IP: 117.*.*.* India

அஸ்ஸலாமு அலைக்கும் (வரஹ்).

சகோதரர் ஸாலிஹ் அவர்கள் இரண்டு படங்களை போட்டு அதன் தெருவையும், தேதியையும் எழுதி - அதற்கு வசனம் எழுதாமல் புதிய முறையை அறிமுகப்படுத்தி இருக்கிறார். இந்த தளத்தில் வரும் வசனக்கருத்தாக்களே! வசனம் எழுதுங்கள் வசை பாடாதீர்கள்.
--------------------------------------
சகோதரர், ஓர் உதாரணத்திற்காகத்தான் இந்த இரண்டு படங்களையும் போட்டிருக்கிறார்.

இதிலே குறிப்பிடப்பட்டிருக்கும் இரண்டு இடையூறுகளும் மறுநாளே அகற்றப்பட்டுவிட்டது அல்ஹம்துலில்லாஹ்.

முதல் படத்தில் உள்ள மண் ஓட்டுனர் செய்த தவறு என்றும், இரண்டாவது படத்தில் உள்ள கல், மண் இட நெருக்கடி காரணம் என்றாலும் அன்றே அவர்கள் கான்க்ரீட் போடும் இயந்திரத்தை கொண்டுவந்து வேலையை துரிதமாக செய்து முடித்து இருப்பதும் தெரிய வருகிறது.
---------------------------------------
வீடு கட்டக்கூடியவர்கள் செங்கற்கள், ஜல்லி கற்கள் , மண் என நடு ரோட்டில் கொட்டுகிறார்களே! என்று பலரும் வருத்தப்படுகிறார்கள் உண்மைதான்.

ஆனால் வீடு கட்டக்கூடியவர்கள் திறந்த வெளியில் / பெரிய மைதானத்தில் வீடு கட்டினால் கல்லையும், மண்ணையும் ரோட்டில் கொட்ட மாட்டார்கள்.

நம்முடைய தெருக்கள் எல்லாம் அகலமில்லாமல் சிறிய தெருக்களாக இருப்பதால் கல், மண் போன்றவைகளை கொட்டும்போது அவைகள் போக்குவரத்துக்கு இடையூறுகளை ஏற்படுத்துகிறது என்பதை மறுப்பதற்கில்லை.

எல்லோருமே கல்,மண் போன்றவைகளை தெருக்களிலேதான் கொட்டியாக வேண்டிய நிலை, அதை தடுப்பதற்கு எந்த வழியுமில்லை. ஆனால் அவைகளை முறைப்படுத்த வழிகளுண்டு.
----------------------------------------
எந்த வீட்டுக்காரரும் இப்படி நடுத்தெருவில் கொட்ட ஆசைப்படமாட்டார்கள். அப்படிக் கொட்டினால் , வாகனங்களால் இங்கும் அங்குமாக அவைகள் சிதறடிக்கப்பட்டு அவர்களுக்கு நஷ்டத்தை ஏற்படுத்தும். அப்படி தனக்குத்தானே நஷ்டத்தை ஏற்படுத்த யாரும் விரும்புவாரா?.

இப்படி நடுத்தெருவில் கொட்டிவிட்டு செல்வது வாகன ஓட்டிகள்தான் அதில் எந்தவித சந்தேகமும் இல்லை. இந்த அனுபவம் பலருக்கும் கிடைத்திருக்கிறது. இதை தடுப்பதற்கு ஒரே வழி கல், மண் வாங்குபவர்களிடம் கறாராக பேசவேண்டும் - தெருவில் இடையூறு ஏற்படுகிற மாதிரி போட்டு சென்றால் பணம் அல்லது கூலி தரமாட்டோம் என்று.

அப்படியும் ஒரு வேளை நடுத் தெருவில் போட்டுவிட்டு சென்று விட்டால் அதை நாம்தான் கூலிக்கு ஆள் வைத்து உடனே சரி செய்ய வேண்டுமே தவிர, பொது மக்களுக்கோ வாகனங்களுக்கோ இடையூறு வருகிற விதமாக விட்டு வைக்கக் கூடாது.
-----------------------------------------
அடுத்து சகோதரர் சாளை ஜியாவுதீன் அவர்கள் சொல்கிற மாதிரி அடுத்த வீட்டுக்காரர் கொடுக்கிற தொல்லை சொல்லி மாளாது. அவர் வீட்டு சுவரில் மண்ணோ, செங்கல்லோ படக்கூடாது என்பது மட்டுமில்லாமல் அவர் வீட்டுக்கருகிலும் போடக்கூடாது என்று கண்டிஷன் வேறு. இதை நம்ம ஊரில் பல இடத்தில் பார்க்கலாம்.

இந்த மாதிரியான சிரமங்கள் வீடு கட்டும்போது வரத்தான் செய்யும், பல ஆயிரங்கள் கொடுத்து கல், மண் வாங்குவோம் ஆனால் நூறு, இருநூறு கூலி கொடுத்து அதை ஓரமாக , ஒதுக்கி வைக்க சில சமயம் கஞ்சத்தனம் செய்வோம் இது சிலரிடம் உள்ள இயல்பு.

இப்படி முறைப்படுத்தி வைக்காததன் மூலம் அவர்களுக்குத்தான் நஷ்டம் என்பதை ஒவ்வொருவரும் உணர வேண்டும். மேலும் நாம் எல்லோருமே கட்டடங்களை கட்டும்போது அடுத்தவர்களுக்கு சிரமம் கொடுத்து அவர்கள் மனம் புண் படாமல் சந்தோஷமாக கட்ட வேண்டும் அதில்தான் நிம்மதி இருக்கும். நாம் நல்லவராகவே இருந்தாலும் பக்கத்து வீட்டுக்காரரை பகைத்து வீடு கட்டுவதில் மனம் நிம்மதி அடையாது அங்கே நாம் பொறுமையை கடை பிடிக்க வேண்டும்.
---------------------------------------
நகராட்சியின் நிர்வாகம் :-

இந்த மாதிரி இடையூறுகளை நகராட்சி நிருவாகம்தான் கட்டுக்குள் கொண்டுவரமுடியும்.

வீடு கட்டுபவர்களுக்கு பல கட்டுபாடுகளை விதிக்கலாம்:-

கல்,மண் எதுவாக இருந்தாலும் வாகனங்கள் செல்லும் பாதையை ( சிமெண்ட் , தார் ரோடுகளை ) தொடாமல் போடவேண்டும். வீடுகளின் சுவர்களை தொடாமல் ஓர் அடி இடை வெளி விட்டு முறையாக வைக்கவேண்டும்.

எந்த விதத்திலும் வீடுகளின் வாசல்களை மறைக்காமலும் , முடுக்குகளின் பாதையை மறைக்காமலும் இருக்க வேண்டும்.

செங்கற்கள் முறையாக அடுக்கப்பட வேண்டும் , சரிந்து விழுந்து சிறுவர்களுக்கோ - பாத சாரிகளுக்கோ விபத்து ஏற்பட்டுவிடக் கூடாது.

சாரங்கள் கட்டும்போதும் கூட தெருக்களில் நீட்டிக்கொண்டு போக்குவரத்துக்கு இடையூறாக இருக்கக்கூடாது. சிமெண்ட், தார் ரோடுகளை தோண்டி சாரங்களை நட்டக்கூடாது என்பது போன்ற விதிகள் வேண்டும்.

வீடுகளை இடித்த கற்களை தெருக்களிலே குவித்து போட்டு இடையூறு செய்யாமல் அதற்கென்று ஒரு வரைமுறை ஏற்படுத்தி - கால கெடுவும் கொடுக்க வேண்டும் இத்தனை நாட்களுக்குள் அதை அப்புறப்படுத்த வேண்டும் என்று.

இந்த மாதிரி பல விதிகள் இருக்கத்தான் செய்யும் ஆனால் நம் நிர்வாகம்தான் காலாகாலமாக செயல்படுத்துவதில்லை என்று நினைக்கிறேன்.

விதிகள் இருக்கோ! இல்லையோ!! இனியாவது புதிதாக விதி முறைகளை நேர்மையான முறையில், நம்முடைய ஊரின் கலாச்சாரத்தையும் மனதில் கொண்டு உருவாக்கி ஏற்றத்தாழ்வு இல்லாமல், பாகுபாடு பார்க்காமல் செயல்பட்டால் ஊருக்கும் நல்லது நமது சமுதாயத்திற்கும் நல்லது.

எல்லாம் வல்ல அல்லாஹ்! நம் ஊர் மக்களுக்கு பரந்த மனப்பான்மையை கொடுத்து ஒற்றுமையாக வாழ கிருபை செய்வானாக ஆமீன். வஸ்ஸலாம்.