{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினம் நகராட்சிக்குட்பட்ட பகுதிகளில் சேரும் அன்றாடக் குப்பைகளைச் சேகரிக்க 45 லட்சம் ரூபாய் செலவில் வாங்கப்பட்ட – பாட்டரியால் இயங்கும் 25 வாகனங்களை – நகராட்சி நிர்வாகம் கொஞ்சங்கூடப் பயன்படுத்தாமல் அப்படியே கிடப்பில் போட்டுள்ளதைச் சுட்டிக்காட்டி, காயல்பட்டினம் மக்கள் உரிமை நிலைநாட்டல் மற்றும் வழிகாட்டு அமைப்பின் சார்பில், மத்திய – மாநில அரசுகளிடம் முறையிடப்பட்டுள்ளது. இதுகுறித்து, “நடப்பது என்ன?” சமூக ஊடகக் குழுமம் வெளியிட்டுள்ள செய்தியறிக்கை:-

மத்திய அரசின் தூய்மை இந்தியா (2017-2018) திட்டத்தின் கீழ் - 2018 ஆம் ஆண்டு பிப்ரவரி மாதம், திடக்கழிவு மேலாண்மை திட்டத்திற்கு என ஒரு வாகனம் (BATTERY OPERATED VEHICLE) வாங்க மதிப்பீட்டிற்கு ஒப்புதல் வழங்கப்பட்டது.

ரூபாய் ஒரு லட்சத்து, 80 ஆயிரம் ரூபாய் மதிப்பிலான இந்த வாகனத்தில் உள்ள வசதிகளாக கீழ்க்காணும் தொழில்நுட்பங்கள் தெரிவிக்கப்பட்டன:

Re-cycleable Lithium battery operated collection cart
Load weight - 0.40
0.60 Ton capacity
Location tracker, GSM –Sim tracker capacity
20-30kms per charge with electric charger and adapter

6-3-2018 அன்று ஒப்பந்தப்புள்ளி கோரி, 20-3-2018 அன்று நிறைவேற்றப்பட்ட தீர்மானப்படி (#1539), M/s Krysttal Motors (P) Ltd, Salem என்ற நிறுவனத்திற்கு ஒப்பந்தப்புள்ளியும் வழங்கப்பட்டது.

அதே வாகனம் போல் - மேலும் 24 வாகனங்கள், தூய்மை இந்தியா (2018-2019) திட்டத்தின் கீழ், 43.20 லட்சம் ரூபாய் மதிப்பீட்டில் வாங்கிட - 15.2.2019 அன்று ஒப்பந்தப்புள்ளி கோரப்பட்டதில், குறைந்த ஒப்பந்தப்புள்ளி வழங்கிய M/s Best &Fast Metal Fab, Coimbatore என்ற நிறுவனத்திற்கு, 28-2-2019 அன்று நிறைவேற்றப்பட்ட தீர்மானம் (#1780) மூலம், ஒப்பந்தப்புள்ளியும் வழங்கப்பட்டது.

நகராட்சியில் வீடு வீடாக சென்று மக்கும் குப்பைகள் மற்றும் மக்காத குப்பைகளை பிரித்து சேகரம் செய்ய என காரணம் தெரிவிக்கப்பட்டு, இந்த வாகனங்கள் - வாங்கப்பட்டு பல மாதங்கள் ஆகியும், பயன்பாட்டிற்கு கொண்டுவரப்படவில்லை.

அந்த வாகனங்களில் பல - நீண்ட நாட்களாக பயன்படுத்தப்படாமல், நகராட்சி வளாகத்தில் வைக்கப்பட்டுள்ளதால் - பழுதடைந்துள்ளதாக விபரம் அறிந்தவர்கள் தெரிவிக்கிறார்கள்.





இது குறித்த முழுமையான விபரம் - மத்திய மற்றும் மாநில அரசுகளின் சம்பந்தப்பட்ட துறைகளுக்கு - மக்கள் உரிமை நிலைநாட்டல் மற்றும் வழிகாட்டு அமைப்பு (மெகா) மூலம் சமர்ப்பிக்கப்பட்டுள்ளது.

இவ்வாறு அந்த அறிக்கையில் தெரிவிக்கப்பட்டுள்ளது.