{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினத்தில் போதைப் பொருள் நடமாட்டத்தை முற்றிலும் ஒழிக்க அரசைக் கோரி, 24.08.2018. வெள்ளிக்கிழமையன்று மாலையில் - நகர மக்களை ஒட்டுமொத்தமாகத் திரட்டி, விழிப்புணர்வுப் பேரணி நடத்தப்படவுள்ளதாகவும், அனைவரும் கலந்துகொள்ளுமாறும் – காயல்பட்டினம் போதைப் பொருள் ஒழிப்பு நடவடிக்கைக் குழு ஒருங்கிணைப்பாளரும், சட்டமன்ற உறுப்பினருமான கே.ஏ.எம்.முஹம்மத் அபூபக்கர் கேட்டுக்கொண்டுள்ளார். இதுகுறித்த அவரது அறிக்கை:-

வரலாற்றுச் சிறப்பும், புனிதமும் நிறைந்த காயல்பட்டினம் நகரில் – சமூக விரோதிகள் சிலரின் சதிச்செயல் காரணமாக, கஞ்சா உள்ளிட்ட போதைப் பொருட்கள் நடமாட்டம் அதிகரித்து வருகிறது. இதில், நல்ல குடும்பங்களைச் சேர்ந்த இளைஞர்களும் சிக்கும் அவலம் ஏற்பட்டுள்ளது.

இதுகுறித்து கவலைகொண்டு, “போதைப் பொருள் ஒழிப்பு நடவடிக்கைக் குழு” எனும் பெயரில் குழு அமைக்கப்பட்டு, அதன் மூலம் பல்வேறு தொடர் ஆலோசனைக் கூட்டங்கள் நடத்தப்பட்டு நிறைவில், போதைப் பொருள் நடமாட்டத்தை நகரிலிருந்து முற்றிலும் ஒழிக்கும் நோக்குடன் பொதுமக்கள் அனைவரையும் திரட்டி – போதைப் பொருள் ஒழிப்பு விழிப்புணர்வுப் பேரணி நடத்த திட்டமிடப்பட்டுள்ளது.

எதிர்வரும் 24.08.2018. வெள்ளிக்கிழமை மாலை 04.30 மணிக்கு காயல்பட்டினம் பெரிய சதுக்கைத் திடலிலிருந்து துவங்கி, கடற்கரையில் முடிவடையவுள்ள இப்பேரணிக்கு, கடையநல்லூர் தொகுதி சட்டமன்ற உறுப்பினரும், காயல்பட்டினம் மண்ணின் மைந்தனுமான கே.ஏ.எம்.முஹம்மத் அபூபக்கர் ஆகிய நான் தலைமை தாங்குகிறேன். திருச்செந்தூர் தொகுதி சட்டமன்ற உறுப்பினர் உயர்திரு அனிதா ஆர்.ராதாகிருஷ்ணன் முன்னிலை வகிக்க, தூத்துக்குடி மாவட்ட காவல் கண்காணிப்பாளர் உயர்திரு முரளி ரம்பா ஐ.பீ.எஸ். அவர்கள் கொடியசைத்துப் பேரணியைத் துவக்கி வைக்கிறார்.

இம்மாபெரும் பேரணியில், நகரின் அனைத்து ஜமாஅத்துகள், பொதுநல அமைப்புகள், அனைத்து அரசியல் கட்சிகள், பள்ளி – கல்லூரி உள்ளிட்ட கல்வி நிறுவனங்களில் பயிலும் மாணவர்கள், பொதுமக்கள் பெருந்திரளாகக் கலந்துகொள்ளவுள்ளனர். அனைவருக்கும் முறைப்படி அழைப்பு அனுப்பப்பட்டுள்ளது. விரிவான ஏற்பாடுகளும் முறைப்படி செய்யப்பட்டுள்ளது.

இப்பேரணி வெற்றி பெறவும், இதன் தூய நோக்கம் நிறைவேறவும் அனைவரும் ஒத்துழைக்கவும், பேரணியில் பெருந்திரளாகக் கலந்துகொள்ளவும் அன்போடு அழைக்கின்றேன்.

இவ்வாறு அந்த அறிக்கையில் தெரிவிக்கப்பட்டுள்ளது.



போதைப் பொருள் ஒழிப்பு நடவடிக்கைக் குழு சார்பாக...
தகவல்:
எஸ்.கே.ஸாலிஹ்