேற்ற அனுபவம் எனக்குண்டு.

நல்ல ஆத்மாக்களெல்லாம் நம்மை விட்டும் வேக வேகமாக விடைபெற்றுச் சென்றுகொண்டிருக்கும் நிலையில் இருக்கிறோம். அல்லாஹ் நம் யாவரையும் காப்பாற்றுவானாக.

மர்ஹூம் அவர்கள் தங்கள் வாழ்வில் அறிந்தோ, அறியாமலோ செய்த பாவப்பிழைகளை வல்ல அல்லாஹ் தன் பெருங்கிருபையால் பொறுத்தருளி, மறுமையில் ஜன்னத்துல் ஃபிர்தவ்ஸ் எனும் உயர் சுவனத்தை நற்கூலியாக வழங்கிடவும்,

அன்னாரின் பிரிவால் துயருற்றிருக்கும் குடும்பத்தார் அனைவருக்கும் ஸப்ரன் ஜமீலா எனும் அழகிய பொறுமையைத் தந்தருளவும் நான் மனதார துஆ செய்கிறேன்.

அனைவருக்கும் எனதன்பான அஸ்ஸலாமு அலைக்கும் வரஹ்மத்துல்லாஹி வபரக்காதுஹ்...