IP: 106.*.*.* India

வைகறை பொழுது தொழுகை முடித்துவிட்டு நடைப்பயிற்சியில் செல்லும்போது இந்த இளவலின் மறைவு செய்தி கேட்டபோது அடிவயிற்றில் அமிலம் சுரந்தது. அவன் மற்றவர்கள் போல் பைக்கில் தாறுமாறாக அந்த அகால இரவு வேளையில் சென்றதாக தெரியவில்லை. தனது நண்பனுக்கு உதவி செய்வதற்காக சென்றிருக்கிறான் என்ற தகவல் கிடைத்தபோது அவனை பற்றிய தவறான மதிப்பீடு எனது உள்ளத்திலிருந்து நீங்கியது.

நவீன யுகத்தில் பைக்கின் தேவை இன்றியமையாதது என்றாலும் அதன் தாக்கம் நம் இளைஞர்களிடம் அதிகமாகவே பற்றிக் கொண்டு இருப்பதை காண முடிகிறது. ஒரு வண்டியில் நாலு பேர் செல்கிறார்கள் அதை ஓட்டி செல்பவனுக்கு 12 வயது கூட நிறைந்திருக்காது.

பெற்றோரை பிளாக்மெயில் செய்து பயமுறுத்தி பைக் வாங்கி கேட்கும் இளைஞர்களும் இருக்கிறார்கள்.

அதிக மதிப்பெண் பெற்று பரீட்சையில் தேர்வு பெற்றுள்ள மகனுக்கு பிரியம் மிகுதியால் அதை வாங்கி கொடுக்கும் பெற்றோர்களும் இருக்கிறார்கள்.

100 என்ற வேகத்தில் சென்றால் 108 என்ற வாகனத்தில் திரும்பி வரவேண்டியிருக்கும் என்று சொன்னாலும் அந்த இளமையின் வேகம் அவர்களை அப்படித்தான் ஓட்ட சொல்கிறது. அதிலே ஒரு த்ரில் ஒரு க்ளிக் இருப்பதாக அவர்கள் நினைக்கிறார்கள் .

தினசரி செய்தியாக போய்விட்ட இந்த சோக நிகழ்வுகளை தடுத்து நிறுத்த எத்தனையோ முயற்சிகளை பொது நல மன்றங்கள் மேற்கொண்டு வருகிறார்கள். காவல் துறையும் அவ்வப்போது அவர்களை நிறுத்து சோதனைகள் மேற்கொண்டும் வருகிறார்கள். ஆனாலும் இவர்கள் யாருக்குமே கட்டுப்படாமல் தறிகெட்ட வேகத்தில் இவர்கள் செல்கிறார்கள்.

பெரியவர்களுக்கு சட்டத்துக்கு கட்டுப்பட்டு நடக்கவேண்டும் சாலை விதிமுறைகளை பேணவேண்டும் என்று இவர்களுக்கு எவ்வளவுதான் சொன்னாலும் அவர்கள் நம்மை பார்த்து முறைக்கிறார்கள் .

தெருவீதியில் நடுவே பைக்கை நிறுத்திக் கொண்டு 4 - 5 பேர் கூடிக் கொண்டு பேசிக் கொண்டிருக்கிறார்கள் அவர்கள் அடுத்தவர்கள் வாகனம் செல்வதற்கும் நடந்து செல்பவர்களுக்கும் இடைஞ்சலாக இருக்கிறார்கள்.. தம்பி கொஞ்சம் ஒதுங்கி நிற்க கூடாதா என்று கேட்டால் நம்மை சுட்டெரிக்கும் பார்வையால் நாமே ஒதுங்கி செல்லவேண்டும் என்று எதிர்பார்க்கிறார்கள்.

இலங்கை போன்ற சிறிய நாடுகளில் கூட ஹெல்மெட் அணிவதை அரசு கட்டாயமாக்கி இருக்கிறது. இளைஞர்களும் அதற்கு மதிப்பளிக்கிறார்கள். சாலை விதிகளை மதிக்கிறார்கள். சில விதி விலக்குகள் இங்கும் உண்டு அங்கும் உண்டு விதிவிலக்குகள் வழிகாட்டலாக முடியாது.

இனி ஒரு விதி செய்வோம் எல்லோரும் சாலை விதிகளை பின்பற்றுவோம் . குறைந்த பட்சம் வெளியூர்களுக்கு செல்லும்போது பைக் போன்ற வாகனங்களை ஓட்டி செல்வதை தவிர்ப்போம் .

மகன் ஜமாலுதீன் அவர்கள் பெற்றோருக்கு மட்டுமா மகன் நம் எல்லோருக்கும் பிரியமுள்ள மகனே.... அவருடைய ஜனாஸாவில் கலந்து கொண்ட எல்லோர் மனதிலும் அப்படியொரு சோகம் ...முகங்களில் ஒரு வாட்டத்தை காண முடிந்தது...

ஒரு ஆலிமாக... ஒரு அறிஞனாக...ஒரு விஞ்ஞானியாக ஒரு ஆட்சி தலைவனாக எப்படி எல்லாம் ஆக வேண்டும் என்று அவனும் கனவு கண்டிருப்பான் அவனது பெற்றோரும் கனவு கண்டிருப்பார்கள்... ஆனால் அல்லாஹ்வின் நாட்டம் வேறாக இருந்திருக்கிறது... நாம் என்ன செய்ய முடியும் என்று எண்ணி ஸபூர் செய்து கொள்வோம்..

இதை எல்லோரும் ஒரு படிப்பினையாக எடுத்துக் கொண்டு நமது மக்களை வளர்ப்போம். நல்ல பண்புகளை பிஞ்சு வயதிலேயே அவர்களுக்கு ஊட்டி விடுவோம் . அல்லாஹ் மர்ஹூம் அவர்களுக்கு மேலான சுவர்க்க வாழ்வை நசீபாக்கி வைப்பானாக. அவரது மண்ணறையை வெளிச்சமாக்கி வைப்பானாக அவர்கள் பெற்றோருக்கு நல்ல சபூரை கொடுப்பானாக ஆமீன். உங்கள் இழப்பில் நானும் பங்கு கொள்கிறேன்.

மக்கி நூஹுத்தம்பி மற்றும் மக்கி ஆலிம் குடும்பத்தினர்கள்.